16 مامىردا ەلىمىزدىڭ 14 ايماعىندا نەگىزگى ۇبت باستالدى, تەستىلەۋ 5 شىلدەگە دەيىن جالعاسادى. ال توتەنشە جاعداي رەجيمى جاريالانعان 6 وڭىردە, ياعني اقمولا, اقتوبە, اتىراۋ, باتىس قازاقستان, قوستاناي, سولتۇستىك قازاقستان وبلىستارىندا ۇبت 25 مامىر مەن 12 شىلدە ارالىعىندا وتكىزىلەدى, دەپ حابارلايدى astana-akshamy.kz
-بيىل استانا قالاسى بويىنشا مەكتەپ بىتىرۋشىلەردىڭ سانى 11 مىڭنان اسادى ادامدى قۇرايدى. ولاردىڭ ىشىندە 10 870 مەكتەپ ءبىتىرۋشى تەستىلەۋگە قاتىسۋعا ءوتىنىش بەرگەن. كۇن سايىن 638 وقۋشى ەكى كەزەڭمەن ۇبت تاپسىرۋدا. تالاپكەرلەر نەگىزگى ۇبت-نى ەكى رەت تاپسىرىپ, ەڭ ۇزدىك ناتيجەمەن گرانت كونكۋرسىنا قاتىسا الادى. تەستىلەۋ فورماتىندا وزگەرىستەر جوق. 2024 جىلعى تالاپكەرلەر ءۇش مىندەتتى جانە تاڭداۋ بويىنشا ەكى پاننەن تەست تاپسىرادى. «وقۋ ساۋاتتىلىعى» مەن «ماتەماتيكالىق ساۋاتتىلىق» مىندەتتى پاندەرىنەن تاپسىرمالار سانى 5 سۇراققا قىسقاردى. بۇل بەيىندىك پاندەر بويىنشا سۇراقتار سانىن 40-قا دەيىن ارتتىرۋعا مۇمكىندىك بەردى. سونىمەن قاتار بەيىندىك پاندەردە بەرىلگەن تىزىمنەن سايكەستىكتى انىقتاۋعا ارنالعان 5 تاپسىرما قوسىلدى, – دەيدى استانا قالاسى ءبىلىم باسقارماسىنىڭ جالپى ورتا ءبىلىم بەرۋدىڭ مازمۇنى مەن ادىستەمە ءبولىمىنىڭ باسشىسى اسىل امانگەلديەۆا.
وسىلايشا, ۇبت تاپسىرمالار سانى وزگەرىسسىز قالادى, جالپى 120 سۇراق. ونىڭ ىشىندە «قازاقستان تاريحىنان» 20 تاپسىرما, «وقۋ ساۋاتتىلىعىنان» 10 تاپسىرما, «ماتەماتيكالىق ساۋاتتىلىقتان» 10 تاپسىرما جانە ەكى بەيىندىك ءپان بويىنشا 40 تاپسىرما. جوعارى بالل – 140, ول دا وزگەرىسسىز قالدى.
تەستىلەۋدىڭ جالپى ۋاقىتى – 4 ساعات (240 مينۋت). سونىمەن قاتار ەرەكشە ءبىلىم بەرۋ قاجەتتىلىكتەرى بار بالالارعا قوسىمشا 40 مينۋت ۋاقىتى ساقتالادى, ال كورۋ قابىلەتى بۇزىلعان بالالاردىڭ ىڭعايى ءۇشىن سىزبا جانە دياگراممالارسىز سۇراقتار ازىرلەندى. ءبىلىم باسقارماسىمەن پسيحولوگتار قىزمەتى جانە مۇگەدەكتەر مەن مۇگەدەك بالالارعا تەستىلەۋ تاپسىرۋعا جاعداي جاساۋ ماقساتىندا ء(پان مۇعالىمى بولىپ تابىلمايتىن) پەداگوگ-اسسيستەنتتەردىڭ سۇيەمەلدەۋى قامتاماسىز ەتىلەدى.
اكادەميالىق ادالدىقتى قامتاماسىز ەتۋ ماقساتىندا تەست نۇسقالارى تاڭبالانعانىن اتاپ وتكەن ءجون. ياعني, ۇبت-عا قاتىسۋشىلاردىڭ ارقايسىسىنىڭ جەكە تەست نۇسقاسى بولادى. سونىمەن قاتار, كالكۋلياتور, حيميالىق ەلەمەنتتەردىڭ پەريودتىق جۇيەسى مەن تۇزداردىڭ ەرىگىشتىك كەستەسى كومپيۋتەر ەكرانىندا قولجەتىمدى. تالاپكەرلەردىڭ پىكىرى مەن قالاۋىن ەسكەرە وتىرىپ, ولارعا كەستەلەردىڭ قاعاز نۇسقاسى بەرىلەدى.
تەست تاپسىرۋشىلار تەستىلەۋ اياقتالعاننان كەيىن 30 مينۋت ىشىندە اپەللياتسياعا ءوتىنىش بەرە الادى. سەرتيفيكات اپەللياتسيالىق كوميسسيانىڭ شەشىمىنەن كەيىن تالاپكەردىڭ جەكە كابينەتىندە قولجەتىمدى بولادى. شەكتى بالل وزگەرگەن جوق: «قۇقىق» جانە «پەداگوگيكالىق عىلىمدار» ءبىلىم بەرۋ سالالارى ءۇشىن كەمىندە 75 بالل, «دەنساۋلىق ساقتاۋ جانە الەۋمەتتىك قامتاماسىز ەتۋ (مەديتسينا)» كەمىندە 70 بالل, «اۋىل شارۋاشىلىعى جانە بيورەسۋرستار», «ۆەتەريناريا» كەمىندە 60 بالل (ۇلتتىق جوو ءۇشىن); ۇلتتىق جوعارى وقۋ ورىندارىنا ءتۇسۋ ءۇشىن كەمىندە 65 بالل, باسقا جوعارى وقۋ ورىندارىنا كەمىندە 50 بالل جيناۋ كەرەك.
تەستىلەۋگە كىرگىزۋ كەزىندە قول جانە رامالىق مەتالل ىزدەگىشتەر پايدالانىلادى. بۇل تالاپكەرلەردىڭ قاۋىپسىزدىگىن قامتاماسىز ەتىپ, ەرەجەلەردى بۇزۋ مەن تىيىم سالىنعان زاتتاردى (ۇيالى تەلەفون, شپارگالكا جانە ت.ب.) الىپ ءوتۋدىڭ الدىن الۋ ءۇشىن قاجەت. تەستىلەۋ بارىسىندا اۋديتوريانىڭ جانە بەينەباقىلاۋدىڭ اۋدانىنا بايلانىستى رۇقسات ەتىلگەن ماگنيتتىك تولقىندار شەگىندە ۇتقىر جانە راديوەلەكتروندىق بايلانىس سيگنالدارىن باساتىن قۇرىلعىلار قولدانىلادى.
2024 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلادى. ۇبت كەزەڭىندە ۇيىمداستىرۋ جانە وتكىزۋ جونىندەگى جوسپار-تاپسىرماسى بويىنشا, تەست وتكىزۋ پۋنكتەرىندە ءتيىستى جۇمىستار (قوعامدىق ءتارتىپ, ءورت قاۋىپسىزدىگىن ساقتاۋ, عيماراتتىڭ تەرروريزمگە قارسى قورعالۋىن تەكسەرۋ, ۇزدىكسىز ەلەكترمەن جابدىقتاۋ, جەدەل جاردەم كەزەكشىلىگىن ۇيىمداستىرۋ, پۋنكت اۋماقتارىن جيناۋ, مەملەكەتتىك كوميسسيا مۇشەلەرىنىڭ كەزەكشىلىگى) جۇرگىزۋدە.
