1994 جىلعى 6 شىلدەدە قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ جوعارعى كەڭەستىڭ جالپى وتىرىسىندا كۇتپەگەن ۇسىنىس جاساعانى ەسىمىزدە.
«…سىزدەردىڭ قاراۋلارىڭىزعا رەسپۋبليكانىڭ ومىرىنە, اسىرەسە الداعى بولاشاعى ءۇشىن اسا ماڭىزدى ماسەلەنى – ەلىمىزدىڭ استاناسىن كوشىرۋ تۋرالى ماسەلەنى قويعالى تۇرمىن. الماتى تاۋەلسىز مەملەكەتتىڭ تالاپتارىنا قازىردىڭ وزىندە-اق جاۋاپ بەرە المايدى. سوندىقتان مەنىڭ تاپسىرمام بويىنشا مەملەكەتتىڭ جاڭا استاناسىنىڭ ورنالاساتىن جەرىن انىقتاۋ ماقساتىندا رەسپۋبليكانىڭ كۇللى اۋماعى ەگجەي-تەگجەيلى تەكسەرۋدەن وتكىزىلدى. 32 پارامەتر بويىنشا جۇرگىزىلگەن ساراپتاما بارلىق نۇسقالاردىڭ ىشىندە ەڭ دۇرىسى اقمولا ەكەنىن كورسەتتى» دەگەن ەدى سوندا نۇرسۇلتان ءابىشۇلى.
بىراق ەلدىڭ ءبارى بۇل ۇسىنىستى قولداي قويماعانى دا بولدى. جوعارعى كەڭەستىڭ دەپۋتاتتارى قىزۋ ايتىس-تارتىستان كەيىن پرەزيدەنتتىڭ ۇسىنىسىنا قولداۋ ءبىلدىردى.
ەندى بۇگىن قاراپ وتىرساق, سول كەزدە قابىلدانعان شەشىمنىڭ دۇرىستىعى انىق بولىپ كورىنەدى. مەنىڭ ويىمشا, بۇل تەك قانا ەل ىشىندەگى ايتۋلى وقيعا عانا ەمەس, ۇلكەن ستراتەگيالىق شەشىم بولعانى ءسوزسىز. اينالدىرعان 25 جىلدىڭ ىشىندە بۇرىنعى اقمولامىز تورتكۇل دۇنيە كوز تىككەن استانامىزعا اينالدى. قازىر قازاقتىڭ ەلورداسىن بۇكىل الەم بىلەدى.
ءوز باسىم وسى قالانىڭ بايىرعى تۇرعىنىمىن, سوندىقتان جاس ەلوردامىزدىڭ قالىپتاسۋ كەزەڭىندەگى وقيعالاردى جاقسى بىلەمىن. ءومىر بويى ۇستازدىق ەتىپ كەلەمىن. استانانىڭ كوشىرىلەتىنى تۋرالى جاڭالىقتى اقمولالىقتار ۇلكەن قۋانىشپەن ءارى ۇمىتپەن قابىلداعان ەدى. ءبارى دە استانا مارتەبەسىمەن بىرگە قالاعا, جالپى وڭىرگە جاڭا تىرشىلىك كەلەدى دەپ كۇتتى. ارينە, سولاي بولدى دا.
ۋاقىت العا وزعان سايىن جاڭا استانامىز حالقىمىزدى بىرىكتىرىپ, توپتاستىردى. قازاقستاندىقتار ءوز استاناسىن بۇكىل ەل بولىپ بىرگە سالدى. قالا قۇرىلىستارىندا ەلىمىزدىڭ بارلىق وڭىرلەرىنەن جۇزدەگەن قۇرىلىسشىلار, مەردىگەرلىك ۇيىمدار كەلىپ جۇمىس ىستەدى. شەتەلدىك كومپانيالار ءزاۋلىم عيماراتتاردى سالۋعا ۇلەس قوستى. جالپى, استاناعا قونىس اۋدارۋشىلاردىڭ نەگىزگى بولىگى 1997 جىلدىڭ كۇزىندە كەلە باستاعان ەدى. ءالى ەسىمدە, 1997 جىلعى 8 قاراشادا اقمولاعا مەملەكەتتىك رامىزدەر ەتالوندارى جەتكىزىلگەن بولاتىن. سوندا ءبىز دە, بارشا قازاقستاندىقتار دا جاڭا استانانىڭ بولاتىنىنا ءشۇباسىز سەنگەن بولاتىن. قۇدايعا شۇكىر, بار قازاقتىڭ باس قالاسىنا, وتانىمىزدىڭ جۇرەگىنە, تاۋەلسىزدىگىمىزدىڭ تىرەگىنە اينالعان استانا – ءبارىمىز ءۇشىن ماقتانىش, مارتەبە. سوندىقتان ءاربىر وتانداسىمدى ەلوردامىزدى ماقتان تۇتۋعا, ايالاۋعا, اسقاقتاتۋعا شاقىرامىن. ءيا, سول ءبىر قىستىڭ كۇنى جۇرەگىمىزدى جىلىتقان استانانىڭ كوشىپ كەلگەن كۇنىنەن بەرى قانشا ۋاقىت وتسە دە ءاربىر اقجولتاي وقيعالار ويدان كەتپەيدى ەكەن. سونداي ەستەن كەتپەس وقيعانىڭ ءبىرى ارينە, 1997 جىلدىڭ 10 جەلتوقسانى ەكەنى ءسوزسىز. ويتكەنى وسى كۇننەن باستاپ قازاقستاننىڭ جاڭا ەلورداسى – استانانىڭ تاريحى باستالدى.
وسپان سۇلەيمەنۇلى,
قازاقستان وقۋ-اعارتۋ ءىسىنىڭ ۇزدىگى, زەينەتكەر
