دۇنيەجۇزىلىك ناشاقورلىققا قارسى كۇرەس كۇنىنە وراي استانا قالاسىنداعى ماحامبەت وتەمىسۇلى اتىنداعى وقۋشىلار سارايىندا «استانا – ەسىرتكىسىز قالا» باعىتىندا ءىس-شارا ۇيىمداستىرىلدى.
اكتسيانى سارىارقا اۋدانى اكىمدىگىنىڭ اپپاراتى, جەرگىلىكتى پوليتسيا قىزمەتى باسقارماسى, ءماسليحات دەپۋتاتى داۆيد لوريا, ۇكىمەتتىك ەمەس ۇيىمدار وكىلدەرى, «استانا جاستارى» جاستار رەسۋرستىق ورتالىعى ۆولونتەرلەرى استانا قالاسى پد ەسىرتكى قىلمىسىنا قارسى ءىس-قيمىل باسقارماسىمەن بىرلەسىپ وتكىزدى. ءىس-شارا بارىسىندا عيماراتتار قابىرعاسىنداعى ەسىرتكى ساتۋ تۋرالى مالىمەت بار جازۋلار ءوشىرىلدى.
ەسىرتكى قىلمىسىنا قارسى ءىس-قيمىل باسقارماسىنىڭ باستىعى رۋستام عازيزوۆ ناشاقورلىققا جانە ەسىرتكى بيزنەسىنە قارسى كۇرەس ماسەلەلەرى قوعامنىڭ تۇراقتى دامۋىنىڭ شارتتارىنىڭ ءبىرى ءارى وعان قارسى ءىس-قيمىلدا ەلوردالىق پوليتسيالاردىڭ جۇمىسى ەرەكشە ماڭىزعا يە ەكەنىن اتاپ ءوتتى.
– پوليتسيا دەپارتامەنتى ينتەرنەت-رەسۋرستار ارقىلى بايلانىسسىز جەتەتىن ەسىرتكىنىڭ وتكىزۋ فاكتىلەرىن, جەتكىزۋ ارنالارىن, ونىڭ ىشىندە سينتەتيكالىق تۇرلەرىن انىقتاۋعا ەرەكشە نازار اۋدارادى. جىل باسىنان بەرى, بەس ايدىڭ قورىتىندىسى بويىنشا پوليتسيا دەپارتامەنتىنىڭ بولىمشەلەرى 528 قىلمىستىق-قۇقىق بۇزۋشىلىق ءىسىن قوزعادى. ونىڭ ىشىندە 173 قىلمىستىق ءىس بولسا, ونىڭ 132-ءسى ەسىرتكى ساتۋمەن اينالىساتىن ادامدارعا قاتىستى. سونىمەن قاتار زاڭسىز اينالىمنان 62 كەلى ءتۇرلى ەسىرتكى زاتى تاركىلەنىپ, 2022-2024 جىلدار كەزەڭىندە ەلوردا اۋماعىندا 9 ناركولابوراتوريا قىزمەتىنىڭ جولى كەسىلدى, – دەدى پوليتسيا وكىلى.
باس قالا اۋماعىندا ەسىرتكىنىڭ سينتەتيكالىق تۇرلەرىمەن بايلانىستى قۇقىق بۇزۋشىلىقتىڭ 206 فاكتىسى انىقتالعان. الايدا قالا تۇرعىندارى بەلسەندىلىگىنىڭ ارقاسىندا 50 ەسىرتكى سايتى بۇعاتتالعان جانە ونى ساتاتىن ينتەرنەت-دۇكەندەردىڭ جارناماسى بار گراففيتي جويىلعان.
شاپاعات ءابدىر
