مەملەكەت باسشىسى ق.ج. توقاەۆتىڭ كاتار مەملەكەتىنە ساپارى اياسىندا مەملەكەتتەر اراسىنداعى اۋىل شارۋاشىلىعى سەكتورىنداعى ارىپتەستىك تۋرالى, ونىڭ ىشىندە ينۆەستيتسيالىق ارىپتەستىك تۋرالى بىرقاتار كەلىسىمدەرگە قول قويىلدى, دەپ حابارلايدى astana-akshamy.kz.
كاتارلىق ينۆەستورلار قازاقستاندا وسىمدىك شارۋاشىلىعى ونىمدەرىن تەرەڭ وڭدەۋگە ينۆەستيتسيا سالۋعا نيەتتى: كاتارلىق Hassad Food كومپانياسى, تۇرىكتىڭ Tiryaki كومپانياسى جانە «بايتەرەك» ۇلتتىق باسقارۋشى حولدينگى اراسىندا اقمولا وبلىسىندا زاۋىت سالۋ تۋرالى ۋاعدالاستىقتى كوزدەيتىن كەلىسىمگە قول قويىلدى. بۇل جوبا 200 ميلليون اقش دوللارىنا باعالانىپ, استىق پەن بۇرشاقتى تەرەڭ وڭدەۋمەن اينالىسۋعا باعىتتالعان.
سونىمەن قاتار, كاتاردا Dinara Group حولدينگى مەن Qatar National Enterprises اراسىندا اۋىل شارۋاشىلىعىن دامىتۋ, قۇرىلىس جانە ينفراقۇرىلىمدىق دامۋ, دەنساۋلىق ساقتاۋ جانە ءبىلىم بەرۋ ءۇشىن ستراتەگيالىق ينۆەستيتسيالىق سەرىكتەستىك تۋرالى شارتقا قول قويىلدى. قازاقستان مەن ورتالىق ازيانىڭ اگرارلىق سەكتورىن دامىتۋ ءۇشىن بىرلەسكەن تىكەلەي ينۆەستيتسيالار قورىن قۇرۋ جوسپارلانۋدا.
قول قويىلعان شارت شەڭبەرىندە Dinara Group حولدينگى قولدانىستاعى ءسۇت, ەت جانە وسىمدىك شارۋاشىلىعى وندىرىستەرىن ماسشتابتاۋدى, اسىل تۇقىمدى مال باسىنىڭ وزىندىك نەگىزىن دامىتۋدى جانە قوسىمشا ءسۇت فەرمالارىن, ءسۇت وڭدەۋ جانە ىرىمشىك ءوندىرۋ زاۋىتىن سالۋدى جانە دايىن ءونىمدى قىتاي مەن تاياۋ شىعىس ەلدەرىنە ەكسپورتتاۋدى جوسپارلاپ وتىر. ينۆەستيتسيا كولەمى شامامەن 300 ميلليون اقش دوللارىن قۇرايدى, بۇل كاتارداعى سەرىكتەستەردىڭ جوعارى سەنىمىن كورسەتەدى.
قر اۋىل شارۋاشىلىعى ءمينيسترى ايداربەك ساپاروۆ اۋىل شارۋاشىلىعى سەكتورىندا ينۆەستيتسيالار تارتۋعا جانە ارىپتەستىكتى دامىتۋعا باعىتتالعان بىرقاتار كەزدەسۋلەر وتكىزدى. كاتار مەملەكەتى مۋنيتسيپاليتەتىنىڭ ءمينيسترى ابدۋللا بەن حاماد بين ابدۋللا ال اتتيامەن كەزدەسۋ بارىسىندا سالاداعى, اتاپ ايتقاندا, كاتارعا قوي مەن ءداندى داقىلداردى جەتكىزۋ جونىندەگى ستراتەگيالىق ماقساتتار مەن جوسپارلار تالقىلاندى. 2024 جىلى قازاقستان كاتارعا قوي ەتىنىڭ ەكسپورتىن ەكى ەسەگە ارتتىرۋعا نيەتتى. ۆەدومستۆو باسشىلارى ءداندى داقىلداردى كاتارعا يران لوگيستيكاسى ارقىلى جۇزەگە اسىرۋدى تالقىلادى.
