ەلوردادا «جاستار» سارايىندا ەلىمىزدىڭ ەڭ ۇزدىك قولونەر شەبەرلەرىنىڭ تۋىندىلارى قويىلعان «حاس شەبەرلەر» فەستيۆالى تۇڭعىش رەت ۇيىمداستىرىلدى. ءىس-شارا استانا قالاسى اكىمدىگىنىڭ قولداۋىمەن وتكىزىلدى. ون ساۋساعىنان ونەر تامعان حاس شەبەرلەردىڭ قولىنان شىققان جاسىل تۋ ەلىمىزدىڭ ەڭ مىقتىلارى عانا ەنەتىن كينەس رەكوردتار كىتابىنا جازىلدى.
ەل تاريحىندا بۇرىن-سوڭدى بولماعان, جۇزدەگەن ەڭ ۇزدىك قولونەر شەبەرلەرىنىڭ قولىمەن تىگىلگەن جاسىل ءتۇستى تۋدىڭ اتاۋى – «بىرلىك, بەرەكە, مەيىرىمدىلىك» دەپ اتالادى. ول –تابيعاتقا, بولاشاققا تالپىنۋدى بىلدىرەدى.
– بۇل فەستيۆال – قولونەر شەبەرلەرىنىڭ كوپتەن كۇتكەن ەڭبەگىنىڭ ناتيجەسى, كۇنى-ءتۇنى جاساعان جۇمىسىنىڭ جەمىسى. سەبەبى, ءبىرازدان بەرى وسى ءىس-شارانى وتكىزۋگە مۇقيات دايىندالدىق, وسى اۋقىمدى فەستيۆال بيىل ءبىرىنشى رەت وتكىزىلىپ وتىر. جالپى بۇعان دەيىن 2019 جىلى استاناداعى بايقوڭىر اۋدانىنىڭ اكىمدىگىمەن قولونەرشىلەر ءىس-شاراسى العاش رەت ۇيىمداستىرىلعان بولاتىن. ماقساتى – كرەاتيۆتى يندۋستريانى دامىتۋ, وتاندىق ءونىمدى قولداۋ, بولاشاققا قولونەر بۇيىمدارىن, شەبەرلىك ساباقتارىن ناسيحاتتاۋ. وزدەرىڭىزگە بەلگىلى, قازىر كرەاتيۆتى ەكونوميكا ەلىمىزدىڭ نارىعىندا پەرسپەكتيۆالى باعىتتاردىڭ ءبىرى رەتىندە قاراستىرىلىپ وتىر. ماڭىزدى ءىس-شاراعا ەلىمىزدىڭ تۇكپىر-تۇكپىرىنەن 300-گە جۋىق ناعىز ءوز ءىسىنىڭ شەبەرلەرى كەلدى. فەستيۆالعا ۇلكەندەر جاعى عانا ەمەس, قولىنان ءىس كەلەتىن جاستار, جاسوسپىرىمدەر دە قاتىسۋدا. ۇلتتىق كيىم كيىنىپ, اشەكەيلەر تاققان شەبەرلەر ءوز ونىمدەرىن ساتۋ ارقىلى قارجىلىق ساۋاتىن ارتتىرىپ, قوماقتى تابىسقا يە بولا الادى. تابان اقى, ماڭداي تەرىمەن ەڭبەكپەن جاسالعان دۇنيەلەرىن ساتۋ ارقىلى كەلەشەگىنە سەنىممەن قاراۋىنا مۇمكىندىك بەرۋ. قاۋىمداستىق وسى دەمالىستاعى مەرەكە كۇندەرى كورمە-جارمەڭكە وتكىزۋ ارقىلى قولونەر شەبەرلەرىنىڭ وزدەرى جاساعان دۇنيەلەرىن ناسيحاتتاپ, وتاندىق ءونىمدى قولدايدى, سونداي-اق شەبەرلەردىڭ قولىنان شىققان جاسىل ءتۇستى تۋدى قازاقستاننىڭ رەكوردتار كىتابى كينەس-كە ەنگىزىلدى. ءبىزدى قولداپ, ەلوردانىڭ قاق ورتاسىنان عيمارات, ورىن بەرگەن استانا قالاسىنىڭ اكىمدىگىنە, قالا اكىمىنىڭ ورىنباسارى ەسەت بايكەنگە, تاعى باسقا قولداعان ادامدارعا العىسىمىز شەكسىز,-دەيدى قازاقستاننىڭ «حاس شەبەرلەر» وتاندىق ونىمدەردى دامىتۋ قاۋىمداستىعىنىڭ توراعاسى, فەستيۆالدى ۇيىمداستىرۋشىلاردىڭ ءبىرى – زيۋار جۇمانوۆا.
ەڭبەك ادامىنىڭ ەرەكشە تۋىندىلارىن ۇسىنعان فەستيۆال, كورمە-جارمەڭكە ءۇش كۇن بويى «جاستار» سارايىندا تاڭعى وننان باستاپ كەشكە دەيىن جالعاستى. الداعى ەكى كۇن بويى قولونەر شەبەرلەرىنىڭ جۇمىستارى قويىلعان كورمە-جارمەڭكەدە قولونەر شەبەرلەرى جۇدىرىقتاي جۇمىلىپ, تابيعاتتى قۇرمەتتەپ, سالت-ءداستۇرىمىزدى, ۇلتتىق بۇيىمداردى قادىرلەۋ ارقىلى حالقىمىزدىڭ ىنتىماق-بىرلىككە, ەلدىككە اڭسار پەيىلىن ايقىن تانىتا ءتۇستى. اسىرەسە, ەرەكشە جانداردىڭ, ەرەكشە بالالاردىڭ قولىمەن جاسالعان كادەسىيلار, تىگىلگەن, توقىلعان بۇيىمدار, سالىنعان سۋرەتتەر, جارقىراعان تۋىندىلار كەلۋشىلەردى تولقىتتى. ۇيىمداستىرۋشىلاردىڭ ايتۋىنشا, كورمە-جارمەڭكەدەن تۇسكەن قاراجاتتىڭ 10%-ى قارتتار ۇيىنە بەرىلەدى. ىسمەر ماماندار شەبەرلىك ساباقتارىن وتكىزىپ, ۇمىت بولعان سالت-داستۇرلەر بويىنشا ۇلتتىق تانىمدىق, قىزىقتى ويىندار ۇيىمداستىردى. ەلورداداعى شەبەرلەر باسقوسۋىندا استانا قالاسى مەكتەپتەرى وقۋشىلارىنىڭ قولونەر بۇيىمدارىدا كورمەگە قويىلدى.
استاناداعى جالپى ءبىلىم بەرەتىن حاليفا يبن زايد ءال ناحايان اتىنداعى № 84 مەكتەپ-ليتسەيىنىڭ وقۋشىسى 15 جاستاعى سىمبات ءادىلحاننىڭ (جەتەكشىسى – نۇرجامال مۋسينا) قازاق قىزىنىڭ اپپاق قوس ەتەك كويلەگىنە جاساعان اشەكەيلەرى – كۇمىستەن جاسالعان زەرگەرلىك بۇيىمدارى تاڭداي قاققىزدى. ورىنداۋ تەحنيكاسى بويىنشا ول بۇيىمدار فولگامەن جاسالعان ەكەن.
ەلىمىزدىڭ بارلىق وڭىرىنەن كەلگەن شەبەرلەردىڭ استاناداعى تاماشا كورمەسى, ءسان-fashion جانرىنداعى كوركەم دۇنيەلەر كورگەن جاندى ءتانتى ەتتى. اسىرەسە, اباي, تۇركىستان, قىزىلوردا, جامبىل, باتىس قازاقستان, اتىراۋ, ماڭعىستاۋ, اقتوبە, اقمولا, تاعى باسقا وڭىرلەردەن كەلگەن حاس شەبەرلەر قولىمەن جاساعان تۋىندىلارىن كوپشىلىككە ۇسىندى.
حالىقارالىق قولونەر شەبەرلەرى بايقاۋىنىڭ جەڭىمپازى بۇلبۇلقان سەرعازى اپامىزدىڭ تىككەن كيمەشەكتەرى سونادايدان كوز تارتادى. ءساندى ساۋكەلە مەن كيەلى كيمەشەك شەبەرلەر بايقاۋىندا باس جۇلدەنى يەمدەنگەن شەبەر انالاردىڭ اق كيمەشەگىن دارىپتەپ, ونى اسىل تاستارمەن, ءتۇرلى مونشاق اشەكەيلەرمەن كوركەمدەگەن ەكەن.
جۇننەن توقىلعان ورامال, ءشايى ماتاعا كەستەلەنىپ باسىلعان ءجۇن, كەۋدەشەلەردى, سومكەنىڭ ويۋلانعان بەزەندىرىلۋى كەرەمەت اسەر ەتتى. ونىمدەردى جۇننەن توقىعان اۋلەتتىڭ ءۇشىنشى ۇرپاعىمىز دەگەن گۇلنار شەبەردىڭ قولىنان شىققان دۇنيەلەر ناعىز بابالاردىڭ وزىندەي, كونەنىڭ كوزىندەي ايرىقشا اسەر قالدىرعانى راس.
– مەن جاسىمنان كيىز ءۇيدىڭ ىشىندە, كيىزدىڭ ۇستىندە ءوستىم. اقمولا وبلىسىنىڭ اۋىلىنداعى بالالىعىم اتتىڭ ۇستىندە, ءجۇن توقىپ, كيىز باسۋمەن ءوتتى. اكەم تىگىنشى بولدى, تۋىسقاندارىم شەتىنەن ونەرلى, سۋرەتشى, ىسمەر بولدى. مەن حورەوگرافيا ماماندىعىن بىتىرسەم دە, قازىر وسى اتا كاسىپتى جالعاستىرۋدى ماقسات ەتتىم دەيدى ول.
ونىڭ اسىرەسە, ءشايى ماتانىڭ ۇستىنە جۇننەن وياۋ باسقان شەبەردىڭ ونەرى تاڭقالدىردى, بۇل ءونىمدى شەتەلگە وتاندىق برەند رەتىندە ۇسىنىپ, شاعىن كاسىپورىندار اشىپ, ەلىمىزدە جاڭا جۇمىس ورىندارىن اشۋعا بولار ەدى.
– سۇيەكتەن, تەرىدەن, كيىزدەن, باعالى تاستاردان, مەتالداردان جاسالاتىن اتا-بابالارىمىزدىڭ حاس ونەرىن دامىتىپ, ۇرپاقتان-ۇرپاققا جالعاستىرۋ, ۇلتتىق بۇيىمداردىڭ جاسالۋ جولدارىن جاستارعا ميراس ەتىپ قالدىرۋ – باستى ماقساتىمىز. ءوزىمىزدىڭ ونىمدەردى قولداۋ ارقىلى ىشكى نارىقتى, ەكونوميكامىزدى قولداۋ, بالالاردىڭ قولىمەن جاسالعان قولونەر بۇيىمدارى ءارتۇرلى جارقىراعان تۇستەردى پايدالانۋ ارقىلى كوركەم كورىنەتىنىن بايقاعان بولارسىزدار, بۇل – حالقىمىزدىڭ, بولاشاق ۇرپاعىمىزدىڭ جەرىمىزدىڭ, ەلىمىزدىڭ ايرىقشا تابيعاتىن, سان قىرلى ونەرىن, كاسىبىن وتە تالانتتى تالابىن كورسەتەدى, -دەيدى «حاس شەبەرلەر» قاۋىمداستىعىنىڭ ۆيتسە-پرەزيدەنتى قۇرالاي اسەمقۇلوۆا.
قولدارىنا كوك تۋ ۇستاپ, ءانۇراندى شىرقاپ, اينالاسىنا شۋاق شاشىپ, كەلۋشىلەرگە ەرەكشە كوڭىل-كۇي سىيلاعان شەبەرلەردىڭ فەستيۆالى شىنىندا دا تاۋەلسىزدىك كۇنىن تويلاعان ەلوردالىقتار مەن قالا قوناقتارىنا ناعىز حالىقتىق مەرەكەنى سەزىندىردى, ايرىقشا اتموسفەرا سىيلادى.
فەستيۆالدىڭ سوڭعى كۇنىندە 19 جەلتوقساندا قولونەرشىلەر قىزىل كىلەممەن ءجۇرىپ ءوتىپ, حاس شەبەرلەر شەرۋىن كورسەتتى, ءسويتىپ, ەلىمىزدىڭ كينەس رەكوردتار كىتابىنا ەندى.
