بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەرەكشە قورعالاتىن تابيعي اۋماقتاردى پايدالانعانى ءۇشىن تولەم الۋ ءتارتىبىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى» زاڭىنىڭ جوباسى ءبىرىنشى وقىلىمدا ماقۇلداندى, دەپ حابارلايدى astana-akshamy.kz.
بۇل قۇجات پارلامەنت دەپۋتاتتارىنىڭ باستاماسىمەن ازىرلەندى جانە ول جالپى ەرەكشە قورعالاتىن تابيعي اۋماقتاردى پايدالانۋ سالاسىنداعى زاڭنامانى ودان ءارى جەتىلدىرۋگە باعىتتالعان.
«رەسپۋبليكالىق جانە جەرگىلىكتى ماڭىزى بار ەرەكشە قورعالاتىن تابيعي اۋماقتاردى پايدالانعانى ءۇشىن تولەماقىنى الىپ تاستاۋ بولىگىندە سالىق كودەكسىنە, بيۋدجەت كودەكسىنە وزگەرىستەر مەن تولىقتىرۋلار ەنگىزۋ ۇسىنىلدى. قولدانىستاعى زاڭنامالارعا سايكەس, ەرەكشە قورعالاتىن تابيعي اۋماقتارعا بارعان كەزدە ازاماتتار بيۋدجەتكە تۇسەتىن ەرەكشە قورعالاتىن تابيعي اۋماقتاردى پايدالانعانى ءۇشىن سالىق جانە تابيعات قورعاۋ مەكەمەلەرى ۇسىناتىن قىزمەتتەر ءۇشىن الىمداردى تولەيدى. قىزمەت ءۇشىن الىمدار مەكەمەلەردىڭ ارنايى ەسەپ-شوتىنا تۇسەدى. قازىر ەرەكشە قورعالاتىن تابيعي اۋماقتاردا ورنالاسقان تۋريستىك نىسانداردىڭ قىزمەتكەرلەرى سانالاتىن ازاماتتار باقىلاۋ-وتكىزۋ پۋنكتىنەن وتكەن كەزدە, ءار كۇن سايىن ەرەكشە قورعالاتىن تابيعي اۋماقتاردى پايدالانعانى ءۇشىن سالىق تولەۋگە ءماجبۇر. كوپ جاعدايدا بۇل ازاماتتار جالاقىسى تومەن ماۋسىمدىق جۇمىستاردى اتقارادى. بۇل جاعدايعا ازاماتتاردىڭ تاراپىنان بەلگىلى ءبىر نارازىلىقتار بار», — دەدى ءماجىلىس دەپۋتاتى ەدىل جاڭبىرشين.
ونىڭ ايتۋىنشا, ماسەلەنى ودان ءارى شيەلەنىستىرمەس ءۇشىن, سونىمەن قاتار وتاندىق تۋريستىك بيزنەستى ودان ءارى دامىتۋعا ىڭعايلى جاعداي جاساۋ باعىتىندا ەرەكشە قورعالاتىن تابيعي اۋماقتاردى پايدالانعانى ءۇشىن سالىقتى الىپ تاستاۋ ۇسىنىلدى.
«الەمدەگى وسىنداي نىساندارداعى تاجىريبەنى قاراساق, كوبىنە تۋريستەردەن سالىق ەمەس, ارنايى رەكرەاتسيالىق الىم الىنادى. مىسالى, اقش-تا ۇلتتىق پاركتەرگە كىرگەنى ءۇشىن جاياۋ ادامنان, موتوتسيكلدەن جانە كولىكتەن تەك بەلگىلەنگەن مولشەردە الىم الىنادى. ال رەسەيدەگى „ۋگرا“, „ۆالداي“ ۇلتتىق پاركتەرىندە ۆيزيت-ورتالىقتارعا نەمەسە اقپاراتتىق بولىمشەلەرگە كەلگەن كەلۋشىلەردەن الىم الىنبايدى, تەك قوناق ءۇي, ەكسكۋرسيالار مەن جابدىقتاردى جالعا الۋ قىزمەتتەرى ءۇشىن تولەم الىنادى. سالىق تولەمىن الىپ تاستاۋ ەرەكشە قورعالاتىن تابيعي اۋماقتارعا كەلۋشىلەردى كوپتەپ تارتۋعا, ەكوتۋريزمنىڭ دامۋىنا جانە ازاماتتارىمىزدىڭ ەكولوگيالىق ساۋاتتىلىعىنىڭ ارتۋىنا ىقپال ەتەدى. سونىمەن قاتار بۇل وزگەرىس تابيعي اۋماقتاردا عىلىمي-زەرتتەۋلەردى جۇرگىزۋگە دە مۇمكىندىكتەردى كەڭەيتەدى, ال ول وز كەزەگىندە بيوالۋانتۇرلىلىك پەن ەكوجۇيەنى ساقتاۋ ءۇشىن ماڭىزدى. ەرەكشە قورعالاتىن تابيعي اۋماقتاردى پايدالانعانى ءۇشىن سالىقتى الىپ تاستاعانمەن, بۇل ايماقتاردا تۋريستەرگە كورسەتىلەتىن قىزمەتتەر ءۇشىن الىناتىن تولەمدەردىڭ ساقتالىپ قالاتىنىن اتاپ وتكىم كەلەدى», — دەدى دەپۋتات.
