استانادا 6 مىڭنان اسا بەلسەندى ۆولونتەر بار. ەرىكتى تۇردە استانانىڭ رۋحاني دامۋىنا, وركەنيەتتى ورتا قالىپتاستىرۋدا جاقسىلىق جاساپ جارىسىپ جۇرگەن ەلوردالىق ەرىكتىلەردىڭ ەرلىگى ەرەكشە. كومەككە مۇقتاج ادامدارعا جاردەم بەرۋگە, قوعامدىق-الەۋمەتتىك ءىس-شارالارعا قولداۋ كورسەتەتىن ەرىكتىلەردىڭ قىزمەتى تۋرالى استانانىڭ ورتالىق كوممۋنيكاتسيالار قىزمەتى الاڭىندا بريفينگ ءوتتى.
بريفينگ بارىسىندا وقۋ-اعارتۋ مينيسترلىگىنىڭ «وركەن» بالالاردىڭ ءال-اۋقاتىن ارتتىرۋ ۇلتتىق عىلىمي-پراكتيكالىق ينستيتۋتى» كە اق پرەزيدەنتى ەسەنعازى يمانعاليەۆ «مەنىڭ باۋىرىم» جوباسىنا ەلورداداعى 11 ۋنيۆەرسيتەتتىڭ ەرىكتى ستۋدەنتتەرى قاتىسقانىن ايتتى. ۆولونتەرلەر پەداگوگيكا, پسيحولوگيا, الەۋمەتتىك جۇمىس, قۇقىق جانە IT ماماندىقتارى بويىنشا ءبىلىم الادى.
«جوبانى ىسكە اسىرۋدا ادىستەمەلىك قولداۋدى وقۋ-اعارتۋ مينيسترلىگىنىڭ «وركەن» بالالاردىڭ ءال-اۋقاتىن ارتتىرۋ ۇلتتىق عىلىمي-پراكتيكالىق ينستيتۋتى جۇزەگە اسىرادى. ينستيتۋت ماماندارى 850 ەرىكتى ستۋدەنت پەن 2380 قالا مەكتەپتەرىنىڭ پەداگوگتارىنا وقىتۋ ترەنينگىن وتكىزگەن.
V دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ جونىندەگى ديرەكتسيا باسشىسىنىڭ ورىنباسارى ابىلاي قوندىباەۆ بۇگىنگى تاڭدا V دۇنيەجۇزىلىك كوشپەندىلەر ويىندارى كەزىندە قىزمەت جاسايتىن ەرىكتىلەردى ىرىكتەۋ جۇمىسى جۇرگىزىلىپ جاتقانىن جەتكىزدى.
– قاڭتار ايىندا ەرىكتىلىككە وتىنىمدەردى قابىلداۋ باستالىپ, استانا قالاسىنىڭ 13 جوو قامتىلعان. ناۋرىز ايىندا ستۋدەنتتەردى ەرىكتىلەر قاتارىنا شاقىرۋ ماقساتىندا قالانىڭ 29 كوللەدجىندە كەزدەسۋ ۇيىمداستىرىلعان. سونداي-اق V دۇنيەجۇزىلىك كوشپەندىلەر ويىندارى تۋرالى اقپارات ۇسىنۋ جانە ەرىكتىلەر قاتارىنا شاقىرۋ ماقساتىندا ەسىل, الماتى, نۇرا, سارىارقا, بايقوڭىر اۋداندارىنداعى بەلسەندى ۇزاق ءومىر ءسۇرۋ ورتالىقتارىنىڭ قىزمەت الۋشىلارىمەن كەزدەسۋ وتكەن. بۇگىندە كەلىپ تۇسكەن وتىنىمدەردىڭ جالپى سانى – 4683. سونىمەن بىرگە ۆولونتەر بولۋعا قىرعىزستان, رەسەي فەدەراتسياسى, وزبەكستان, ۆەتنام, تۇركيا, گەرمانيا, فرانتسيا, يسپانيا, كورەيا, تۇرىكمەنستان, بەلارۋس, گانا رەسپۋبليكاسى جانە ت. ب. مەملەكەتتەردەن دە وتىنىمدەر كەلىپ تۇسكەن, – دەدى ا.قوندىباەۆ.
«استانا جاستارى» جاستار رەسۋرستىق ورتالىعىنىڭ باسشىسى شىڭعىس تىلەۋلين استانالىق ەرىكتىلەردىڭ سۋ تاسقىنىنان زارداپ شەككەن اۋداندارعا كورسەتكەن گۋمانيتارلىق كومەگى تۋرالى ايتىپ ءوتتى. قازىرگى تاڭدا «استانا جاستارى» بازاسىندا 6000-نان استام بەلسەندى ۆولونتەر بار. 29 ناۋرىز-10 مامىر ارالىعىندا استانا قالاسى اۋماعىندا مەملەكەتتىك مەكەمەلەردىڭ, الەۋمەتتىك قويمالاردىڭ, كاسىپكەرلەردىڭ, مەملەكەتتىك ەمەس ۇيىمداردىڭ, جەكە تۇلعالاردىڭ جانە ەرىكتىلەردىڭ كۇشىمەن جالپى 1160,5 توننا گۋمانيتارلىق كومەك جينالعان. قالالىق ۆولونتەرلىك شتابىنىڭ ۇيلەستىرۋىمەن 10 پۋنكت (الەۋمەتتىك قويما) گۋمانيتارلىق كومەك قابىلدايدى. الەۋمەتتىك قويمالاردا 30 ۆولونتەرلىك ۇيىم جانە 500-دەن استام ۆولونتەر بۋىپ-ءتۇيۋ جۇمىسىن جۇرگىزگەن.
