ەلوردادا جۇمىسسىز قالا تۇرعىندارىنىڭ جۇمىس تاۋىپ, قارجىلىق جاعدايىن جاقسارتۋعا مۇمكىندىك بەرەتىن «JOLTAP» جوباسى ءجۇرىپ جاتىر, دەپ حابارلايدى astana-akshamy.kz.
بۇگىندە جوبا اياسىندا 2 مىڭنان استام ەلوردالىق ءتۇرلى ماماندىقتار بويىنشا وقىتۋ كۋرستارىنان وتكەن. ال وقىتۋ باعدارلامالارى ەڭبەك نارىعىنىڭ سۇرانىستارىنا سۇيەنە وتىرىپ جاسالعان. ماسەلەن ەلوردالىق نۇرسۇلتان تەلتاەۆ جوبا اياسىندا «موبيلوگرافيا» كۋرسىن اياقتاپ, بۇگىندە تابىس تاۋىپ ءجۇر.
28 جاستاعى قالا تۇرعىنى «JOLTAP» جوباسىنا دەيىن اسپازشى بولىپ تابىس تاپقان. بىراق دەنساۋلىعىنا بايلانىستى جۇمىسىن اۋىستىرۋعا تۋرا كەلگەن.
«موبيلوگرافيانى مەڭگەرمەي تۇرىپ, 6 جىل بويى اسپازشى بولىپ جۇمىس ىستەدىم. سول ۋاقىتتا دا ۆيدەو تۇسىرۋگە دەگەن قىزىعۋشىلىعىم بولدى. ال نارىقتا وعان ۇيرەتەتىن كۋرستار ايىنا 300-350 مىڭنان باستالادى. بىراق ونداي مۇمكىندىگىم بولعان جوق. كەيىن دەنساۋلىعىما بايلانىستى جۇمىس ورنىن اۋىستىرۋىما تۋرا كەلدى. وسىلايشا قالا كوشەلەرىندە ورنالاسقان پۋنكتەردىڭ بىرىنە كىرىپ, 14 ماماندىقتىڭ ىشىنەن «موبيلوگرافيا» كۋرسىن تاڭدادىم», – دەيدى نۇرسۇلتان تەلتاەۆ.
ەلوردا تۇرعىنى 11 كۇن ىشىندە سمارتفون ارقىلى ءساندى فوتو مەن ۆيدەولاردى ءتۇسىرۋدى جانە ونى مونتاجداپ, دايىن كونتەنت جاساۋدى ۇيرەنگەن. كۋرستى تامامداعانىنا ءبىر ايدان اسا ۋاقىت وتسە دە, 4 جوبا بويىنشا جۇمىس ىستەپ ۇلگەرىپتى.
«كۋرس بارىسىندا باستاپقى موبيلوگراف مامانىنا قاجەت بارلىق كەرەك-جاراق تۇرلەرى ايتىلىپ, ءتۇسىرىلىم تاسىلدەرى ۇيرەتىلدى. ءبىزدىڭ وقىتۋشىمىز وسى سالانىڭ مىقتى مامانى دەۋگە بولادى. ءبىز 11 كۇن ىشىندە ادەمى ۆيدەو ءتۇسىرىپ, ونى مونتاجداۋدى ۇيرەندىك. وقۋ اياقتالعاننان كەيىن سەرتيفيكات بەرىلدى. مەن بىردەن تاپسىرىس الىپ, موبيلوگراف رەتىندە تابىس تابا باستادىم. ماسەلەن كۋرستى بىتىرگەنىمە 1,5 اي بولىپ قالدى. وسى ارالىقتا 4 جوبادان ۇسىنىس ءتۇسىپ, جالپى 500 مىڭ تەڭگەدەن اسا تابىس تاپتىم. اۆتوۇيىمدار مەن بيزنەس-فورۋمداردان ۆيدەو ءتۇسىردىم. وسى قىسقا ارالىقتا موبيلوگرافيا سالاسى ارقىلى ءتۇرلى ادامدارمەن تانىستىم», – دەيدى ەلوردالىق جىگىت.
موبيلوگراف نۇرسۇلتان تەلتاەۆتىڭ سوزىنشە, «JOLTAP» جوباسى جۇمىسسىز جاندارعا ۇلكەن مۇمكىندىك بەرەدى.
«قازىرگى تاڭدا جاستاردىڭ جۇمىسقا ورنالاسۋى پروبلەماعا اينالىپ كەتتى دەۋگە بولادى. سول سەبەپتى «JOLTAP» جوباسى حالىققا ناعىز كەرەك جوبا دەپ سانايمىن. قالامىزدا جۇمىسقا ورنالاسۋعا مۇمكىندىك بەرەتىن جوبا بار ەكەنىن بىلمەيتىندەر بار. جۇمىسسىز جۇرگەن جاندار تەگىن ماماندىقتى يگەرىپ, كەيىن جۇمىسقا تۇرىپ جاتسا جەتىستىك ەمەس پە؟! جاقىندا باسقا دا قالالاردا اشىلادى دەپ ەستىدىك, بۇل حالىققا بەرىلىپ وتىرعان ۇلكەن مۇمكىندىك. ءوزىم ارقاشان وزگەلەرگە «JOLTAP» جوباسىنىڭ مۇمكىندىكتەرىن ايتىپ جۇرەمىن. جوبا ۇيىمداستىرۋشىلارىنا العىسىمدى بىلدىرەمىن», – دەيدى نۇرسۇلتان تەلتاەۆ.
ايتا كەتەيىك, قاتىسۋشىلاردىڭ تاڭداۋىنا 14 ماماندىق ۇسىنىلعان. ال وقىتۋ باعدارلامالارى ماماندىققا بايلانىستى 2 اپتادان 1 ايعا دەيىن بارىنشا قىسقا مەرزىمدە پراكتيكالىق داعدىلاردى مەڭگەرۋگە باعىتتالعان.
