ءۇندىستان استاناسىندا وڭتۇستىك ازيانىڭ ەڭ ءىرى حالىقارالىق تۋريستىك كورمەسى – SATTE اشىلۋ سالتاناتى ءوتتى. رەسمي ءىس-شاراعا ءۇندىستان ءتۋريزمىنىڭ باسشىسى, يندونەزيانىڭ تۋريزم جانە كرەاتيۆتى ەكونوميكا ءمينيسترى, PATA ازيا-تىنىق مۇحيتى تۋريزم قاۋىمداستىعىنىڭ باسشىسى, ماسكەۋ, بەلارۋس تۋريستىك دەپارتامەنتتەرىنىڭ باسشىلارى جانە «Kazakh Tourism «ۇك» اق توراعاسى قايرات سادۋاقاسوۆ قاتىستى, دەپ حابارلايدى astana-akshamy.kz.
كورمە اياسىندا Kazakh Tourism كومپانياسىنىڭ ءۇندىستان نارىعى بويىنشا وكىلى تاعايىندالدى. قايرات سادۋاقاسوۆ ءتيىستى سەرتيفيكاتتى Salvia Promoters كومپانياسىنىڭ باسشىسى پراشانت چودريگە تابىستادى. كومپانيا ورتالىق ازيا مەن رەسەي نارىقتارىن ىلگەرىلەتۋگە ماماندانعان. ءار جىلدارى Salvia ۆيزالىق ورتالىق جانە ىلگەرىلەتۋ كەڭسەسى رەتىندە ءبىزدىڭ ايماقتىڭ بىرقاتار قالاسى مەن ەلدەرىن تانىستىرىپ كەلەدى.
«بۇل – قازاقستان ءتۋريزمىن حالىقارالىق دەڭگەيدە ىلگەرىلەتۋدىڭ جاڭا قادامى. ءبىز الەمدەگى ەڭ پەرسپەكتيۆالى تۋريستىك نارىقتاردىڭ ءبىرى سانالاتىن ءۇندىستاندا ءوز وكىلىمىز بولاتىنىنا قۋانىشتىمىز. الداعى ۋاقىتتا بۇل تاجىريبەنى باسقا دا نارىقتاردا كەڭەيتۋگە نيەتتىمىز», – دەدى قايرات سادۋاقاسوۆ.
«ءۇندىستان تۋريستەرىنە قازاقستان ءتۋريزمىن تانىستىرۋ مەن ءۇشىن ۇلكەن مارتەبە. مەنىڭ كوپ جىلدىق تاجىريبەم ەكى ەل اراسىنداعى ءتۋريزمنىڭ دامۋىنا وڭ اسەر ەتەدى دەپ ۇمىتتەنەمىن», – دەپ پراشانت چودري ءوز اسەرىمەن ءبولىستى.
ەكى تاراپ قازاقستانعا ءۇندىستاننان تۋريستىك توپتاردى تارتۋ, سونىمەن قاتار كوشپەلى تۋريزم نارىعىندا Kazakh Tourism مۇددەسىن تانىستىرۋ ماقساتىندا سەرىكتەستىكتى دامىتۋ تۋرالى كەلىسىمگە كەلدى.
تاراپتاردىڭ العاشقى بىرلەسكەن جۇمىسى – SATTE كورمەسىنە قاتىسۋ جانە بيىلعى جىلدىڭ ءبىرىنشى جارتىجىلدىعىندا ۇندىستاندىق ترەۆەل جۋرناليستەردىڭ قازاقستانعا كەلۋىن ۇيىمداستىرۋ.
مامانداردىڭ بولجامى بويىنشا, ءۇندىستاننىڭ كوشپەلى تۋريزم نارىعى 2026 جىلعا قاراي 50 ميلليوننان استام تۋريسكە جەتەدى. بۇل رەتتە, پراشانت چودري 2026 جىلعا قاراي قازاقستان جىل سايىن 500 مىڭعا دەيىن ءۇندى تۋريستەرىن قابىلداي الاتىنىن جەتكىزدى.
