استانادا «ەرىكتى بولۋ وڭاي» ۇرانىمەن قىسقى اپتالىق اياسىندا ۆولونتەرلەر جالعىزباستى زەينەتكەردىڭ ءۇي شارۋاسىنا كومەكتەستى.
قارت ادامدارعا قامقورلىق جاساۋ, ۇرپاقتار ساباقتاستىعىن قالىپتاستىرۋ جانە جاستارعا پاتريوتتىق تاربيە بەرۋ ماقساتىندا «استانا جاستارى» جاستار رەسۋرسى ورتالىعى قۇرامىنداعى ەرىكتىلەر جالعىز تۇراتىن قارت كىسىلەردىڭ اۋلاسىنىڭ قارىن كۇرەۋدى, ءۇي شارۋاسىنا قولعابىس ءبىلدىرۋدى داستۇرگە اينالدىرىپ كەلەدى.
– حالىقارالىق ەرىكتىلەر كۇنىن مەرەكەلەۋ اياسىندا, سونداي-اق 4-11 جەلتوقسان ارالىعىندا «ەرىكتى بولۋ وڭاي» قىسقى اپتالىعى نەگىزىندە بىرقاتار ءىس-شارالار جوسپارلاندى. ءبىز جالعىزباستى زەينەتكەرلەرگە, تىل ارداگەرلەرىنە, مۇمكىندىگى شەكتەۋلى جاندارعا كومەكتەسەمىز. ازىق-تۇلىك سەبەتتەرىن جەتكىزىپ, اۋلاسىن, ءۇي ءىشىن تازارتۋعا ۆولونتەرلەر جۇمىلدىرىلادى. مۇنداي اكتسيالاردى ولار شىن نيەتىمەن جاساپ, قالاپ تۇرادى, – دەدى «استانا جاستارى» جاستار رەسۋرستىق ورتالىعىنىڭ ۆولونتەرلىك قوزعالىستى دامىتۋ ءبولىمىنىڭ باسشىسى ەلۆيرا ەسمۇحانوۆا.
كەزەكتى اكتسيا بارىسىندا ۆولونتەرلەر كوكتال تۇرعىن الابىنىڭ تۇرعىنى رايدا ميفتاحوۆا باردى. جاستار 82 جاستاعى زەينەتكەرگە ءۇي شارۋاسىنا كومەكتەسىپ, گۇلدەردى سۋارىپ, ازىق-تۇلىك سەبەتىن جەتكىزدى. ال زەينەتكەرلەر بولسا كومەك قولىن سوزعان ەرىكتى جاستارعا العىسىن ءبىلدىردى.
«جىلدا ۆولونتەرلەر ءبىزدى ەسكەرىپ, ۇلكەن كومەك كورسەتەدى. ءۇي ماڭىن قار باسىپ قالعاندا, شىعۋعا مۇمكىندىگىمىز جەتە بەرمەيدى. مۇندايدا ۆولونتەر جاستار بارلىق قاردى تازارتىپ, بارىن سالىپ كومەكتەسۋگە تىرىسادى. ولار مەنىڭ بالالارىم دەسەم دە ارتىق ەمەس. جاستارىمىزدىڭ مەيىرىمگە, ادامگەرشىلىككە تولى جاناشىر ىستەردى جاساۋعا ۇمتىلۋى قۋانتادى. بىزگە, زەينەتكەرلەرگە قامقورلىق جاساپ جاتقاندارى ءۇشىن العىسىمىز شەكسىز» دەدى قالا تۇرعىنى رايدا ميفتاحوۆا.
