استانادا «ۇلتتىق سەزىم» جالپىۇلتتىق فلەشموبىنا اتسالىسىپ جاتقان ۇجىمدار قاتارى ارتۋدا. قولداۋشىلار قاتارىنا استانا قالاسىنىڭ دەنە شىنىقتىرۋ جانە سپورت باسقارماسىنىڭ قىزمەتكەرلەرى مەن باسقارماعا قاراستى مەكەمەلەر دە قوسىلدى. ولار ەندى الداعى ۋاقىتتا جۇمىسقا ۇلتتىق كيىم كيىپ, قازاقى اشەكەي-بۇيىمدارىن تاعىپ جۇرەتىندەرىن جەتكىزدى, دەپ حابارلايدى astana-akshamy.kz
جەلتوقسان ايىندا باستالعان باستاماعا كەز-كەلگەن ادام قاتىسا الادى. ناقتى شەكتەۋ جوق. بار بولعانى قاتىسۋشىلار فوتوسۋرەتتەرى مەن بەينەلەرىن #ۇلتتىقسەزىم #نوشۋناتسيونالنوە #ۇلتتىقكيىمكيەم حەشتەگتەرى ارقىلى جۇكتەپ, جوبانىڭ رەسمي @ulttyqsezim.kz Instagram پاراقشاسىن بەلگىلەپ, ءار اپتانىڭ جۇما كۇنىندە ۇجىمداعىلار ۇلتتىق كيىم كيۋ ءۇردىسىن ساقتاسا جەتكىلىكتى.
«ۇلتتىق سپورت قاۋىمداستىعىنىڭ باستاماسىمەن, ۇلتتىق كيىمدى دارىپتەۋدى ماقسات ەتكەن «ۇلتتىق سەزىم» جوباسى ەلىمىزدىڭ بارلىق ايماعىندا كەڭىنەن قولداۋعا يە بولدى. اتا-بابالارىمىزدىڭ داستۇرلەرى مەن تاريحى ارقىلى قازاقى بۇيىمدى برەندكە اينالدىرۋعا ءتۇرلى سالانىڭ ماماندارى ۇلەس قوسىپ جاتىر. ءوز كەزەگىمىزدە ءبىزدىڭ قىزمەتكەرلەر دە جانە باسقارماعا قاراستى مەكەمەلەر «دۇيسەنبىدەن -جۇماعا» دەيىن دەگەن نيەتپەن باستاماسىن باستاپ, اپتانىڭ جۇماسىن ۇلتتىق درەسس-كود كۇنى دەپ جاريالادىق. باستاما قازاق مادەنيەتىن ناسيحاتتاۋعا, حالىقتى ءبىرتۇتاس كوعامداستىقتىڭ بولىگى بولۋعا جانە ۇلتتىق بىرەگەيلىكتى جانداندىرۋعا ءوز ۇلەسىن قوسۋعا شابىتتاندىرادى»,- دەيدى قالالىق سپورت باسقارماسى باسشىسىنىڭ مىندەتىن اتقارۋشى ەركەعالي كوربوزوۆ.
استانا قالاسىنىڭ دەنە شىنىقتىرۋ جانە سپورت باسقارماسى «ۇلتتىق سەزىم» فلەشموبى اياسىندا ۇلتتىق قۇندىلىقتىڭ ءمانىن ارتتىرۋعا قالالىق باسقارمالاردى شاقىرادى.
