Maqsut Narikbayev University-دە MIND قولدانبالى عىلىمي-زەرتتەۋ ورتالىعى اشىلدى. عىلىمي وي-تاجىريبەنى «Think & do tank» فورماتىندا بىرىكتىرەتىن الاڭ ەرەكشەلىگى – تەك ۇسىنىس بەرۋ عانا ەمەس, ارەكەت ەتۋگە بىرەگەي مۇمكىندىك جاساۋ.
MIND-تىڭ ۇستانىمى – ورتالىق ازيا مەن جالپى الەمدە تۇراقتى دامۋ ماقساتىنا جەتۋگە ۇمتىلۋ جانە قولدانبالى زەرتتەۋلەر ءۇشىن ساراپشىلاردى بىرىكتىرۋ. سونداي-اق تالداۋ ورتالىعىنىڭ قۇندىلىقتارى جۇرگىزىلىپ جاتقان زەرتتەۋلەردىڭ تاۋەلسىزدىگىنەن, اكادەميالىق ادالدىقتان, ىنتىماقتاستىق پەن سەرىكتەستىكتەن, قوعاممەن بايلانىستان جانە ناتيجەگە قول جەتكىزۋدەن تۇرادى. ماقساتى – تاۋەلسىز قولدانبالى زەرتتەۋ جۇرگىزۋ, ستراتەگيالىق شەشىم قابىلداۋ ساپاسىن دامىتۋ, كەڭەس بەرۋ, ارىپتەستىك ورناتۋ جانە MIND ينستيتۋتسيونالدىق تۇراقتىلىعىن قامتاماسىز ەتۋ.
MIND ورتالىعى – MNU مەن قازاقستان رەسپۋبليكاسى پارلامەنتى سەناتىنىڭ بىرلەسكەن جوبالىق كەڭسەسى, بۇل حالىق پەن بيزنەستىڭ كەڭ توپتارىنىڭ بيلىكتىڭ زاڭ شىعارۋشى تارماعىمەن بايلانىسىن قامتاماسىز ەتەدى جانە وزەكتى زاڭنامالىق باستامالاردى ازىرلەۋگە ىقپال ەتەدى.
عىلىم جانە جوعارى ءبىلىم ءمينيسترى ساياسات نۇربەك ءوز سوزىندە كۇردەلى گەوساياسي, ەكونوميكالىق جانە وڭىرلىك جاعدايلاردا اناليتيكا, ساراپتامامەن جۇمىس ىستەۋدىڭ وزەكتىلىگىن اتاپ ءوتتى. سونداي-اق ول عىلىم جانە جوعارى ءبىلىم مينيسترلىگى MIND عىلىمي-تالداۋ ورتالىعىنىڭ جوبالارى مەن باستامالارىن قولداۋعا دايىن ەكەنىن ايتتى.
ءىس-شارا اياسىندا MIND-ءتىڭ كەيبىر عىلىمي زەرتتەۋلەرىنىڭ ناتيجەلەرى تانىستىرىلدى جانە سوڭىندا عىلىمي ورتالىق بويىنشا ەكسكۋرسيا وتكىزىلدى, ونىڭ بارىسىندا بىرقاتار حالىقارالىق ۇيىمدارمەن, مەملەكەتتىك ورگاندارمەن جانە كۆازيمەملەكەتتىك كومپانيالارمەن كەلىسىم جاسالدى.
Maqsut Narikbayev University باسقارما توراعاسى تالعات نارىكباەۆ ءوز سوزىندە عىلىمي ورتالىقتىڭ اشىلۋىنا كەلگەن بارلىق قاتىسۋشىعا العىس ءبىلدىردى.
– قازىرگى ۋاقىتتا ۋنيۆەرسيتەت وقىتۋشىلىق باعىتتان زەرتتەۋ باعىتىنا كوشۋگە ارنالعان جاڭا دامۋ ستراتەگياسىن ازىرلەدى, ال MIND قولدانبالى عىلىمي-زەرتتەۋ ورتالىعى – وسى ستراتەگيانىڭ اجىراماس بولىگى, – دەدى ول.
MIND تالداۋ ورتالىعىنىڭ جەتەكشىسى التاير احمەتوۆ ءوزىنىڭ قۇتتىقتاۋ سوزىندە قوعامدى, بيزنەستى جانە مەملەكەتتىك ورگانداردى تالقىلاۋعا جانە بىرلەسكەن شەشىمدەردى ازىرلەۋگە تارتۋ ارقىلى «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىراتىنىن اتاپ ءوتتى.
