ەلوردالىق جەتىسۋ ساياباعىندا جاستارعا ارنالعان «Jastar Talks» فورماتىندا كەزدەسۋ ءوتتى. ءىس-شاراعا جۋرناليست جانە حالىقارالىق جاتتىقتىرۋشى ماحاببات ەسەن, «استانا جاستارى» ەرىكتىلەرى مەن قالا جاستارى قاتىستى, دەپ حابارلايدى astana-akshamy.kz.
ءىس-شارانى استانا قالاسى جاستار ساياساتى ماسەلەلەرى باسقارماسى جانە «استانا جاستارى» جاستار رەسۋرستىق ورتالىعى ۇيىمداستىردى.
«بۇل كەزدەسۋ جۋرناليستەر كۇنىنە وراي ءوتىپ جاتىر, تالقىلاۋ بارىسىندا مەن ءوز تاجىريبەممەن ءبولىستىم. جۋرناليستيكادا مەنىڭ 25 جىلدىق تاجىريبەم بار. سويلەسۋ فورماتى جەڭىل جانە اشىق بولدى. ءوزىم ءبىر-ەكى ساعات بۇرىن گەرمانيادان ورالعانمىن, وندا الەمنىڭ تۇكپىر-تۇكپىرىنەن كەلگەن جۋرناليستەرمەن بىرگە عالامدىق سايتقا باردىم. ال بۇگىن ءبىز جۋرناليستيكا مەن مەديانىڭ الەمدىك ترەندتەرى, سونداي-اق ءبىزدىڭ مەديا قوعامداستىقتىڭ نەمەن اينالىسىپ جاتقانى تۋرالى اڭگىمەلەستىك. جان-جاقتى ساۋاتتى بولۋ كەرەك», – دەدى ماحاببات ەسەن.
ءىس-شاراعا قاتىسۋشىلارمەن كەزدەسۋ بارىسىندا جۋرناليستيكا سالاسىنداعى زاماناۋي ماسەلەلەر جانە جاساندى ينتەللەكتتىڭ مەدياعا اسەرى تالقىلاندى. سونداي-اق سپيكەر ماحاببات ەسەن شابىت پەن موتيۆاتسيانى قالاي الۋعا بولاتىندىعى تۋرالى ايتتى.
«بۇگىنگى ءىس-شارا تانىمدىق ەمەس, موتيۆاتسيالىق بولدى. سپيكەر ءوز ماماندىعىنىڭ قىر-سىرىن ءتۇسىندىردى. جاستاردىڭ بولاشاق جۇمىسى تۋرالى تۇسىنىگى بولۋى جانە ولاردىڭ قاي جەردە دامىعىسى كەلەتىنىن انىقتاي الۋى ءۇشىن مۇنداي ءىس-شارالار مىندەتتى تۇردە قاجەت ەكەنىنە سەنىمدىمىن. بۇعان دەيىن مەن ءماجىلىس دەپۋتاتىمەن ساياسي سالا تۋرالى اڭگىمەلەگەن كەزدەسۋلەرگە قاتىستىم. بىراق بۇگىن باق-پەن كەزدەسۋگە قاتىسۋ دا قىزىقتى بولدى», – دەدى «استانا جاستارى» ەرىكتىسى فەدور ەرمولەنكو.
«استانا جاستارى» جاستار رەسۋرستىق ورتالىعىنىڭ مامانى الۋا بالتاباەۆا اتاپ وتكەندەي, جوبا 2020 جىلدان باستاپ جۇزەگە اسىرىلۋدا.
«بۇگىن ءبىز ماحاببات ەسەنمەن اشىق كەزدەسۋ وتكىزدىك. بۇل ءىس-شارا جاستارعا قىزىقتى ديالوگقا قاتىسۋعا مۇمكىندىك بەردى», – دەدى ول.
«Jastar Talks» جوباسى ءالى دە جالعاسادى.
