استانادا الماتى اۋدانىنىڭ قۇرىلعانىنا 26 جىل قارساڭىندا VIII «كۇي مەن جىردىڭ جارمەڭكەسى» اتتى مادەني-رۋحاني ءىس-شارا ءوتتى. ءىس-شارا قۇرمانعازىنىڭ شاكىرتى, «كۇي اناسى» اتانعان دينا نۇرپەيىسوۆانىڭ ەسكەرتكىشىنە گۇل شوقتارىن قويۋمەن باستالدى.
– كۇي مەن جىر ونەرى – قازاق حالقىنىڭ تاريحى مەن رۋحاني بايلىعىنىڭ ەڭ كيەلى دە قاسيەتتى ءتۇرى. عاسىرلار بويى دامىپ جەتكەن بۇل ونەر – بۇگىندە ۇلتتىق مادەني قۇندىلىعىمىزدىڭ ءبىرى. ونى جاستارعا جەتكىزىپ, ناسيحاتتاۋ – رەسپۋبليكالىق «كۇي اناسى» قورىنىڭ باسىم باعىتىنىڭ ءبىرى. قور ەلوردادا «كۇيشىلەر» اللەياسىنىڭ اشىلۋىنا, دينا نۇرپەيىسوۆا ەسكەرتكىشى مەن دومبىرا ينستاللياتسياسىنىڭ قويىلۋىنا باستاماشى بولدى. د.نۇرپەيىسوۆانىڭ ورىنداۋىندا 24 كۇي QR-كودقا ءتۇسىرىلىپ, كۇيشى جايلى جيناق جارىق كوردى, – دەدى «كۇي اناسى» قورىنىڭ باسشىسى تولەگەن قۋانىشەۆ.
كۇي مەن جىر جارمەڭكەسىندە الماتى اۋدانىنىڭ ارداگەرلەر حورى اننەن شاشۋ شاشسا, امانگەلدى ءاشىروۆ اقساقال كوپشىلىككە اق باتاسىن بەردى. جىل سايىن ءداستۇر بويىنشا اتاسى نەمەرەسىنە نەمەسە اكەسى بالاسىنا حالقىمىزدىڭ ۇلتتىق اسپابى – دومبىرانى باتا بەرىپ, تابىس ەتەدى. وسى جولى مەديتسينا قىزمەتكەرى, جەتى بالانىڭ اناسى اينۇر بۇلعىنحان مەن كەنجە بالاسى ءمادي بۇلعىنحانعا ءبىلىم سالاسىنىڭ ۇزدىگى, ارداگەر ۇستاز قاجىمۇرات ءناسيۇلى اتالىق تىلەگىن ايتىپ, دومبىرا سىيلادى. «دارىن» دومبىراشىلار ءانسامبلى جانە قالالىق, رەسپۋبليكالىق بايقاۋلاردىڭ جەڭىمپازدارى كۇي تارتىپ, جىرلاردى ورىندادى. سونداي-اق «جاسىل ەل» باعدارلاماسى اياسىندا «كۇيشىلەر» اللەياسىندا اعاش وتىرعىزۋ ءراسىمى ءوتتى. ايتا كەتەيىك, كورەرمەندەر اراسىندا دا كۇي تارتۋ سايىسى ءوتىپ, جەڭىمپازدارعا ۇكىلى دومبىرا مەن «كۇي اناسى» جيناق كىتابى تابىس ەتىلدى.
