استانا قالاسى اكىمدىگىنىڭ مۋزىكالىق جاس كورەرمەن تەاترىنىڭ «گاۋھارتاس» قويىلىمى «Qazaqstan Ticketon Awards – 2024» سىيلىعىن يەلەندى.
ناقتىراق ايتقاندا, اتالعان قويىلىم قازاقستانداعى ونەر, مادەنيەت جانە سپورت سالاسىنداعى ۇزدىكتەردىڭ «Ticketon Awards – 2024» سىيلىعىنىڭ جەڭىمپازدارى قاتارىنان تابىلدى. مەملەكەتتىك تەاترلار اراسىندا د.يسابەكوۆتىڭ «گاۋھارتاس» مۋزىكالىق دراماسى (رەجيسسەرى ا.ماەميروۆ) تيكەتون بويىنشا «جىلدىڭ ۇزدىك سپەكتاكلى» اتاندى.
بۇل جۇلدە – وتاندىق تەاترلار اراسىندا ءبىر جىل ىشىندە 200-دەن استام رەكوردتىق كورسەتىلىم جاساپ, كورەرمەن كوزايىمىنا اينالعان, ەلىمىزدىڭ 13 قالاسىندا انشلاگپەن ءوتىپ جاتقان استانا قالاسى اكىمدىگىنىڭ مۋزىكالىق جاس كورەرمەن تەاترى رەپەرتۋارىنداعى «گاۋھارتاس» مۋزىكالىق دراماسىنىڭ ءبىر جىل ىشىندەگى الىپ جاتقان ءتورتىنشى ماراپاتى.
«Ticketon Awards – 2024» – كينو, مادەنيەت جانە سپورت سالاسىنداعى ۇزدىكتەردى انىقتايتىن ەلىمىزدەگى جەتىنشى سىيلىق. وعان قاتىساتىن ۇمىتكەرلەر اراسىنان مىقتىلاردى كورەرمەن ارنايى سايتتا ونلاين داۋىس بەرۋ ارقىلى انىقتايدى. قازاق تەاتر سۇيەر قاۋىمىنىڭ كوزايىمىنا اينالعان قويىلىمنىڭ جۇلدەسىن الۋعا الماتىداعى ماراپاتتاۋ جيىنىنا بەلگىلى تەاتر جانە كينو اكتەرى, «دارىن» سىيلىعىنىڭ يەگەرى ايان تولەپبەرگەن بارىپ, قاتىستى. ول «گاۋھارتاستا» باستى كەيىپكەر, سالتاناتتىڭ جارى تاستاننىڭ ءرولىن سومدايدى.
انەل امانگەلديەۆا,
ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
