مەملەكەتتىك جانە اسكەري قىزمەتكەرلەرگە قۇمار ويىندارعا قاتىسۋعا تىيىم سالىنادى, دەپ حابارلايدى astana-akshamy.kz
ءماجىلىس دەپۋتاتى ەرنۇر بەيسەنباەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى, لوتەرەيالار جانە لوتەرەيا قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكىنشى وقىلىمدا تانىستىردى.
ءماجىلىس ويىن بيزنەسى, لوتەرەيا جانە لوتەرەيا قىزمەتى ماسەلەلەرى بويىنشا زاڭدى اكىمشىلىك قۇقىق بۇزۋشىلىق تۋرالى كودەكسكە ەنگىزىلەتىن ىلەسپە تۇزەتۋلەرىمەن ەكىنشى وقىلىمدا قابىلدادى. زاڭعا مەملەكەت باسشىسىنىڭ حالىق اراسىندا ويىنعا تاۋەلدىلىكپەن كۇرەستى كۇشەيتۋ جونىندەگى تاپسىرماسىن جۇزەگە اسىرۋ اياسىندا دەپۋتاتتار باستاماشى بولدى.
تۇزەتۋلەرگە سايكەس قازاقستاندىقتاردىڭ بەلگىلى ءبىر توبىنا قۇمار ويىندارعا قاتىسۋعا جانە ءباس تىگۋگە تىيىم سالىنادى. ولاردىڭ قاتارىندا 21 جاسقا تولماعان ازاماتتار, ويىن جانە ءباس تىگۋگە قاتىسۋى شەكتەلگەن, ونىڭ ىشىندە ءوزىن-ءوزى شەكتەگەن (6 ايدان 10 جىلعا دەيىن), سونداي-اق بورىشكەرلەردىڭ بىرىڭعاي تىزىلىمىنە سايكەس وتەلمەگەن مىندەتتەمەلەرى بار تۇلعالار كىرەدى, – دەدى دەپۋتات.
بۇل قاتاردا مەملەكەتتىك قىزمەتشىلەر, اسكەري قىزمەتكەرلەر جانە ارنايى مەملەكەتتىك ورگانداردىڭ قىزمەتكەرلەرى دە بار. ولار تىيىمدى بۇزعانى ءۇشىن جۇمىستان بوساتىلادى.
زاڭدى تۇلعالاردىڭ قۇمار ويىندارعا قاتىسۋىنا العاشقى ءۇش ساناتقا رۇقسات بەرگەنى ءۇشىن اكىمشىلىك جاۋاپكەرشىلىك بەلگىلەنگەن. بۇل جاعدايدا ورتا كاسىپكەرلىك سۋبەكتىلەرىنە 300 اەك, ءىرى كاسىپكەرلىك سۋبەكتىلەرىنە 1000 اەك كولەمىندە ايىپپۇل سالىنادى. قايتالاپ جاسالعان قۇقىق بۇزۋشىلىق ءۇشىن – ليتسەنزيانىڭ قولدانىلۋىن توقتاتا تۇرۋ جازاسى قاراستىرىلعان.
ەسكە سالا كەتەيىك, 2024 جىلى 1 اەك 3 692 تەڭگەگە تەڭ.
