ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ كونتسەرت زالىندا «ەسىڭە مەنى العايسىڭ» اتتى مۇقاعالي ماقاتاەۆتىڭ شىعارماشىلىعىنا ارنالعان ءان-جىر كەشى ءوتتى.
كونتسەرت شىمىلدىعى ايگىلى كومپوزيتور تۇرسىنعازى راحيموۆتىڭ مۇقاعالي ماقاتاەۆتىڭ سوزىنە جازىلعان «قازاعىم-اي» انىمەن «قازاقستان داۋىسى» مەگاجوباسىنىڭ جەڭىمپازى مۇراتبەك حايرولدا اشىپ بەردى. ءارى قاراي اقىننىڭ باسقا دا سوزىنە جازىلعان اندەرى ورىندالىپ, كەشتىڭ كوركىن قىزدىردى.
ال كەش قوناقتارى قر ەڭبەك سىڭىرگەن ءارتىسى, «پاراسات», «قۇرمەت» وردەندەرىنىڭ يەگەرى مايرا يلياسوۆا, قر ەڭبەك سىڭىرگەن قايراتكەرلەرى سۆەتا ايتباەۆا, ارايلىم راحىم, مادەنيەت سالاسىنىڭ ۇزدىگى التىنشاش مۇقاتاەۆا, حالىقارالىق جانە رەسپۋبليكالىق بايقاۋلاردىڭ لاۋرەاتتارى زارينا وماروۆا, اكىمحان ماجەنوۆ, ايدىن جۇماباي, قىمبات جامبىلبەك, پاراسات وتان قاتارلى انشىلەر كورەرمەننىڭ ايىرىقشا ىقىلاسىنا بولەنسە, «Alem» زاماناۋي بي بالەتى مەن «اينالايىن» بالالار حورى اسا جوعارى دەڭگەيدە ونەر كورسەتتى. ال قاتىسۋشىلار قازاق اقىندارىنىڭ پايعامبارىنا اينالعان مۇقاعاليداي اقىننىڭ ارتىنا قالدىرعان مۇراسىنىڭ يگىلىگىن بولاشاق ۇرپاقتار دا كورە بەرەتىنىنە سەنىم ءبىلدىرىپ, تالانت يەسىنىڭ تاۋ تۇلعاسى ەشقاشان الاسارمايتىنىن ايتتى.
– از عۇمىرىندا جازعان 1834 ولەڭىمەن ميلليونداعان جۇرەكتى جاۋلاپ الىپ, بىردە جىلاتقان, بىردە قۋانتقان مۇقاعالي ءالى كۇنگە دەيىن حالىقپەن بىرگە جاساپ كەلەدى. نەبارى 45 جىل عۇمىر كەشكەن اقىننىڭ 100-گە جۋىق ولەڭىنە ءان جازىلعان ەكەن. ول – شىن مانىندە قازاق پوەزياسىنا جاڭا لەپ, جاڭا ءۇن قوسقان تاۋداي تۇلعا. ءوز زامانىندا لايىق باعاسىن الا الماسا دا, ونىڭ مارتەبەسىن ولەڭى ءالى كۇنگە دەيىن بيىككە كوتەرىپ كەلەدى. ونىڭ سوزىنە جازىلعان اندەر ءالى كۇنگە دەيىن ءوز ومىرشەڭدىگىن جوعالتپاي كەلەدى. ءبىر سوزبەن ايتقاندا, قازاق بار دا, قارا ولەڭ پاتشاسى بولعان مۇقاعالي ماڭگى جاساي بەرەدى, – دەيدى حالىقارالىق بايقاۋلاردىڭ لاۋرەاتى پاراسات وتان.
ءيا, ۇلى اقىننىڭ ومىرگە كەلگەنىنە 93 جىل تولۋ قارساڭىندا ءوتىپ جاتقان بۇل كونتسەرت كورەرمەندەردىڭ رۋحاني ساناسىن ءبىر سىلكىندىرىپ تاستادى.
شاپاعات ءابدىر
