ىشكى ىستەر ءمينيسترى ەرجان سادەنوۆ پەن ەلوردا اكىمى جەڭىس قاسىمبەك استانا قالاسىنداعى پوليتسيا دەپارتامەنتىنىڭ نەگىزگى عيماراتىنا باردى. بۇل تۋرالى ءىىم باسشىسى الەۋمەتتىك جەلىدەگى پاراقشاسىندا اقپارات جاريالادى.
«وتكەن جىلدىڭ سوڭىندا استانالىق پوليتسيا دەپارتامەنتى جاڭا عيماراتقا كوشتى. مەملەكەت باسشىسىنىڭ تاپسىرماسىنا سايكەس, پوليتسيانىڭ سەرۆيستىك مودەلىن ەنگىزۋ بويىنشا جۇيەلى جۇمىس جۇرگىزىلىپ جاتىر. ەلورداداعى پوليتسيا دەپارتامەنتىنىڭ عيماراتىندا جاڭا ەكى قاباتتى فرونت-كەڭسە جۇمىس ىستەيدى. فرونت-كەڭسەدە ازاماتتاردى قابىلدايتىن بولمەلەر, مەدياتسيا كابينەتى, كۇتۋ زالى جانە اقپاراتتىق ورتالىق بار. تاڭعى 08:30-دان كەشكى 18:30-عا دەيىن جۇمىس ىستەيدى. جۇمىستىڭ تيىمدىلىگىن ارتتىرۋدا قىزمەتكەرلەردىڭ كاسىبيلىگى مەن دايىندىعى ماڭىزدى ءرول اتقارادى. پوليتسەيلەردىڭ ەڭبەك جاعدايىن جاقسارتۋعا باعىتتالعان جۇمىس جالعاسىن تاۋىپ جاتىر. ماسەلەن, قىزمەتكەرلەردى سپورتقا بەيىمدەۋ ءۇشىن پوليتسيا دەپارتامەنتىنىڭ نەگىزگى عيماراتىندا سپورت زالى سالىندى. باستى مىندەت – حالىقتىڭ ىشكى ىستەر ورگاندارىنا دەگەن سەنىم دەڭگەيىن ارتتىرۋ» دەپ جازدى ەرجان سادەنوۆ. ونىڭ ايتۋىنشا, ءار وڭىردە پوليتسيا قىزمەتكەرلەرىنىڭ ەڭبەك جاعدايىن جاقسارتۋ بويىنشا جۇمىس جالعاسادى.
