وتكەن جىلدىڭ قىركۇيەك ايىنان باستاپ ىسكە قوسىلعان «JOLTAP» الەۋمەتتىك جوباسى كۇنى بۇگىنگە دەيىن ناتيجەلى جالعاسىپ جاتىر. سونىڭ ارقاسىندا استانالىقتار قىسقا مەرزىمدى باعدارلامالار ارقىلى بەلگىلى ءبىر كاسىپ تۇرىنە تەگىن وقۋعا مۇمكىندىك الدى. ەلوردا اكىمدىگىنىڭ باستاماسىمەن قولعا الىنعان جوبا اياسىندا مەملەكەتتىك قولداۋ شارالارى, اتاۋلى الەۋمەتتىك كومەك, بيزنەس اشۋعا قۇجاتتاردى رەسىمدەۋ جانە جۇمىس تابۋ ءۇشىن كەڭەس بەرىلەدى, دەپ حابارلايدى astana-akshamy.kz.
«JOLTAP» جوباسى اياسىندا قالا تۇرعىندارى ەكى قىسقا مەرزىمدى باعدارلاما بويىنشا تەگىن ءبىلىم الا الادى. ءبىرىنشى باعدارلاما ناۋبايشى, باريستا, ساتۋشى-كاسسير, قوعامدىق تاماقتاندىرۋدىڭ امبەباپ قىزمەتكەرى, تىگىنشى سياقتى 5 جۇمىسشى ماماندىعىن وقىتۋعا ارنالعان. ەكىنشى باعدارلاما – «Freelance مۇمكىندىك» دەپ اتالادى, بۇل 7 تسيفرلىق داعدىلاردى وقىتۋدى ۇسىنادى. ولار: تارگەتولوگ, SMM, ۆيدەوگراف, ماركەتپلەيس مەنەدجەرى, موبيلوگراف, گرافيكالىق ديزاينەر جانە ۆەب-ديزاينەر.
جوباعا قاتىسىپ, كۋرس وقىپ, ءوز كاسىبىن قولعا العانداردىڭ ءبىرى – عامزات يمانماعزاموۆ.
«مەن «JOLTAP» جوباسىندا ينتەرنەت ساۋدا باعدارلاماسى بويىنشا كۋرستان ءوتتىم. ۇستازىمىز كۋرستى وتە كەرەمەت وتكىزدى. ساباقتان سوڭ وي تۋىپ, ۇيدەگىلەرگە ينتەرنەت ارقىلى ساۋدا جاساۋعا بولاتىنىن ايتتىم. بۇگىندە قىتايدان تاپسىرىس جاساپ, تاۋار توسىپ وتىرمىز. تاۋارىمىز كەلگەننەن كەين ماركەتپلەيسكە شىعامىز دەگەن جوسپارىمىز بار. وسىلايشا ينتەرنەت-ساۋدانىڭ قىر-سىرىن ۇيرەندىك. وسىنداي مۇمكىندىكتىڭ كوزىن نۇسقاپ, تابىس تابۋدىڭ جولىن كورسەتكەن جوباعا, ۇستازىمىزعا العىسىم زور. الداعى كۇندە وتباسىمىزبەن ويلاعان ءىسىمىزدى جۇزەگە اسىرامىز دەگەن سەنىمدەمىز», – دەيدى جوبا قاتىسۋشىسى عامزات يمانماعزاموۆ.
ەڭ باستىسى, ەلوردا تۇرعىندارى ءۇشىن وقىتۋ تەگىن. وقۋ مەرزىمى باعدارلاماعا بايلانىستى ون كۇندىك كۋرستان ءبىر جارىم ايعا دەيىنگى ۋاقىت ارالىعىندا.
سونداي-اق قىسقا مەرزىمدى وقىتۋ باعدارلامالارى 18-50 جاس ارالىعىنداعى استانا تۇرعىندارى ءۇشىن قولجەتىمدى. وقۋ اياقتالعاننان كەيىن قاتىسۋشىلارعا سەرتيفيكات بەرىلەدى. قازىرگى ۋاقىتتا وقۋشىلار اراسىنداعى نەگىزگى ساناتتىڭ 60%-دان استامى – 35 جاسقا دەيىنگى جۇمىسسىز تۇرعىندار.
«JOLTAP» الەۋمەتتىك جوباسى اياسىندا جۇگىنگەندەردىڭ 1200-گە جۋىعى حالىقتىڭ الەۋمەتتىك وسال توپتارىنا جاتادى.
جوبا تۋرالى بۇدان دا كەڭىرەك اقپاراتتى قالا تۇرعىندارى «بارشاعا مۇمكىندىك» مودۋلدىك پۋنكتەرىنەن الا الادى.
