استانادا Joltap الەۋمەتتىك جوباسى بىلتىر قىركۇيەكتەن بەرى جۇزەگە اسىرىلىپ كەلە جاتىر, دەپ حابارلايدى astana-akshamy.kz
«بارشاعا مۇمكىندىك» دەپ اتالاتىن 10 مودۋلدىك پۋنكتتە 52 ءتۇرلى مەملەكەتتىك قولداۋ بويىنشا كەڭەس بەرىلەدى. سونداي-اق 14 ماماندىق بويىنشا قىسقا مەرزىمدى وقۋعا جازىلۋعا جانە جۇمىسقا ورنالاسۋعا كومەك كورسەتىلەدى.
بۇل جوباعا 18-50 جاس ارالىعىنداعى قوسىمشا ماماندىق الىپ, تۇراقتى تابىس تاپقىسى كەلەتىن نەمەسە قارجىلىق جاعدايىن جاقسارتقىسى كەلەتىن استانالىقتار قاتىسۋدا.
سولاردىڭ ءبىرى – نۇربەك يسمۋرزينوۆ. ول اياق كيىم جوندەۋشى جانە كىلت جاساۋشى ماماندىعى بويىنشا قىسقا مەرزىمدى كۋرستى وقىدى.
ول قازىرگى كەزدە سۇرانىسقا يە جانە تۇراقتى تابىس اكەلەتىن كاسىپتەردى يگەرىپ شىققانىنا ءدان ريزا.
«وقۋ بارىسىندا ەكى شەبەرحانادان تاجىريبەدەن ءوتتىم. ءبىز ارنايى قۇرىلعىلاردا پەرفوراتسيالانعان كىلتتەردى, اعىلشىن كىلتتەرىن جاسادىق. سونداي-اق كۋرستا چيپ جانە دوموفون كىلتتەرىنىڭ جاسالۋىن كورسەتكەندەرى ۇنادى. بۇدان باسقا باعدارلامالاۋ نەگىزدەرىن دە ۇيرەندىك», – دەيدى ول.
سونىمەن قاتار, نۇربەك جانىبەكۇلى كۋرستىڭ اۋقىمدى جانە مازمۇندى بولعانىن ايتتى.
«وقىتۋشىلار وتە ساپالى ءبىلىم بەردى. وقۋ-تاجىريبە مول بولدى. جازدىق تا, تەست تاپسىردىق تا. ءبارى ءادىل بولدى. مەنىڭ جوباعا دەگەن العىسىم شەكسىز», – دەدى ول.
JOLTAP جوباسى اياسىنداعى وقۋ باعدارلاماسىن ءساتتى اياقتاعاننان كەيىن قاتىسۋشىلار تەك سەرتيفيكاتتار الىپ قانا قويمايدى, سونىمەن قاتار ولاردىڭ الدىنان ءتۇرلى مۇمكىندىكتەر اشىلادى. ولاردىڭ قاتارىندا رەسمي جۇمىسقا ورنالاسۋ, ۇيدەن تاپسىرىس قابىلداۋ مۇمكىندىگى بار شتاتتان تىس جۇمىس, جۇمىس جاساپ تۇرعان بيزنەستى دامىتۋ نەمەسە ميكروبيزنەس اشۋ جانە «JUMYS TAP» Telegram بوتىندا تۇيىندەمەنى تەگىن جىلجىتۋ كىرەدى.
ايتا كەتەيىك, بيىل ەلوردادا وسى جوبا بويىنشا 10 مىڭ تۇرعىندى جاڭا ماماندىقتارعا وقىتۋ جوسپارلانىپ وتىر. ال وقىتۋ باعدارلامالارى ماماندىققا بايلانىستى 2 اپتادان 1 ايعا سوزىلادى. جوبا ارقىلى وقىعىسى نەمەسە اقىل-كەڭەس, باعىت-باعدار العىسى كەلەتىن كەز كەلگەن ەلوردا تۇرعىنى «بارشاعا مۇمكىندىك» مودۋلدىك پۋنكتتەرىنە بارۋعا بولادى.
