استانادا بەلگىلى قالامگەر, قوعام قايراتكەرى ەرجۇمان سمايىل
تۇرعان ءۇيدىڭ قابىرعاسىنا ەسكەرتكىش-تاقتا ورناتىلدى. باق سالاسىنداعى پرەزيدەنت سىيلىعىنىڭ تۇڭعىش لاۋرەاتى, قازاقستاننىڭ ەڭبەك سىڭىرگەن قايراتكەرى, كەزىندە «Egemen Qazaqstan» گازەتىن باسقارعان ەرجۇمان سمايىل استانا قالاسىنداعى «سامال» شاعىن اۋدانىنداعى ۇيدە تۇرعان ەدى.
ەسكەرتكىش-تاقتانى ورناتۋ راسىمىنە «Egemen Qazaqstan» گازەتىنىڭ ۇجىمى, ارداگەر جۋرناليستەر, ەرجۇمان سمايىلدىڭ وتباسى, تۋعان-تۋىستارى قاتىستى.
– ەرجۇمان اعامىز – «گازەتچيك» ۇعىمىن جوعارى بيىككە كوتەرگەن ادام. سول ارقىلى ماماندىقتىڭ مارتەبەسىن اسىردى. ول پروزاعا دا بارعان جوق, باسقا جانرلارعا دا قىزىققان جوق, ءتىپتى ەرەكەڭنىڭ العاشقى كىتابى جاسى ەلۋدەن اسقاندا جارىق كوردى. سوندا دا ەراعا ەرەكشە قۇرمەتتىڭ يەسى بولدى. ۇيىمداستىرۋشىلىق تالانتىمەن, وزگەگە بولسىن دەگەن وزگەشە جومارت جۇرەگىمەن, جاستارعا دەگەن قامقورلىعىمەن كوزگە ءتۇستى. بار ءومىرىن جۋرناليستيكاعا, گازەتتىڭ قارا جۇمىسىنا ارناۋمەن ءوتتى. سويتە ءجۇرىپ باق سالاسىناداعى پرەزيدەنت سىيلىعىنىڭ تۇڭعىش لاۋرەاتى اتاندى, – دەدى س.ابدراحمانوۆ.
جۋرناليستيكا ارداگەرى جارىلقاپ بەيسەنبايۇلى جاستار گازەتى «لەنينشىل جاسقا» قاتار كەلگەندەرىن, ەرجۇمان سمايىلدىڭ كەلە سالا ءوزىنىڭ ۇيىمداستىرۋشىلىق قابىلەتىمەن, ىسكەرلىگىمەن ەرەكشەلەنگەنىن جەتكىزدى.
– «لەنينشىل جاستاعى» مىقتى اۋدارماشىلار باسپا سالاسىنا اۋىسىپ كەتكەن كەز ەدى. ەرجۇمان كەلە سالىپ, بىردەن اۋدارما ءىسىن الىپ كەتتى. ءتىپتى ءماتىندى بىردەن «ديكتوۆكا» جاساي وتىرىپ, اۋدارىپ تاستايتىن. شارشامايتىن, تالمايتىن ەرجۇمان «ەگەمەندە» دە قارا جۇمىستى اتقارۋشى ەدى. تۇنىمەن كەزەكشىلىكتە بولسا دا, تاڭەرتەڭ جۇمىستا وتىراتىن. ءبىز سوعان تاڭعالاتىنبىز, – دەدى ج.بەيسەنبايۇلى.
سەناتور نۇرتورە ءجۇسىپ ەرجۇمان سمايىلدىڭ وتە ساۋاتتى رەداكتور بولعانىنا توقتالسا, «Egemen Qazaqstan» گازەتىنىڭ باس رەداكتورى عابيت ىسكەندەرۇلى ەر اعانىڭ مىنەزدى ادام بولعانىن, سول مىنەزىنىڭ ارقاسىندا ەلگە قادىرلى بولعانىن جەتكىزدى.
