ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ كونتسەرت زالىندا استانا قالاسى اكىمدىگىنىڭ قولداۋىمەن بەلگىلى كومپوزيتور, قازاقستاننىڭ ەڭبەك سىڭىرگەن قايراتكەرى تىلەۋعالي قىشقاشبايدىڭ ەلوردانىڭ 25 جىلدىعىنا ارنالعان «استانا – باس قالا» اتتى شىعارماشىلىق كەشى ءوتتى.
بىرقاتار باسشىلىق قىزمەتتى اتقارعان كەش يەسى وسىدان شيرەك عاسىر بۇرىن استانا قالاسى مادەنيەت باسقارماسىنىڭ باسشىسى بولىپ تاعايىندالدى. ەكى جىل وسى قىزمەتتى اتقارىپ, سول ۋاقىتتا الاتاۋدان ارقاعا ەندى كوشىپ كەلگەن جاڭا استانا مادەنيەتىنىڭ اياققا تۇرۋىنا اتسالىستى. سول جىلدارى بەلگىلى اقىن جەڭىس قاشقىنوۆتىڭ ولەڭىنە «استانا – باس قالا» اتتى ءان جازدى. بۇل تۋىندىنى استانانىڭ كوشىپ كەلگەن كۇنى – 1997 جىلدىڭ 10 جەلتوقسانىندا «جاستار» سارايىندا اقجول مەيىربەكوۆ پەن بايان ەسەنتاەۆا العاش رەت ورىندادى. ءسال كەيىن رەسەيلىك «نا-نا» توبى رەپەرتۋارىنا قوسىپ, استانانىڭ حالىقارالىق تۇساۋكەسەرى كۇنى – 1998 جىلدىڭ 10 ماۋسىمىندا ەسىلدىڭ جاعاسىندا شىرقادى.
تىلەۋعالي قىشقاشبايدىڭ شىعارماشىلىعىندا وسى «استانا – باس قالا» ءانىنىڭ شوقتىعى بيىك. جالپى كومپوزيتوردىڭ اندەرىنەن باسقا سيمفونيالىق وركەسترگە, حالىق اسپاپتارى وركەسترىنە, ىشەكتى اسپاپتار كۆارتەتىنە ارنالعان مۋزىكالىق شىعارمالارى بار. ونەر يەسى عىلىممەن دە اينالىسىپ, پەداگوگيكا عىلىمدارىنىڭ دوكتورى, پروفەسسور عىلىمي اتاعىن الدى. 6 مونوگرافيا مەن 5 وقۋلىق, 16 وقۋ قۇرالىن, عىلىمي ماقالالاردى جازدى. بيىل «قازاق ونەر الەمى» مونوگرافياسى جارىق كوردى.
ال شىعارماشىلىق كەشىندە ۇلىقبەك ەسداۋلەت, عالىم جايلىباي سىندى كورنەكتى اقىنداردىڭ, باسقا دا اۆتورلاردىڭ ولەڭدەرىنە جازىلعان اندەر شىرقالىپ, تۋىندىلارى ورىندالدى. كەش بارىسىندا استانا قالاسىنىڭ سيمفونيالىق وركەسترى, بەلگىلى انشىلەر باقتيار تايلاقباەۆ, قۇرماش ماحان, باۋىرجان يساەۆ, ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ انشىلەرى ونەر كورسەتتى.
