قازاقستانداعى بۇۇ دامۋ باعدارلاماسى قر مادەنيەت جانە اقپارات مينيسترلىگىنىڭ قولداۋىمەن باق وكىلدەرىن «گەندەرلىك پريزما ارقىلى قۇقىقتىق ساراپتاما ساپاسىن ارتتىرۋ: تەوريادان پراكتيكاعا» تاقىرىبىندا 2024 جىلعى 3 ماۋسىمدا استانا قالاسىندا وتەتىن ترەنينگكە قاتىسۋعا شاقىرادى, دەپ حابارلايدى astana-akshamy.kz.
ءىس-شاراعا قاتىسۋشى ايەل دەپۋتاتتار, مەملەكەتتىك ورگاندار مەن ۇەۇ وكىلدەرىنە ءادىل ەنەرگەتيكالىق اۋىسۋ جانە تسيفرلىق ترانسفورماتسيا سالاسىن رەتتەيتىن زاڭنامادا گەندەرلىك ساراپتامانى قولدانۋ بويىنشا تۇسىنىكتەرى مەن داعدىلارىن تەرەڭدەتۋ, سونداي-اق حالىقارالىق تاجىريبەلەرمەن جانە كەيستەرمەن تانىسۋعا مۇمكىندىك بەرىلەدى. دۇنيەجۇزىلىك بانكتىڭ مالىمەتى بويىنشا, ايەلدەر ءالى دە ەرلەرگە قولجەتىمدى قۇقىقتاردىڭ ۇشتەن ەكىسىنەن ازىنا يە, اسىرەسە زورلىق-زومبىلىق پەن بالا كۇتىمى قاۋىپسىزدىگى اسپەكتىلەرىندە. ەشبىر ەل, ونىڭ ىشىندە ەڭ باي ەل دە ايەلدەرگە تەڭ مۇمكىندىكتەر بەرمەيدى. بۇل ولاردىڭ الەمدىك ەكونوميكاعا قاتىسۋىن جانە وزدەرىنىڭ دە, وتباسىلارىنىڭ دا, جەرگىلىكتى قاۋىمداستىقتاردىڭ دا ءال-اۋقاتىن جاقسارتۋعا قوسقان ۇلەسىن شەكتەيدى.
قازاقستاندا وزەكتى گەندەرلىك پروبلەمالاردىڭ قاتارىندا ساياسي سالادا جانە باسشىلىق لاۋازىمداردا ايەلدەردىڭ جەتكىلىكسىز وكىلدىگى, ەڭبەكاقى تولەۋدەگى گەندەرلىك الشاقتىق, ەڭبەك نارىعىنداعى كولدەنەڭ جانە تىك گەندەرلىك سەگرەگاتسيا, زاڭنامانىڭ جەتىلمەگەندىگى, تۇرمىستىق زورلىق-زومبىلىق پەن قۋدالاۋ (حاراسسمەنت) بايقالادى. ورتالىق جانە جەرگىلىكتى اتقارۋشى بيلىك ورگاندارىندا ايەلدەردىڭ وكىلدىك دەڭگەيى تومەن بولىپ قالۋدا. ايەل مينيسترلەردىڭ ۇلەسى 14,3% قۇرايدى. قر پارلامەنتى ماجىلىسىندەگى ايەل دەپۋتاتتاردىڭ ۇلەسى — 18,3%, ال قر پارلامەنتى سەناتىندا — 22%.
ناعىز ورنىقتى جانە ءادىل ەكونوميكالىق كوشۋدى ىسكە اسىرۋ ءۇشىن قازاقستان ايەلدەردىڭ ساياساتقا جانە شەشىم قابىلداۋعا بەلسەندى قاتىسۋى مەن كوشباسشىلىعىن قامتاماسىز ەتە وتىرىپ, ولاردىڭ ەكونوميكالىق قۇقىقتارى مەن مۇمكىندىكتەرىن كەڭەيتۋگە باسىمدىق بەرۋگە ءتيىس. بۇۇدب ايەلدەردىڭ ەكونوميكالىق دامۋداعى رولىنە, ولاردىڭ ەڭبەك نارىعىنداعى باسەكەگە قابىلەتتىلىگىن ارتتىرۋعا جانە گەندەرلىك ستەرەوتيپتەرمەن كۇرەسۋگە باعىتتالعان گەندەرلىك كۇن ءتارتىبىن ىلگەرىلەتۋدەگى ەل ۇكىمەتىنىڭ كۇش-جىگەرىن قولدايدى. بۇل اسىرەسە ءادىل اۋىسۋ جاڭا جۇمىس ورىندارىن قۇرۋدى جانە تەڭ قۇقىقتار مەن مۇمكىندىكتەردى قامتاماسىز ەتۋدى قامتيتىن تومەن كومىرتەكتى ەكونوميكاعا كوشۋ كونتەكستىندە وزەكتى.
