ورتالىق ازيادا كليماتتىڭ وزگەرۋىمەن اينالىساتىن حالىقارالىق قور قۇرىلدى. بۇل تۋرالى قر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ۇلىبريتانيانىڭ قازاقستانداعى ەلشىسى كەتي ليچ باستاعان دەلەگاتسيامەن كەزدەسۋىندە ايتىلدى, دەپ حابارلايدى astana-akshamy.kz.
تاراپتار قازاقستاننىڭ سۋ سالاسىن دامىتۋ باعىتىنداعى ىنتىماقتاستىق مۇمكىندىكتەرىن تالقىلادى, دەپ حابارلايدى ۆەدومستۆونىڭ ءباسپاسوز قىزمەتى.
ەلشى حانىم ۇلىبريتانيا ۇكىمەتى العاش رەت ورتالىق ازيادا كليماتتىڭ وزگەرۋىمەن اينالىساتىن حالىقارالىق قور قۇرعانىن حابارلادى. بىرىككەن كورولدىك قور اياسىندا وڭىردەگى بەس مەملەكەتكە كليماتتىڭ وزگەرۋىنىڭ تەرىس سالدارىمەن كۇرەسۋ ماسەلەسىندە قولداۋ كورسەتەتىن بولادى. سونداي-اق, بريتاندىق تاراپ حالىقارالىق ارالدى قۇتقارۋ قورىمەن دە ىنتىماقتاستىق ورناتۋعا دايىن.
بۇل رەتتە كەتي ليچ ۇلىبريتانيا قازاقستانمەن وڭىرلىك قانا ەمەس, سونىمەن قاتار ەكىجاقتى ىنتىماقتاستىق اياسىندا دا ءوزارا ءىس-قيمىل جاساۋعا نيەتتى ەكەنىن اتاپ ءوتتى.
ءوز كەزەگىندە نۇرجان نۇرجىگىتوۆ ەكىجاقتى ىنتىماقتاستىقتىڭ ءۇش باسىم باعىتىن بەلگىلەدى. بۇل كاسپي تەڭىزىنىڭ عىلىمي-زەرتتەۋ ينستيتۋتىمەن جۇمىس, تاجىريبە الماسۋ جانە ۇلىبريتانيادان ساراپشىلاردى تارتۋ, سونداي-اق سۋ ديپلوماتياسى سالاسىنداعى تەحنيكالىق ماماندىقتاردا وقيتىن ستۋدەنتتەر مەن كادرلار ءۇشىن جوعارى وقۋ ورنىنان كەيىنگى ءبىلىم بەرۋ.
ەلشى حانىم بريتاندىق تاراپ «بولاشاق» ءبىلىم بەرۋ باعدارلاماسى اياسىندا ماگيسترلەر مەن فيلوسوفيا دوكتورلارىن دايارلاۋمەن اينالىسۋعا دايىن ەكەنىن ايتتى. سونداي-اق, كەتي ليچ قوسديپلومدى ءبىلىم بەرۋدىڭ بىرلەسكەن باعدارلامالارىن ىسكە قوسۋدى ۇسىندى.
بريتاندىق دەلەگاتسيا وكىلدەرى قازاقستانعا گيدروگەولوگيا, يرريگاتسيا, مۇزدىقتاردى زەرتتەۋ جانە ت.ب. سالالارداعى الەمدىك دەڭگەيدەگى ساراپشىلاردى شاقىرۋعا دايىن ەكەندىكتەرىن ءبىلدىردى.
سونداي-اق, كەزدەسۋدە اعىندى سۋلاردى تازارتۋ تەحنولوگيالارىن ەنگىزۋ تۋرالى دا ايتىلدى. كەتي ءليچتىڭ ايتۋىنشا, بۇل ماسەلەمەن اينالىساتىن بريتاندىق كومپانيالار قازاقستاندا جۇمىس ىستەۋگە نيەتتى. سولاردىڭ ءبىرى شىمكەنتتە ءوز جوباسىن ءساتتى جۇزەگە اسىرىپ جاتىر جانە وسىنىڭ ناتيجەسىندە سۋ شىعىنىن 25%-عا ازايتۋعا مۇمكىندىك تۋعان.
