وسىدان جەتى جىلداي بۇرىن پيتەرلىك يۆان چەرۆينسكيدى ءبىزدىڭ ەلدە ەشكىم بىلمەيتىن. قازاقستان تۋرالى ونىڭ دا بىلگەنى از بولاتىن. الايدا قازاقتىڭ كوكجيەگىندە جارقىراپ جانعان جۇلدىزدارىنىڭ جارىعى نەۆانىڭ جاعاسىندا جۇرگەن يۆاننىڭ جولىن اشىپ, جۇلدىزىن جاڭاشا جارقىراتتى.
ەرتەگىگە ۇقساس وسى وقيعانىڭ ەكىنشى ءبىر كەيىپكەرى بار. ول – ديماش. وقىرمانعا تۇسىنىكتى بولۋى ءۇشىن 2017 جىلعا ورالايىق. قىتايدىڭ «I’m a singer» جوباسىنىڭ قىزعان تۇسى. ونەرپازدار دوداسىندا ديماش تا بار. يۆان ءوزىنىڭ نەمەرە اعاسى ميحايل پويلوۆپەن بىرگە ديماشتىڭ ءبىر انىنە ءارتۇرلى ۆيدەولار قوسىپ, فيلم جاساپ عالامتورعا قوستى. ونداعىسى پيتەرلىكتەرگە ديماشتاي ءانشى بارىن ايتىپ, ناسيحاتتاماق ويى بولاتىن. ءبىر قىزىعى, ەرتەسىنە ديماشتىڭ ءانى الەمدى ارالاپ كەتتى. شەكارا اسىپ, لاتىن امەريكاسىنان جانكۇيەرلەر لەگىن تاپتى. ءىزىن سۋىتپاي تاعى بىرنەشە روليك جاساپ تۇراقتى كورگەندەر سانى 500 ميلليوننان اسقان كەزدە جاڭا بەلەستىڭ بيىگى جاقىن قالعانىن ءتۇسىندى.
يۆان ايتادى: «دۇنيە جۇزىندەگى شەتەلدىكتەردىڭ قازاقستاننىڭ مادەنيەتى مەن ونەرپازدارىنا قانشالىقتى قىزىعۋشىلىق تانىتىپ وتىرعانىن بايقاعان سوڭ لاتىن امەريكاسى, اۆستراليا, يندونەزيا, پورتۋگاليا, ەۋروپا ەلدەرى جانە ارتىستەرى ونەر كورسەتكەن ونلاين-كونتسەرتتەر سەرياسىن ۇيىمداستىرۋعا شەشىم قابىلدادىق. اراسىندا قازاق اندەرى دە شىرقالدى. بىزدەر كۇنىنە ءارتۇرلى فورماتتا سەگىز روليككە دەيىن شىعاراتىنبىز. بۇل كونتسەرتتەر توپتاماسى «العا, ديماش» دەپ اتالدى. وسىلاي جۇرگەنىمىزدە بەلگىلى ءبىر سەبەپتەرمەن عالامتورداعى ءبىزدىڭ ارنالار جوعالىپ كەتتى. ءۇش ارنامىزدان ايىرىلىپ, اڭتارىلىپ قالعانىمىزدا قازاق دوستارىمىز جاقسى قولداۋ كورسەتتى. قانداي شىعارىلىم جاساساق تا, ولار ءبىزدى ىنتالاندىردى, قولدادى. «دوستار, الاڭداماڭىزدار», «العا, پەتەربۋرگ» دەپ جازدى. قازاق مادەنيەتىنىڭ ادامداردى ءوز توڭىرەگىنە توپتاستىراتىن عاجايىپ قابىلەتى بار».
ودان كەيىنگى فيلمدەردە مەن قازاقستاندىقتاردىڭ فەنومەنى قانداي دەگەن سۇراققا جاۋاپ تابۋعا تىرىستىم. مەن قازاق حالقىنىڭ ينتەللەكتۋالدى الەۋەتىنە تاڭ قالامىن. قاراپ وتىرساڭىز, بۇگىندە امەريكا پرەزيدەنتى اكىمشىلىگىندە ءبىر قازاق جۇمىس ىستەپ ءجۇر, يلون ماسكتىڭ جانىندا دا قازاق بار, الەمدەگى مىقتى ديدجەي – يمانبەك, الەمنىڭ اتاقتى ءانشىسى – ديماش. جالعاستىرا بەرسەم, بۇل ءتىزىم كەتە بەرەدى. اياق استىنان جارق ەتىپ شىعا كەلگەندە ءبىر قۇدىرەتىمەن بۇكىل الەمدى مويىنداتىپ, وزىنە قاراتىپ الادى. ماتەماتيكادان, شاحماتتان جەڭىمپاز كىم؟ قازاق. جاقىندا ۇلىبريتانيادا مەكتەپ وقۋشىلارى اراسىنداعى اعىلشىن تىلىنەن وتكەن جارىستان قازاق وقۋشىسى ءبىرىنشى ورىندى جەڭىپ الىپتى. وسىنشاما قوعامعا اشىق, جاڭالىقتاردى تەز مەڭگەرەتىن ينتەللەكتۋالدى سانا قالاي بىتكەن؟ ەلدە ءاۋ دەمەيتىنى جوق, دومبىراشىلاردان بولەك, كلاسسيكالىق اسپاپتاردا وينايتىن ۆيرتۋوزدار جەتكىلىكتى. ەل ارالاپ قاراپايىم قازاقپەن ارالاسساڭىز, ار جاعىندا ەش قۋلىعى جوق, اڭقىلداعان اق جۇرەگى كورىنىپ تۇرادى.
وسى جاسىما دەيىن بىرنەشە جىل فينليانديادا, كورەيادا, تۇركيادا تۇردىم. جان جىلۋلىعىن حالىقتاردىڭ ءبىر-بىرىنە دەگەن رياسىز جاناشىرلىعىن وسى جەردە كوردىم. جاساندىلىق جوق. قولىندا بار بولسا, ايامايدى.
جاقىندا اقىن ولجاس سۇلەيمەنوۆپەن سۇحباتتاسۋدىڭ ءساتى ءتۇستى, اتاقتى ءانشى بيبىگۇل
تولەگەنوۆا دا كەزدەسۋگە كەلىستى. وسىنداي اڭىز ادامداردىڭ نازارىنا تۇسكەن مەن كىممىن دەپ كەيدە تاڭ قالامىن.
وسى جىلۋلىق مەنى قازاق جەرىنە الىپ كەلدى. وتباسىممەن بىرگە كوشىپ كەلىپ, قىزىمدى ءبىرىنشى سىنىپقا مەكتەپ-ليتسەيگە بەردىم. تانىستارىم جەكە مەكتەپكە بەرۋگە كەڭەس بەرگەن. وعان كەلىسپەدىم. قىزىم ءبىر سىنىپتاعى وتىز بالامەن بىرگە ءجۇرسىن, بىرگە وقىسىن. قازاق مەكتەپتەرىندە بىلىممەن بىرگە تاربيە بەرىلەدى. بارشا ادامزاتقا ورتاق قۇندىلىقتاردى دا وسى جەردە ۇيرەنەدى. قازاق بولىپ قالىپتاسادى.
العاش رەت قازاق شاپانىن سىيعا تارتقان دوستارىمنىڭ كوڭىلى ءۇشىن كيىپ ءجۇردىم. بايقايمىن, كوشەدە مەنەن باسقا ەشكىم شاپان كيىپ جۇرگەن جوق. ءبىردى-ەكىلى ادامدى كەزدەستىرىپ قالسام, ولار دا قازاق ەمەس. سويتسەم, شاپاندى مۇنداي كيۋگە ەمەس, سىيلىق ءۇشىن تارتۋلايدى ەكەن. ونى كەيىننەن دوستارىم ايتتى. بىراق مەن شاپانىمدى شەشپەدىم. بۇل ترەند ۇلتتىق شاپان كيۋ ۇلكەن اينالىم الىپ كەلەدى. ماسەلە كيىمدە عانا ەمەس, ونىڭ كۇندەلىكتى جۇمىسقا, جىلدىڭ قاي كەزەڭدەرىندە بولسىن يىعىڭنان تاستاماي كيۋدە تۇر. جەكە باسىمنان ايتايىن, ماعان وتە قولايلى. قازىر مەن ءۇشىن ارنايى مودەلەر تىگىپ بەرەدى. قالتاسى قاي جاعىندا بولۋى كەرەك, ۇزىندىعى قالاي, تاعى باسقا ولشەمىن كەلىسىپ شەشەمىز. بۇل تۋرالى بىزدە ميلليونداپ قارالعان بەينەجازبالار بار» دەپ اتاپ ءوتتى يۆان چەرۆينسكي.
يۆاننىڭ شىعارماشىلىق ومىربايانىنداعى ەلەۋلى كەزەڭى قازاقستان حالقى اسسامبلەياسى جۇمىسىنا قاتىستى فيلم تۇسىرگەننەن كەيىن جاڭا سيپات الدى. جانە ونىڭ قوعامدىق ءومىرى باستالدى دەۋگە بولادى. ول قحا-نىڭ ءحححىى سەسسياسىنىڭ قوناعى بولىپ, مەملەكەت باسشىسىنىڭ العىسىن الدى. يۆان قازاقستاننىڭ ءار وڭىرىندە ءجيى بولىپ, جاستارمەن ءجيى كەزدەسىپ, ءوزىنىڭ باسىنان وتكەن عاجايىپ ساتتەردىڭ قيىندىعى مەن قۋانىشىن ءبولىسىپ, جاستارعا جىگەر بەرەدى. ءوزىنىڭ كورسەتىلىمدەرى ميلليوننان اسىپ جىعىلاتىن بەينەباياندارىندا جاس قازاقستاندىقتاردىڭ جەتىستىكتەرىن سۇيىنشىلەپ, سپورت پەن شىعارماشىلىق الەمىندەگى جاڭا ەسىمدەردى بارشا عالامعا تانىتىپ, قازاق ەسىمىنىڭ اسقاق ايتىلۋىنا بار كۇشىن سالىپ ءجۇر.
يۆاننىڭ قازاق ءتىلىن وقىپ جۇرگەنىنە كوپ بولا قويعان جوق ەكەن. بىراق تۇراقتى تۇردە, كۇنىنە ءبىر جارىم ساعاتتان ءبولىپ ساباقتى جىبەرمەۋگە تىرىسادى. اۋىزەكى سويلەسە الادى. جاقسى تۇسىنەدى. ال «قازاق ءتىلىن تولىق مەڭگەرۋ ءۇشىن الدىمەن نيەت كەرەك» دەگەنى ءبىزدىڭ دە كوڭىلىمىزدەن شىقتى.
