استانادا مەكتەپىشىلىك لاگەرلەردىڭ ەكىنشى ماۋسىمى اشىلدى. وسىعان وراي, پرەسس-تۋر ۇيىمداستىرىلدى. ونىڭ اياسىندا №79 مەكتەپ-ليتسەي مەن №32 مەكتەپ-گيمنازياعا ات باسىن بۇردىق.
استانا قالاسى ءبىلىم باسقارماسى قوسىمشا ءبىلىم بەرۋ جانە تاربيە جۇمىسى ءبولىمىنىڭ باسشىسى گۇلفارا سارامبەتوۆا وقۋشىلاردىڭ جاقسى دەمالىپ, وي ءورىسىن كەڭەيتۋگە, لاگەردە ءار كۇندى كوڭىلدى وتكىزۋىنە تىلەكتەس ەكەنىن جەتكىزدى. سالتاناتتى اشىلۋ راسىمىندە قۇتتىقتاۋ ءسوز سويلەگەن №79 مەكتەپ-ليتسەي ديرەكتورى قۇرالاي مۇقۇشەۆا بالدىرعاندارعا ساتتىلىك تىلەدى.
– قادىرلى وقۋشىلار, سىزدەر لاگەردە قازاق حالقىنىڭ مادەنيەتىمەن, داستۇرىمەن, تۇرمىس-تىرشىلىگىمەن, انا ءتىلىنىڭ ءتول ەرەكشەلىگىمەن تانىساسىزدار. سونىمەن قاتار مۇندا سىزدەردى جارقىن اسەرلەر, جاعىمدى ەموتسيالار, ەكسكۋرسيالار مەن جورىقتار كۇتىپ تۇر. وعان قاتىسۋ ارقىلى ينتەللەكتۋالدىق جانە شىعارماشىلىق قابىلەتتى دامىتاسىزدار. سونداي-اق اكتەرلىك شەبەرلىك, مودەلدەۋ, موبيلوگرافيا جانە بلوگ جۇرگىزۋ ساباعى دا وقىتىلادى, – دەدى قۇرالاي بالعابايقىزى.
اتالعان مەكتەپتە «جۇلدىز» لاگەرى, «دارىندىلار جازى» لاگەرى, IT لاگەر, تۋريستىك لاگەر, ەتنولاگەر ورنالاسقان.
بالالار اعىلشىن ءتىلى, ءان-كۇي, قازاق ءتىلى, ديزاينەر-مودەلەر, شىعارماشىلىق, STEM ماماندىقتار سياقتى ۇيىرمەلەرگە قاتىسادى. ءار ۇيىرمەنىڭ بەرەر تاربيەسى مەن ۇيرەتەرى مول. مىسالى, قازاق ءتىلى ۇيىرمەسىنە بارعانىمىزدا, بالالار قازاق ءتىلىنىڭ قۇندىلىعى تۋرالى ساباق الىپ, ەرتەگى جاتتاپ, ماقال-ماتەل ايتىپ, جۇمباقتار شەشەدى. STEM ۇيىرمەسىندەگى وقۋشىلار تەحنولوگيا ءتىلىن مەڭگەرىپ, روبوت قۇراستىرىپ, كومپيۋتەرمەن جۇمىس ىستەيدى. ءان الەمى ۇيىرمەسىندە بالالار قازاقتىڭ قارا دومبىراسىن سايراتىپ, حالىق اندەرىن قالىقتاتسا, ەتنولاگەردەگى بالدىرعاندار قازاقتىڭ ۇلتتىق تاعامدارىن ازىرلەپ, ادەت-عۇرىپ, سالت-ساناسىمەن تانىسادى. شىن مانىندە, سالت-داستۇرلەرىمىزدىڭ جاس ۇرپاق ساناسىندا قايتا جاڭعىرۋى بولاشاعىمىزدىڭ نۇرلى ەكەنىن كورسەتەدى.
ال №32 مەكتەپ-گيمنازيا لاگەرىنىڭ وزگەشەلىگى سول, بالالاردى سپورتپەن اينالىسۋعا شاقىرادى ءارى وسى باعىتتا ويىندار ويناتىپ, جاتتىقتىرادى.
جالپى بيىل قالالىق ءبىلىم بەرۋ ۇيىمدارىنىڭ بازاسىندا مەكتەپ جانىنداعى 97 لاگەر, وقۋشىلار قىزىققان ءارتۇرلى باعىت بويىنشا 75 بەيىندىك لاگەر جۇمىس ىستەپ تۇر. قالالىق ءبىلىم باسقارماسىنىڭ مالىمەتىنشە, بۇل لاگەرلەر 1-10-سىنىپتىڭ 200 مىڭنان استام وقۋشىسىن قامتىپ وتىر.
شاپاعات ءابدىر
