قر ەڭبەك جانە حالىقتى الەۋمەتتىك قورعاۋ مينيسترلىگىنىڭ كەڭەيتىلگەن القا وتىرىسىندا ۆەدومستۆو باسشىسى سۆەتلانا جاقىپوۆا قازاقستانداعى كوشى-قون پروتسەستەرىن رەتتەۋ جانە تسيفرلاندىرۋ تۋرالى باياندادى, دەپ حابارلايدى astana-akshamy.kz.
سۆەتلانا جاقىپوۆا مەملەكەت باسشىسىنىڭ تاپسىرماسى نەگىزىندە وتكەن جىلى 7 باعىت بويىنشا جۇمىستاردى كوزدەيتىن 2023-2027 جىلدارعا ارنالعان كوشى-قون ساياساتىنىڭ تۇجىرىمداماسى ازىرلەنگەنىن جانە قابىلدانعانىن ەسكە سالدى.
ەڭبەكمينى باسشىسى كوشى-قون پروتسەستەرىن رەتتەۋ جۇيەسىن تسيفرلاندىرۋ باسىم باعىتتاردىڭ ءبىرى بولىپ تابىلاتىنىن اتاپ ءوتتى.
«ميگرانتتاردىڭ قوزعالىسىن ەسەپكە الۋدىڭ بىرىڭعاي اقپاراتتىق جۇيەسىن قۇرۋ جوسپارلانۋدا. بۇل بىزدەگى بارلىق شەتەلدىك جۇمىس كۇشىن اۆتوماتتاندىرۋدى جانە تسيفرلىق ەسەپكە الۋدى قامتاماسىز ەتەدى. مىندەتتى جسن قالىپتاستىرۋدى ءبىر مەزگىلدە ەنگىزۋ شەتەلدىك تۇلعانىڭ ەڭبەك شارتتارىن جانە ۋاقىتشا تۇرۋعا ىقتيارحاتتارىن ۋاقتىلى تىركەۋگە مۇمكىندىك بەرەدى», – دەدى مينيستر.
ىشكى جانە ەتنيكالىق كوشى-قون سالاسىندا قابىلدانعان شارالارعا قاراماستان, سولتۇستىك جانە وڭتۇستىك وڭىرلەر اراسىنداعى دەموگرافيالىق تەڭگەرىمسىزدىك پروبلەمالارى ءالى دە ساقتالۋدا.
بەيىمدەلۋ پروبلەمالارىن شەشۋ ءۇشىن كەلۋ وڭىرىندە قونىس اۋدارۋشىلاردى سۇيەمەلدەۋ بويىنشا جەرگىلىكتى اتقارۋشى ورگانداردىڭ ءوزارا ءىس-قيمىلىنىڭ جاڭا الگوريتمى ازىرلەندى. ول جەرگىلىكتى قوعامداستىققا ءتيىمدى ينتەگراتسيالاۋ ءۇشىن وتباسىن, ونىڭ ىشىندە بالالاردى, سونداي-اق الەۋمەتتىك, دەنساۋلىق ساقتاۋ جانە ءبىلىم بەرۋ قىزمەتتەرىن قوسا العاندا, 25 بەيىمدەلۋ جانە ينتەگراتسيالىق قىزمەتتەردى قامتيدى. قىزمەتتەردى قونىستاندىرۋ وڭىرلەرىندەگى مانساپ ورتالىقتارىنىڭ قىزمەتكەرلەرى كورسەتەتىن بولادى. قونىس اۋدارۋشىلاردىڭ بەيىمدەلۋىن باقىلاۋ ايماققا كەلگەننەن كەيىن 5 جىل ىشىندە وتباسىنىڭ تسيفرلىق كارتاسى جانە ءموبيلدى قوسىمشا ارقىلى جۇزەگە اسىرىلادى.
