استانا قالاسى ورتالىقتاندىرىلعان كىتاپحانالار جۇيەسىنىڭ ۇيىمداستىرۋىمەن ميچۋرين كەنتىندەگى №43 مەكتەپ-قوسىمشا ءبىلىم ورتالىعىندا «تاربيە – تال بەسىكتەن» ءىس-شاراسى ءوتتى. كەزدەسۋ قوناعى تاريحشى-ەتنولوگ تۇرار ساتتارقىزى بولدى.
اتا-انالار مەن وقۋشىلار, ۇستازدار قاۋىمى قاتىسقان جيىندا «بارشاڭىزعا وي سالساق, كوكىرەكتەرىڭىزگە كىشكەنتاي بولسىن ساۋلە قۇيساق, ءبىزدىڭ ماقساتىمىزدىڭ ورىندالعانى» دەگەن سپيكەر قاتىسۋشىلاردىڭ سۇراقتارىنا جاۋاپ بەرىپ, ۇسىنىستارىن تىڭدادى. كەنتتەگى №10 كوپشىلىك كىتاپحاناعا باردى.
«مىڭداعان تۇرعىنى بار كەنت حالقىنا رۋحاني قىزمەت ەتىپ وتىرعان كىتاپحانا اياداي عانا ەكى بولمەگە ورنالاسقان ەكەن. وسىعان قاراماستان كىتاپحانا قىزمەتكەرلەرى اسەل وماش پەن روزا سالمەتوۆانى كىتاپحانانى ۇياداي ەتىپ ۇستاپ, تۇرعىندارعا رۋحاني قىزمەت ەتىپ وتىرعان ءوز ءىسىنىڭ ناعىز بىلگىر ماماندارى, رۋحانيات جاناشىرلارى دەۋگە بولادى. «كىتاپ وقيتىن ۇلتقا اينالايىق, مادەنيەتتى ۇلت بولايىق» دەپ ۇرانداتىپ جاتامىز. بىراق اۋىلداردا, قالالاردىڭ شەتكەرى ايماقتارىنداعى مادەني وشاقتاردىڭ جاعدايىنىڭ لايىقتى بولۋىنا قاشان نازار اۋدارىپ, سوزدەن ىسكە كوشەدى ەكەنبىز؟ قانشا جەردەن ەلەكتروندى كىتاپحانالار قىزمەتى جۇيەلى بولعانىمەن, ەشقاشان ءداستۇرلى كىتاپحانالار جۇمىسىن الماستىرا المايدى.
كىتاپتى قولىڭا الىپ ءاربىر بەتىن پاراقتاپ وقۋدىڭ ءوزى ادامعا قانشا رۋحاني اسەر سىيلايدى. كىتاپ وقۋ قوعامنىڭ مادەني دەڭگەيىن كوتەرىپ, رۋحانياتىن ارتتىراتىنىن ەشقاشان ۇمىتپايىق» دەيدى تۇرار ساتتارقىزى.
