نەتكەن زامان ەدى, مۇزداي سۋىق لەبى,
سول ءبىر سۇمدىق ءəلى مازالايدى مەنى.
قوس ۇرەيلى كۇندەر, قورقىنىشتى تۇندەر,
جازىعى جوق جاندار, الىپ كەتكەن كىمدەر؟
كىنəسى جوق جاندار, كىمدەر كىنə تاققان,
كۇنəسى جوق جاندار, كىمدەر جالا جاپقان؟
اققا كۇيە جاققان, ايتىڭدارشى, كىمدەر,
كۇرسىنەدى تاۋلار, تۇنجىرايدى كولدەر.
جەككەنگە قۋدالانىپ, قازاق حالقىنىڭ بەتكە ۇستار ازاماتتارى وسىنداي ناۋبەتتى باسىنان وتكىزدى. 1937 جىلى تۋعان اقىن ءومىرىنىڭ سوڭىنا دەيىن «نەگە مەن سول جىلى تۋدىم» دەپ جاۋابىن تابا الماي ءوتتى. زوبالاڭ جىلدار قازاقتىڭ ءار وتباسىنىڭ تاريحىندا وشپەس ءىزىن قالدىردى, اينالىپ وتپەدى. سوندىقتان بولار 1997 جىلى 3 ساۋىردە №3443 قازاقستان پرەزيدەنتىنىڭ جارلىعىمەن 31 مامىر كۇنىن رەپرەسسياعا ۇشىراعان بوزداقتاردى ەسكە الۋ كۇنى دەپ جاريالاۋى كۇناسىز جازالانعانداردى ۇرپاعىنا ءتىرىلتىپ بەرمەسە دە, حالىق جاۋى دەپ قارالاعان جالادان اقتاپ, حالقىن, ەلىن سۇيگەن ەرلەر ەكەنىن دالەلدەپ, عاسىر بويى قارا جامىلعان حالىقتىڭ باسىن كوتەرىپ اتالارىن ماقتانىشپەن ەسكە الىپ, العا باتىل باسىپ, ەلىنىڭ بولاشاعىن قۇرۋعا دەم بەردى.
وسى ولەڭ جولدارى يتەرمەلەپ, ءان تۋىنا سەبەپ بولدى. ويتكەنى ءوز اتام ءابىشتىڭ تۋعان اعاسى پارتشكولعا وقۋعا كەتكەن قالپىنان جوق بولىپ, ءتىپتى اتى اتالماي ءوتتى, نەمەرە ءىنىسى حاميت سومباەۆ اۋىل اكىمى بولىپ جۇرگەن جەرىنەن حالىق جاۋى اتالىپ, 10 جىلىن سىبىردە وتكىزىپ ەلگە ورالدى. سودان بولار 6 ماۋسىمدا ءان دايىن بولدى. سول جىلى «الجير» مۇراجايىنىڭ اشىلۋىنا دايىندىق جۇمىستارىن باسقارىپ جاتقان ءاپريزا قۇسايىنوۆامەن كەزدەسىپ, ءاندى تىڭداتتىم, ءماتىنىن وقىتتىم. ءاندى مادەنيەت دەپارتامەنتىنىڭ باسشىلىعى تىڭداپ, جاقسى قابىلداپ, فيلارمونيانىڭ انشىلەرى نۋرفات حابەرجانۇلى مەن اينۋر باينۋلدينا مۇراجايدىڭ اشىلۋ راسىمىنە دايىنداپ ورىندادى.
بىراق ءاندى جەتىلدىرۋ ماقساتىندا ىزدەنىس توقتاتىلمادى. ىزدەنىس جولىندا 2009 جىلى ونەر اكادەمياسىن بىتىرگەن جاس, قوڭىر داۋىستى ءانشى ازامات جىلتىركوزوۆتى تاعدىر كەزدەستىردى. ءاندى الىپ, 3-4 اي بويىنا ءسىڭىرىپ, جۇرەگىنەن وتكىزگەن ءان, اقىن مەن سازگەردىڭ ويىن جەتىلدىرە جەتكىزگەن تۋىندى بولىپ شىقتى. بۇگىنگى كۇنى ەلىمىزدىڭ وبلىستىق تەلەديدارلارى مەن ورتالىق «حابار» مەدياحولدينگى جانە «قازاقستان» تەلەراديو كورپوراتسياسى كەزىندە كورسەتتى. 2010 جىلى مۇراجايدى سول جىلدارى باسقارعان بولات جۇنىسبەكوۆتىڭ قولداۋىمەن بەينەبايان ءتۇسىرىلىپ, كليپ بولىپ شىقتى. 31 مامىردا تۇساۋكەسەرىنە قاتىسامىن دەپ دايىندالعان اقىن-اعامىز 4 ساعات عۇمىرى جەتپەي دۇنيەدەن وزدى. ءوزى كەتتى – ءانى قالدى. تاعدىر…
ەرسايىن نارىمباەۆ
