استانادا تەمىر تۇلپار تىزگىنىن ۇستاپ, تاكسي جۇرگىزۋشىسى بولىپ جۇرگەن نازىك جاندار سيرەك كەزدەسەدى. سولاردىڭ ءبىرى – الەۋمەتتىك جەلىدەگى بەلسەندىلىگى ارقىلى تانىلعان ەلوردالىق اقگۇل ءشارىپوۆا. جىلى جۇزىمەن كوپ تۇرعىنعا تانىس جۇرگىزۋشى – بۇگىندە كوپبالالى انا.
«مەن اقتوبە وڭىرىنەن ەلورداعا جولداسىممەن بىرگە ارمان قۋىپ, 5 جىل بۇرىن كوشىپ كەلدىم» دەپ باستادى اڭگىمەسىن كەيىپكەرىمىز.
«جولداسىم ەكەۋمىز بالاباقشادا دا, مەكتەپتە دە بىرگە وقىپ, وستىك. ەكەۋمىز باس قالاعا قىزىعىپ, كوشىپ كەلگەن سوڭ, ءوز باسىم ەلوردا مەنى قۇشاق جايا قارسى الادى دەپ ويلادىم. بىراق, استانا السىزدەردىڭ قالاسى ەمەس ەكەنىن ءتۇسىندىم. مۇندا بىردەن جۇمىس ورنىن تاپپاساڭ, كۇندەلىكتى تۇرمىسىڭدا قيىندىقتار بولاتىنى ءسوزسىز. كوپبالالى انا بولعان سوڭ, مەنى وزىمە ءتيىمدى ورىندارعا ەشكىم جۇمىسقا المادى. اۋەلى كادر بولىمىندە جۇمىس ىستەپ كوردىم, بىراق بۇل قىزمەتتە ەكى-ءۇش ماماننىڭ مىندەتىن قوسا جۇكتەيتىن ەدى. بالالاردىڭ ءبىلىم بەرۋ ورتالىعىنىڭ اكىمشىسى مەن تاربيەشىسىنىڭ جۇمىسىن قوسا ىستەپ, 80-90 مىڭ تەڭگە ايلىق الاتىنمىن. ەڭبەگىمنىڭ قۇنسىزدانعانىن ءبىلىپ, سوڭىندا جۇمىس ورنىمدى بوساتۋعا تۋرا كەلدى. مۇنىڭ بارلىعى وتباسىمىز ءۇشىن ءبىر سىناق بولعانداي, وسى سەكىلدى ءبىرشاما قيىندىقتارعا كەزىكتىك. ودان سوڭ, نارىقتاعى ەڭ ارزان دەگەن كولىكتى ساتىپ الىپ, جولداسىم ەكەۋىمىز شوپىر بولۋعا بەل بۋدىق» دەپ جالعاستىردى ول.
38 جاسار اقگۇل ءشارىپوۆا 1 جىل 9 اي ۋاقىت بويى استانالىق تاكسي جۇرگىزۋشىسى بولىپ قىزمەت اتقارىپ كەلەدى. 2008 جىلدان بەرى كولىك تىزگىنىن ۇستاعان ول بۇگىندە تەمىر تۇلپاردى ومىرلىك سەرىگىنە اينالدىردى. كولىكتى تىزگىندەۋىنە وتباسى دا سەبەپشى بولسا كەرەك. ويتكەنى اتاسى دا, اكەسى دە ۇزاق جىلدار بويى شوپىر بولعان. جولداسىنىڭ كولىك جۇرگىزۋ مانەرىن ۇناتىپ جۇرگەن ءوزى دە ىشتەي وسى جۇمىسقا قىزىعا قاراعان كورىنەدى.
جۇمىس كەستەسى تىعىز. استانالىق جولاۋشىلاردى تاسىمالداۋعا كەشكە جاقىن شىعىپ, تاڭ اتقانعا دەيىن كولىك جۇرگىزەدى.
«تاڭەرتەڭ بالا-شاعاما تاڭعى اس بەرىپ, مەكتەبىنە اپارىپ تاستايمىن. ودان كەشكى ۋاقىتقا دەيىن ءۇي شارۋاسىمەن اينالىسامىن. ساعات 8-9-داردا جۇمىسقا شىعىپ, تاڭعى 7-گە دەيىن قىزمەتتە بولامىن. مۇنداي كۇن تارتىبىنە وتباسىم ۇيرەندى, بالالارىم جاۋاپكەرشىل بولۋعا داعدىلاندى. جۇمىس ءوز بابىمەن بولسا دا, وتباسىمىزدا بارلىعىمىز مىندەتتى تۇردە ءبىر داستارحان باسىندا اس ىشەمىز. تۇنگى ۋاقىتتا ءجۇرۋدى بالالارىمنىڭ ۇيدە, الاڭسىز وتىراتىندىعىنان ءبىلىپ تاڭدادىم. ءوزىمنىڭ دە كوڭىلىم ءماز بولادى» دەدى كەيىپكەرىمىز.
كۇندەلىكتى ونداعان ءومىر يەسىن تاسىمالداعان سوڭ, جۇرگىزۋشى موينىنداعى جاۋاپكەرشىلىك وراسان. اقگۇل ءشارىپوۆا ءار جولاۋشىنى ا-نۇكتەسىنەن ب-نۇكتەسىنە دەيىن امان-ەسەن جەتكىزۋ باستى مىندەتىم دەيدى. باسقا سالالاردا ءوزىن سىناپ كورگەن ول وسى قىزمەتى جانىنا جاقىن ەكەنىن جەتكىزدى. ءاردايىم كوتەرىڭكى كوڭىل-كۇيدە ءجۇرىپ, كولىگىنە وتىرعان جاندارمەن دە ورىندى قالجىڭداساتىنىن ايتادى. سوزىنشە, وزىنە دە اقجارقىن ەلوردالىقتار كەزدەسەدى.
«تاكسي جۇرگىزۋشىسى بولۋ – بۇل كۇندەلىكتى ادامدارمەن تىلدەسۋ, اڭگىمە قۇرۋ. از عانا ۋاقىتتا تاجىريبە جيناپ, وسى قىزمەتتەن مەنىڭ ويعا تۇيگەنىم, ءبىزدىڭ قىزمەتتە ەڭ ءبىرىنشى پسيحولوگ بولۋى كەرەك ەكەن. ويتكەنى ءارتۇرلى شاقىرتۋعا بارعاندا ول جەردەگى ادامدى ءبىر كورگەننەن-اق ونىڭ مىنەزىن «تانىپ-ءبىلىپ» الاسىڭ. ومىرىندەگى قىزىعى مەن شىجىعىن بولىسەتىن جاندار كوپ. نەشە ءتۇرلى تاعدىرلاردى ەستىپ جاتامىن. وسى ايتقاندارىنان وڭ نارسە تاۋىپ, كوڭىلىنە تيتتەي دە بولسا جاقسىلىق ۇيالاتۋعا تىرىسامىن. ءوزىم دە ساباق الامىن. ءسوزسىز بارلىعى كولىككە كۇلىپ كەلىپ جاتپايدى. كەيبىرىنىڭ مىنەزى جىبەكتەي ەمەس. حالىقپەن ۇنەمى بايلانىستا بولعاننان كەيىن ءتۇرلى ادامدار كەزىگەدى. ءبىرى راقمەت ايتىپ, ءساتتى كۇن تىلەسە, ەندى ءبىرى شۋ شىعارىپ, سوزگە كەلۋگە دايىن-اق تۇرادى. مۇندايدا باستىسى, سابىرلىق تانىتۋ كەرەك. كەز كەلگەنگە قاباق شىتپاي, كۇلىپ قاراساڭ, كۇنىڭ دە ءدال سولاي وتەدى. سوندىقتان تاكسي جۇرگىزۋشىسى ەڭ اۋەلى ءار جاعدايدا سابىرلىق تانىتۋى وتە قاجەت.
قالالىقتار كولىكتەن ءتۇسىپ بارا جاتىپ «وتە جەڭىل ءارى بايىپپەن جۇرگىزەدى ەكەنسىز» دەپ شىنايى ريزاشىلىعىن ءبىلدىرىپ جاتادى. ونداي سوزدەردى ەستىگەندە قۋانامىن. كەيدە كەۋدەمدى ەرەكشە سەزىم كەرنەيدى. جالپى مەن ءوز كاسىبىمدى وتە جاقسى كورەمىن. سوندىقتان بولار قيىندىقتى سەزبەيتىنىم. ۇيرەنشىكتى جۇمىسىم بولعان سوڭ, بارىنشا ۇقىپتى ىستەۋگە تىرىسامىن» دەدى ول.
ءتۇنى بويى تەمىر تۇلپار تىزگىندەيتىن «شوپىر» ايەل كۇندىز دە شىعىپ, تابىسىڭ ەسەلەپ ارتتىرۋعا بولادى دەيدى. بىراق تۇستەگى كەپتەلىستىڭ جۇيكەنى توزدىراتىنى بار. سوندىقتان ءتۇنى بويى جۇمىس ىستەپ, ءارى ودان ءلاززات الۋ اقگۇل ءشارىپوۆا ءۇشىن الدەقايدا تيىمدىرەك.
– ارينە تاكسي جۇرگىزۋشىسى رەتىندە كوپ ايلىق تاپقىڭ كەلسە, سايكەسىنشە كوپ ۋاقىت رولدە وتىرۋىڭ قاجەت. ءوزىمدى تاۋلىگىنە 10 مىڭ تەڭگەدەن 50 مىڭ تەڭگە الۋعا دەيىن سىناپ كوردىم. بىراق ەكى-ءۇش كۇندەي قايتا قالىپقا كەلۋ قيىن بولادى. قاراجاتتىڭ وسۋىنە ارينە تاكسي قىزمەتىنىڭ ساناتى دا اسەر ەتەدى. ەڭ ءبىرىنشى «ەكونوم» تاريفتەن ازىراق تاپسام, بۇگىندە «كومفورت» جانە «كومفورت+» ساناتىندا جۇرۋىمنەن ناپاقام ارتتى. استانا سەكىلدى مەگاپوليستە كۇن ساناپ كولىكتەر كوبەيىپ كەلەدى. بىلتىر كۇنىنە 35 مىڭ تەڭگە تاۋىپ جۇرسەم, بۇگىندە كوپ دەگەندە 20 مىڭ تەڭگە شىعارۋعا تىرىسامىن. ونىڭ ۇستىنە قازىرگى كولىگىمدى نەسيەگە الدىم. سوندىقتان ونى جابۋ ءۇشىن قوسىمشا تابىس كوزى رەتىندە الەۋمەتتىك جەلىدە بلوگ جۇرگىزۋدىڭ دە پايداسى بار. قالالىقتاردىڭ مەنى ءجيى تانىپ جاتۋى سودان, – دەدى ا.ءشارىپوۆا.
قالادا ءوزى سەكىلدى تاكسي جۇرگىزۋشىسى بولىپ جۇرگەن نازىك جاندىلار از ەمەس. اسىرەسە, ورتا جاستاعى وتباسىلى ايەل ادامدار بارشىلىق. بۇگىندە بارلىعى ءتىل تابىسىپ, قۇربى-قۇرداسقا اينالعان. ومىرلىك جولىن جولاۋشى تاسىمالىمەن بايلانىستىرعان اقگۇل ءشارىپوۆا – ءۇش ۇل, ءبىر قىز تاربيەلەپ وتىرعان كوپبالالى انا. تۇڭعىشى جاس ونەرتاپقىش رەتىندە روبوتوتەحنيكا سالاسىندا جەتىستىككە جەتىپ جۇرسە, ەكىنشى ۇلى فۋتبولمەن اينىلاسادى. ال قىزى تاەكۆوندودا باق سىناپ جۇرگەنىمەن ەرەكشەلەنەدى. ايەل قىرىق شىراقتى ەكەنىن كورسەتە بىلگەن كوپبالالى انا «بالا – اتا-انانىڭ ايناسى» دەگەندى ۇستانىم ەتكەن. وسىلايشا, ەرەكشە قىزمەت يەسى ادال ەڭبەك ەتۋ ارقىلى بالالارىنا ۇلگى كورسەتىپ, ولاردىڭ دا بىلىكتى مامان بولعانىن ارماندايدى.
