استانادا «1932-1933 جىلدارداعى اشارشىلىق قۇرباندارىنا تاعزىم» مونۋمەنتالدى كەشەنىنىڭ «قايعى قابىرعاسىنا» گۇل شوقتارىن قويۋ ءراسىمى ءوتتى. اتالعان ءىس-شاراعا استانا قالاسى ىشكى ساياسات باسقارماسىنىڭ باسشىسى نۇرداۋلەت ءالمۇحانوۆ, قالالىق ءماسليحات دەپۋتاتتارى, «اۋىل», «امانات» پارتيالارىنىڭ وكىلدەرى, قۋعىن-سۇرگىنگە ۇشىراعانداردىڭ ۇرپاقتارى جانە ەلوردا تۇرعىندارى قاتىستى.
ميلليونداعان ادامنىڭ قازا بولۋىنا اكەپ سوققان اشارشىلىق قۇربانىنىڭ تىكەلەي ۇرپاعى, رەسپۋبليكالىق ارداگەرلەر ۇيىمى توراعاسىنىڭ ورىنباسارى كوپبولسىن بەكماعانبەتتىڭ ايتۋىنشا, كەڭەس بيلىگىنىڭ سولاقاي ساياساتى سالدارىنان قازاق دالاسىندا بولعان زۇلمات زاماندا ەلىمىزدە 100 مىڭنان اسا ادام ناقاقتان جازالانىپ, قۋعىن-سۇرگىنگە ۇشىرادى, سونىڭ 25 مىڭى اتىلعان ەكەن.
– بۇگىن – ءبىزدىڭ بۇكىل حالقىمىزعا ايتۋلى قارالى كۇن. ونىڭ ىشىندە مەن دە رەپرەسسياعا ۇشىراعاننىڭ تۋعان جيەنىمىن. ءوزىم وسى ماسەلەگە كوپ كوڭىل ءبولىپ, ءارحيۆتى ءبىراز اقتاردىم. وققا ۇشقانداردىڭ دەنى قازاقتىڭ بەتكە ۇستار, كوش باستاۋشى, اعارتۋشى, ۇلتتىڭ كوسەمى بولۋعا لايىقتى الاش ارداقتىلارى ەدى. بۇل ءبىر سۇمدىق, جانتۇرشىگەرلىك كەزەڭ بولدى. جاس ۇرپاق تاريحىمىزدى, وتكەنىمىزدى ءبىلۋى, اتالارىمىزبەن ماقتانۋى كەرەك, – دەدى كوپبولسىن بەكماعانبەت.
جىل سايىن مامىردىڭ سوڭعى كۇنى اشارشىلىق جىلدارىندا قۇربان بولعاندارعا تاعزىم ەتىپ, گۇل شوعىن قويۋعا پارتيا وكىلدەرى دە قاتىسادى.
– اشارشىلىقتا قۇربان بولعان ميلليونداردىڭ رۋحىنا بۇگىنگى بۋىن اتىنان تاعزىم ەتتىك. ءبىزدىڭ مىندەتىمىز – وسى قانقۇيلى جىلداردىڭ وقيعاسى مەن ونىڭ جازىقسىز قۇربانى بولعان الاشتىڭ ارداقتى ۇلدارىنىڭ قازاق تاريحىندا اتقارعان يگى ءىسىن ماڭگى ەستە ساقتاۋ. كەلەر ۇرپاق اتا-بابالارىنىڭ قانداي قاسىرەتتەردى باستان وتكەرگەنىن ءبىلىپ ءجۇرۋى قاجەت, – دەدى «اۋىل» پارتياسى قالالىق فيليالىنىڭ توراعاسى مەيرامباي ورالوۆ.
ءىس-شاراعا قاتىسۋشىلار گۇل شوقتارىن قويىپ, ساياسي قۋعىن-سۇرگىن جانە اشارشىلىق كەزىندە قازا تاپقانداردى ءبىر مينۋت ۇنسىزدىكپەن ەسكە الدى.
