سوڭعى كەزدەرى استانالىقتار ينتەرنەتتەگى الاياقتىقتان, سونىڭ ىشىندە ينتەرنەت-دۇكەننەن زات ساتىپ الۋدا كوپتەگەن ماسەلەگە تاپ بولۋدا. تۇتىنۋشىلار تاپسىرىس بەرگەن تاۋارىنىڭ مۇلدەم كەلمەيتىنىن, يا بولماسا ساپاسى سىن كوتەرمەيتىنىن ايتىپ شاعىمدانادى. وسىنداي جاعدايدا سول تاۋاردىڭ اقشاسىن قايتارىپ الۋعا بولا ما؟
بيىل 9 ايدا استانادا ينتەرنەتتەن تاۋار ساتىپ الۋعا قاتىستى اقشاسىن قايتارۋعا جاردەمدەسۋگە قۇزىرلى ورگاندارعا 65 شاعىم ءتۇسىپتى. ساتىپ الۋشىلارعا 1 200 000 تەڭگە اقشاسى قايتارىلعان. مۇنداي مالىمەتتى وڭىرلىك كوممۋنيكاتسيالار قىزمەتىندەگى بريفينگتە استانا قالاسى بويىنشا ساۋدا جانە تۇتىنۋشىلاردىڭ قۇقىعىن قورعاۋ دەپارتامەنتىنىڭ ديرەكتورى نۇرعالي ەگەمبەرديەۆ جاريا ەتتى.
«استانا قالاسى بويىنشا ساۋدا جانە تۇتىنۋشىلاردىڭ قۇقىعىن قورعاۋ دەپارتامەنتى تۇتىنۋشىلاردىڭ قۇقىقتارىن قورعاۋدا جوعارى ستاندارتتى قامتاماسىز ەتۋ ءۇشىن ەلەكتروندىق ساۋدا الاڭدارىمەن ىنتىماقتاستىق قارىم-قاتىناس ورناتتى. بىرلەسكەن كۇش-جىگەرىمىزدى وسى الاڭداعى بارلىق تۇتىنۋشىلار ءۇشىن اشىقتىق, قاۋىپسىزدىك, ادىلەتتىلىك قاعيداتتارىن ورنىقتىراتىن ءىس-شارالارعا جۇمىلدىردىق. ەڭ باستىسى, تۇتىنۋشىلاردىڭ بۇزىلعان قۇقىقتارىن تەز ءارى ءادىل قالپىنا كەلتىرۋ» دەپ ءتۇسىندىردى ن.ەگەمبەردى.
ول «تۇتىنۋشىلاردىڭ قۇقىقتارىن قورعاۋ تۋرالى» جاڭا زاڭ جوباسىنىڭ اياسىندا تاۋارلاردى ساتاتىن ينتەرنەت-رەسۋرستاردى ساۋدا نىسانىنا تەڭەستىرۋ ۇسىنىلعانىن اتاپ ءوتتى. سوعان سايكەس, وفلاين-ساتۋشىلارعا قويىلاتىن بارلىق تالاپ ونلاين-ساتۋشىلارعا دا بىردەي دارەجەدە قولدانىلادى. بۇدان بولەك, بارلىق ەلەكتروندىق ساۋدا الاڭىنىڭ قوجايىندارى كاسىپكەرلەرمەن كەلىسىمشارت جاساپ, تۇتىنۋشىلاردىڭ قۇقىقتارىن قورعاۋ تۋرالى زاڭنامانىڭ بارلىق شارتىن ورىنداۋعا, ادىلەتتىلىكتى ساقتاۋعا مىندەتتەلەدى.
