استانا قالاسى اكىمدىگىنىڭ مۋزىكالىق جاس كورەرمەن تەاترى «گاۋھارتاس» مۋزىكالىق دراماسىن ساحنالاعانىنا ءبىر جىل تولدى. حالىقتىڭ كوزايىمىنا اينالعان «گاۋھارتاس» مۋزىكالىق دراماسى كورەرمەن نازارىنا 165 رەت ۇسىنىلىپ, ەلىمىزدىڭ تەاتر كەڭىستىگىندە رەكوردتىق كورسەتكىشكە قول جەتكىزدى,دەپ حابارلايدى astana-akshamy.kz.
سپەكتاكلدىڭ ءار قويىلىمى انشلاگپەن ءوتىپ, بۇگىنگى تاڭعا دەيىن 68 مىڭعا جۋىق كورەرمەن تاماشالادى. قويىلىم اقتاۋ, اتىراۋ, ورال, تالدىقورعان, الماتى, تاراز, شىمكەنت, تۇركىستان قالالارىنىڭ تەاترلارىندا كورسەتىلسە, بيىل دا ارتىستەردىڭ باسقا وڭىرلەردەگى گاسترولدىك ساپارى جوسپارلانىپ وتىر.
مۋزىكالىق درامانىڭ اۆتورى قازاقستاننىڭ ەڭبەك ەرى, مەملەكەتتىك سىيلىقتىڭ يەگەرى, جازۋشى, دراماتۋرگ دۋلات يسابەكوۆ, قويۋشى رەجيسسەرى جانە ساحنالىق نۇسقاسىن جاساعان قازاقستاننىڭ ەڭبەك سىڭىرگەن قايراتكەرى اسحات ماەميروۆ.
«گاۋھارتاس» مۋزىكالىق دراماسى «UMAI-2023» ۇلتتىق جۇلدەسىنىڭ «تەاتر ونەرى» نوميناتسياسى بويىنشا «ۇزدىك سپەكتاكل» اتاندى.
سونداي-اق اتالعان مۋزىكالىق درامادا سالتاناتتىڭ ءرولىن سومداعانى ءۇشىن تەاتر اكتريساسى ينابات ريزابەكوۆا رەسپۋبليكالىق «سىنشىلار جۇلدەسى – 2023» ماراپاتتاۋ كەشىندە «جىل اكتريساسى-2023» نوميناتسياسىنا يە بولدى. «گاۋھارتاس» مۋزىكالىق دراماسىنداعى حالىقتىڭ «قۇداشا» ءانى مەن ءبيى ساناۋلى ساعاتتا الەۋمەتتىك جەلىلەردە ميلليوننان اسا قارالىم جيناپ, جاستار اراسىندا ترەندكە اينالدى. ءتىپتى, قىتاي ەلىندەگى جاستاردىڭ بەينەجازباسى دا كەڭىنەن تارادى.
