استانا قالاسى اكىمدىگىنىڭ مۋزىكالىق جاس كورەرمەن تەاترى مەن اباي اتىنداعى سەمەي تەاترى شىعارماشىلىق ارىپتەستىك ورناتتى.
استانا قالاسى اكىمدىگىنىڭ مۋزىكالىق جاس كورەرمەن تەاترىنىڭ ديرەكتورى اسحات ماەميروۆ پەن اباي اتىنداعى سەمەي تەاترىنىڭ ديرەكتورى امانگەلدى باحتينوۆ كاسىبي ساحنا ۇجىمدارى اراسىندا شىعارماشىلىق ۇدەرىستى دامىتۋ باعىتىندا, بىرلەسكەن جوبالاردى ىسكە اسىرۋ جولىندا بىرقاتار كەلىسىمگە قول جەتكىزىپ, ارىپتەستىك پەن ىنتىماقتاستىقتى دامىتۋ بويىنشا مەموراندۋمعا قول قويدى.
امانگەلدى باحتينوۆ مۋزىكالىق جاس كورەرمەن تەاترىندا ەڭبەك ەتىپ جۇرگەن جاس ارتيستەرمەن وي ءبولىسىپ, پىكىرلەسىپ, ءوز تىلەگىن جەتكىزدى.
تەاتر كەڭىستىگىندەگى بىرلەسكەن ارىپتەستىك جوبالار, شىعارماشىلىق قارىم-قاتىناس وتاندىق مادەنيەتىمىزدىڭ وركەندەۋىنە سەپتىگىن تيگىزەرى ءسوزسىز.
استانادا ەكى جارىم جىل ۋاقىت ىشىندە كورەرمەن كوڭىلىنەن شىققان 17 قويىلىمدى قويىپ, ەلوردا عانا ەمەس, ەلىمىزدىڭ مادەني ومىرىندە وزىندىك ورنىن ايشىقتاپ العان ونەر ورداسى – ەلوردالىق مۋزىكالىق جاس كورەرمەندەر تەاترى «استانادان سەمەيگە سالەم!» اتتى شىعارماشىلىق ساپارى بارىسىندا 3 ماۋسىمدا سەمەي قالاسىنداعى اباي اتىنداعى تەاتردا دۋلات يسابەكوۆتىڭ «گاۋhارتاس» اتتى شىعارماسىن ساحنالادى. قويىلىم تاعى دا انشلاگپەن ءوتتى. بيلەت ساناۋلى مينۋت ىشىندە ءوتىپ كەتتى. سەمەي جەرىندە دە سپەكتاكلدى كوپتەگەن كورەرمەن تاماشالاپتى.
قازاق ونەرىندە ەرەكشە قولتاڭباسىمەن كورىنىپ, شاكىرتتەرىن شىعارماشىلىقتىڭ شىڭىنا جەتەلەگەن رەجيسسەر اسحات ماكسيمۇلى ساحنالاعان ادامي سەزىمدەرگە, شىنايى ماحابباتقا قۇرىلعان دۋلات يسابەكوۆتىڭ «گاۋhارتاس» اتتى شىعارماسى بۇگىنگە دەيىن 205 مارتە كورەرمەن نازارىنا ۇسىنىلدى. وتباسى قۇندىلىعىن دارىپتەگەن دراما وتكەن جىلدىڭ ۇزدىگى دەپ تانىلىپ, مادەنيەت جانە اقپارات مينيسترلىگى ۇيىمداستىرعان ونەر سالاسىنداعى «Umai-2023» ۇلتتىق سىيلىعىن يەلەنگەنى ءمالىم.
