«كوشپەندىلەر وتى» كونتسەرتى
![](https://astana-akshamy.kz/wp-content/uploads/2024/02/14-e1709143689124-780x470.jpg)
ەركەعالي راحماديەۆ اتىنداعى مەملەكەتتىك اكادەميالىق فيلارمونيا «The Nomads’ fire» جوباسىنىڭ پرەمەراسىن ۇسىندى. جوبانىڭ جەتەكشىسى – «Alem» زاماناۋي بي بالەتىنىڭ كوركەمدىك جەتەكشىسى ءارى ەلوردالىق فيلارمونيانىڭ باس رەجيسسەرى باقىت ءتاجينوۆ.
جوبا اتاۋىن قازاق تىلىنە اۋدارعاندا «كوشپەندىلەر وتى» اتالاتىن كونتسەرت باعدارلاماسى ەتنيكالىق مۇرانى يننوۆاتسيالىق مۋزىكالىق فورمالارمەن ۇيلەستىرۋگە باعىتتالعان. كونتسەرتكە قاتىسۋشىلار ەتنو-فانك پەن ەتنو-روكتى ارالاستىرىپ, كوشپەندىلەردىڭ مۋزىكالىق مۇراسىن اسپاپتىق ۇنمەن جاڭعىرتتى. كونتسەرتتە كونە دىبىستارمەن قاتار بۇگىندە زاماناۋي مۋزىكا دا ورىندالدى. ءسويتىپ «كوشپەندىلەر وتى» كونتسەرتى وتكەن مەن بولاشاقتىڭ اراسىندا كوپىر ورناتتى.
كونتسەرتكە «Alem» زاماناۋي بي بالەتى, «سارىارقا» حالىق مۋزىكا ءانسامبلى, فيلارمونيانىڭ كامەرالىق حورى, ەسترادالىق, كلاسسيكالىق ۆوكال, حالىق ءانى بولىمدەرىنىڭ سوليستەرى, سونداي-اق ەسترادالىق سيمفونيالىق وركەستر ونەر كورسەتتى. توعجان جاحين, قاراگوز عاسيموۆا, ەدىل قۇسايىنوۆ جانە باسقا دا قازىرگى قازاق كومپوزيتورلارىنىڭ تۋىندىلارى ورىندالۋىمەن قاتار قازاق مۋزىكاسىنىڭ ءىنجۋ-مارجاندارى – «ايقاراكوز», «ەكەۋىن-اي», «قاراي كوزىم» حالىق اندەرى ايتىلدى.