ناشاقورلىققا قارسى كۇرەس كۇنى قارساڭىندا, سونداي-اق, «ناشاقورلىققا قارسى كۇرەس جانە ناشاقورلىقتىڭ الدىن-الۋدىڭ 2023-2025 جىلدارعا ارنالعان كەشەندى جوسپارىن» ىسكە اسىرۋ اياسىندا ەلوردادا «استانا – ەسىرتكىسىز قالا» اتتى ۇرانىمەن ۆەلوشەرۋ ءوتتى, دەپ حابارلايدى astana-akshamy.kz.
ۆەلوشەرۋگە پوليتسيا دەپارتامەنتىنىڭ قىزمەتكەرلەرى, قالالىق اكىمدىك, سپورت سەكتسيالارىنىڭ, ۇەۇ جاستار قوزعالىستارىنىڭ وكىلدەرى, سونىمەن قاتار, قاتىسۋعا نيەت بىلدىرگەن ازاماتتار قاتىستى. ۆەلوشەرۋ تۇران داڭعىلىنىڭ بويىنداعى «قازاقستان كۇنى» مونۋمەنتىنەن باستاۋ الىپ, قورعالجىن تاس جولىنا دەيىن جالعاسىپ, تۇران داڭعىلىنىڭ بويىنداعى دەمالىس ساياباعىندا اياقتالدى. بۇكىل ساپار بارىسىندا ۆەلوشاباندوزداردى پوليتسيانىڭ پاترۋلدىك كولىكتەرى مەن ەسكورد ۆزۆودى ىلەسىپ ءجۇردى. ۆەلوشەرۋگە 700-دەن استام ادام قاتىستى.
استانا قالاسى پوليتسيا دەپارتامەنتىنىڭ باستىعى پوليتسيا گەنەرال-مايورى مارات تولەباەۆتىڭ جەتەكشىلىگىمەن قاتىسۋشىلار ون شاقىرىمدى باعىندىردى.
سپورتتىق شارا – وسكەلەڭ ۇرپاق اراسىندا ەسىرتكى قىلمىسىمەن كۇرەسۋ, سونداي-اق, جاستاردىڭ ەسىرتكىگە اۋەس بولماي, پسيحواكتيۆتى زاتتاردى قولدانباي, بوس ۋاقىتىن دۇرىس پايدالانىپ جانە بۇقارالىق سپورتتى كەڭىنەن ناسيحاتتاۋ مەن دامىتۋ ماقساتىندا وتكىزىلدى.
«ۆەلوشەرۋ – ەڭ الدىمەن ناشاقورلىق ماسەلەسىنە قوعامنىڭ نازارىن اۋدارۋعا باعىتتالعان. بۇل – بۇكىل قوعام ءۇشىن پروبلەما جانە ونىمەن ءبارىمىز بىرگە, جۇمىلا كۇرەسۋىمىز قاجەت»-دەپ ەلوردالىق پوليتسيا دەپارتامەنتىنىڭ باسشىسى اتاپ ءوتتى.
جىل باسىنان بەرى پوليتسيا قىزمەتكەرلەرى زاڭسىز ەسىرتكى اينالىمىنان جالپى سالماعى 60 كەلىدەن استام ەسىرتكى زاتىن تاركىلەدى. مۇنداي ءىس-شارالار وسكەلەڭ ۇرپاقتىڭ بويىندا ناشاقورلىققا توزبەۋشىلىكتى قالىپتاستىرۋ, سونداي-اق, ولاردى وسى زياندى تاۋەلدىلىكتەن قورعاۋعا باعىتتالعان. ۆەلوشەرۋدىڭ بارلىق قاتىسۋشىلارى قاشىقتىقتان سۇرىنبەي ءوتىپ, ال ولاردىڭ دوستارى مەن ارىپتەستەرى مارە سىزىعىندا كۇتىپ تۇردى.
