ەلوردادا الماتى اۋدانىن ەكىگە ءبولىپ التىنشى اكىمشىلىك اۋداندى قۇرۋ جۇمىسى قولعا الىنعان ساتتەن باستاپ ءتۇرلى ۇسىنىستار ءتۇستى. بۇل تۋرالى استانا قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ ءمالىم ەتتى, دەپ حابارلايدى astana-akshamy.kz.
باسقارما باسشىسىنىڭ ايتۋىنشا, زيالى قاۋىم وكىلدەرىمەن, تاريحشى عالىمدارمەن جانە قوعام قايراتكەرلەرىمەن التىنشى اۋداننىڭ اتىن قويۋ جونىندە ارنايى كەڭەس وتكەن.باسقوسۋدا بىرقاتار ۇسىنىس ايتىلدى.
«ءار ۇسىنىستىڭ تاريحي, مازمۇندىق استارىنا ۇڭىلدىك. ايتىلعان 15-كە جۋىق ۇسىنىستىڭ ىشىنەن باسىم داۋىسپەن ەرەكشەلەنگەن نەگىزگى ءتورت نۇسقانى قالالىق ونوماستيكا كوميسسياسىنىڭ قاراۋىنا الىپ شىقتىق. ءار اتاۋدىڭ ءوز ەرەكشەلىگى, تاريحي نەگىزى بار. ول ءتورت ۇسىنىس – سارايشىق, تۇران, ساۋران, جەرۇيىق بولدى.
جاڭا اۋداننىڭ شەكاراسى ايقىندالعاننان كەيىن قالالىق ونوماستيكا كوميسسياسىنىڭ وتىرىسىن وتكىزىپ, جوعارىدا ايتىلعان ءتورت ۇسىنىستى كوميسسيا مۇشەلەرىمەن بىرگە تالقىلاپ, داۋىسقا سالدىق. كوميسسيا مۇشەلەرىنىڭ ورتاق شەشىمىمەن سارايشىق دەگەن اتاۋدى جاڭا اۋدانعا بەرۋ جونىندە توقتامعا كەلدىك», – دەيدى ساكەن ەسىركەپ.
ول ءسوزىن جالعاي وتىرىپ, سارايشىق اتاۋىنىڭ ماعىناسىنا كەڭىنەن توقتالىپ ءوتتى.
«سارايشىقتىڭ نە ەكەنىن كوزى قاراقتى جۇرتتىڭ ءبارى بىلەدى. ورتا عاسىرلىق قالا, كەزىندە التىن وردانىڭ, كەيىننەن قازاق حاندىعىنىڭ استاناسى بولدى. بۇل قالا ۇلى جىبەك جولىنىڭ بويىنداعى ءىرى ساۋدا ورتالىقتارىنىڭ ءبىرى بولعان. دەرەكتەرگە سۇيەنسەك سارايشىق ەۋروپا ەلدەرى مەن التىن وردادان حورەزم قالالارىنا, ءۇندىستان, يراك جانە قىتاي ەلدەرىنە باستى قۇرلىقتىق كەرۋەن جولدارىن جالعاعان.
سارايشىق تەك ساۋدا عانا ەمەس مادەني, ەكونوميكالىق جانە ساياسي ورتالىق رەتىندە ۇلكەن ماڭىزعا يە بولعان.
سارايشىقتا التىن وردانىڭ بىرنەشە حانى مەن تاريحي تۇلعاسى, سونداي-اق قازاقتىڭ ايگىلى قاسىم حانى جەرلەنگەن. بۇگىنگى قازاقستاننىڭ باتىس بولىگىندە, جايىق وزەنىنىڭ بويىندا, اتىراۋ قالاسىنان 45 شاقىرىم جەردە ورنالاسقان.
ءبىز بيىل ۇلىق ۇلىستىڭ 800 جىلدىق مەرەيتويىن اتاپ ءوتىپ جاتىرمىز. ال سارايشىق ءدال وسى ۇلىق ۇلىستىڭ بىردەن ءبىر ورتالىعى بولعان ءىرى شاھار», – دەپ ءتۇسىندىردى تىلدەردى دامىتۋ جانە ارحيۆ ءىسى باسقارماسىنىڭ باسشىسى.
ول سول سياقتى ەلوردانىڭ ءاربىر اۋدانى توپونيميكالىق اتاۋلاردى يەلەنگەنىن ءمالىم ەتتى.
«استانانىڭ قازىرگى بەس اۋدانى قازاقستاننىڭ ءار وڭىرىنە قاتىستى توپونيميكالىق اتاۋلاردى يەلەنگەن. ماسەلەن الماتى وڭتۇستىك-شىعىستا بولسا, بايقوڭىر وڭتۇستىك-باتىستا ورنالاسقان. ال سارىارقا قازاقستاننىڭ تۇتاس ورتالىعىن قامتىپ تۇرسا, نۇرا قارقارالىدان باستاپ قاراعاندى, اقمولا وبلىستارىن قامتيدى. ەسىل وزەنى اقمولا جانە سولتۇستىك قازاقستان وبلىستارىن قامتىپ جاتىر. وسى ورايدا قازاقستاننىڭ باتىس بولىگىندەگى ءىرى تاريحي قالانىڭ اتىن قالا اۋدانىنا اكەلۋدىڭ مازمۇندىق, يدەيالىق, ۇلتتى ۇيىستىراتىن ماڭىزى زور دەپ بىلەمىز.
وسىعان وراي, استانانىڭ جاڭا التىنشى اۋدانىنا سارايشىق اتاۋىن بەرۋ ۇسىنىسىن قولداۋدى سۇرايمىز», – دەپ باسقارما باسشىسى ءسوزىن اياقتادى.
