استانادا «Joltap» جوباسىنىڭ ارقاسىندا تۇراقتى جۇمىس تاۋىپ, جاعدايىن جاقسارتىپ, جاڭا ماماندىق يگەرىپ جاتقاندار بار. مۇندا قاتىسۋشىلار تسيفرلىق جانە جۇمىسشى ماماندىقتارىن وقىپ, جاڭا جۇمىس تابا الادى.
قالالىق اكىمدىكتىڭ باستاماسىمەن جانە «جاڭا مۇمكىندىك» قوعامدىق قورىنىڭ قاتىسۋىمەن جۇزەگە اسىپ جاتقان اۋقىمدى جوبانىڭ اياسىندا 18 بەن 50 جاس ارالىعىنداعى استانالىقتار جۇمىسشى ماماندىقتارى بويىنشا قىسقامەرزىمدى وقىتۋدان تەگىن ءوتىپ, سەرتيفيكات الادى.
وسى ۋاقىتقا دەيىن جوباعا قاتىسۋشىلاردىڭ ءبىر بولىگى تەحنيكالىق ماماندىقتاردى يگەرسە, ەندى ءبىر بولىگى تسيفرلىق سالانىڭ ءتىلىن مەڭگەردى. سولاردىڭ ءبىرى – 30 جاستاعى ەلوردالىق ابىلبەك سادىقوۆ. ول ءبىراز ۋاقىت قۇرىلىستا جۇمىس ىستەگەن. الايدا كەيىن جۇمىسسىز قالعان سوڭ, وسى جوبانىڭ وقىتۋ كۋرسىنا قاتىسىپ, جاڭا داعدىنى دامىتتى.
– ءبىر كۇنى كوشەدە كەتىپ بارا جاتقانىمدا «Joltap» جوباسى تۋرالى جارناما كوزىمە ءتۇستى. سودان قالاداعى «بارشاعا مۇمكىندىك» مودۋلدىك پۋنكتتەرىنىڭ بىرىنە بارىپ, دانەكەرلەۋشى سالاسى بويىنشا تەگىن وقىتۋ كۋرسىنا جازىلدىم. بۇل قاڭتار ايىنىڭ ورتاسى بولاتىن, ال وقىتۋ اقپان ايىنىڭ باس كەزىندە باستالدى, – دەدى ابىلبەك نۇرسەيىتۇلى.
ايتۋىنشا, ساباق كۇن سايىن وتكەن. ول ءبىر ايدىڭ ىشىندە بۇل ماماندىقتى مەڭگەرىپ شىققان. كۋرس بارىسىندا كوپتەگەن سۇراققا جاۋاپ الىپ, ءبىرشاما جاڭا نارسەنى ۇيرەنگەن. جالپى ول ءدارىس العان توپتا ادام كوپ بولماعانىن, ساباقتار وتە قىزىقتى جانە مازمۇندى وتكەنىن جەتكىزدى. قازىرگى كەزدە ول قالاداعى زاۋىتتاردىڭ بىرىندە دانەكەرلەۋشى بولىپ جۇمىس ىستەيدى.
– بۇل جوبانىڭ كوپكە تيگىزەر پايداسى مول. سەبەبى «Joltap» ارقىلى ءار ادام ءوزى ءۇشىن جاڭا ماماندىقتى يگەرە الادى, بولماسا بىلىكتىلىگىن ارتتىرادى. باستىسى, بۇل – جۇمىس ىستەيمىن دەگەن ءار ادامعا جاقسى مۇمكىندىك, – دەدى ابىلبەك سادىقوۆ.
بۇعان دەيىن دۇكەندە ساتۋشى بولىپ جۇمىس ىستەگەن 50 جاستاعى ەلوردالىق ەلەونورا ناحيپوۆا «Joltap» باعدارلاماسى تۋرالى كەزدەيسوق ءبىلدى.
– «Joltap» مۇمكىندىگى تۋرالى مەن باعدارلاما پاۆيلونىنىڭ جانىنان ءوتىپ بارا جاتقاندا ءبىلدىم. كەڭەسشى ماعان باعىتتار مەن شارتتار تۋرالى ايتىپ بەردى. مەن وقۋعا جازىلۋدى شەشتىم. سونىمەن قاتار دۇكەندە ساتۋشى بولىپ جۇمىس ىستەدىم جانە جاڭا داعدىعا يە بولعىم كەلدى. ءسويتىپ بۇل جەردە كاسسامەن جۇمىس ىستەۋدى ۇيرەنۋدى كوزدەدىم. سوندىقتان مەن كاسسير-ساتۋشى ماماندىعىن تاڭدادىم. جالپى «Joltap»-تا وقۋ ماعان ۇنادى. كۋرستا ءوز سالاسىنىڭ ماماندارى ساباق بەرەدى, ءبارى وڭاي جانە تۇسىنىكتى بولدى. ءبىز جاڭا ءبىلىم مەن داعدىنى تەز مەڭگەردىك, – دەدى استانالىق ايەل.
ونىڭ ايتۋىنشا, كۋرستى اياقتاعاننان كەيىن ونىڭ العان ءبىلىمى كوپ كومەكتەستى, ويتكەنى ول جۇمىس ىستەگەن دۇكەنگە كاسسا ورناتىلدى. قازىر ەلەونورا كاسسادا ساتۋشى-كاسسير بولىپ جۇمىس ىستەيدى. اكىمدىككە جانە وسى جوبانى ەنگىزگەندەردىڭ بارلىعىنا العىسىن جەتكىزدى.
تالاي ادامعا مۇمكىندىك بەرىپ, جۇمىس ىستەۋگە جاعداي جاساعان بۇل جوبا استانالىقتاردىڭ تابىسىن ارتتىرۋعا جاعداي جاساۋمەن بىرگە, ەلوردالىقتاردىڭ الەۋمەتتىك جاعدايىن جاقسارتۋدا. قىسقامەرزىمدى وقىتۋ باعدارلاماسى 18-50 جاس ارالىعىنداعى استانا تۇرعىندارى ءۇشىن قولجەتىمدى. وقۋدان كەيىن قاتىسۋشىلارعا سەرتيفيكات بەرىلەدى. تۇلەكتەردىڭ كانديداتۋرالارى «Jumys tap» Telegram-بوتىندا تەگىن كورسەتىلەدى. كونسۋلتاتسيا كۇن سايىن «بارشاعا مۇمكىندىك» مودۋلدىك پۋنكتتەرىندە وتەدى.
ەلوردا تۇرعىندارى وسى مەكەنجايلاردا ورنالاسقان «بارشاعا مۇمكىندىك» مودۋلدىك پۋنكتتەرى ۇسىناتىن بارلىق مۇمكىندىكتى پايدالانۋ ارقىلى تەگىن وقىپ, جاڭا كاسىپتى مەڭگەرە الادى.
