ەلوردانىڭ نۇرا اۋدانىنىڭ «بەلسەندى ۇزاق ءومىر ءسۇرۋ» ورتالىعىنىڭ «كۇمىس ەرىكتىلەر» توبى حالىقارالىق بالالاردى قورعاۋ كۇنىنە وراي استانا قالاسى اكىمدىگىنىڭ «جانسايا» الەۋمەتتىك قىزمەت كورسەتۋ ورتالىعىندا ۇيىمداستىرىلعان «باقىتتى بالالىق شاق» اتتى قايىرىمدىلىق اكتسياسىنا قاتىستى.
استانا قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسى مەملەكەتتىك مەكەمەسىنە قاراستى «جانسايا» الەۋمەتتىك قىزمەت كورسەتۋ ورتالىعى ءۇي جاعدايىندا پسيحونەۆرولوگيالىق پاتولوگياسى بار, تىرەك-قيمىل اپپاراتى بۇزىلعان مۇگەدەكتىگى بار بالالارعا جانە پسيحونەۆرولوگيالىق اۋرۋلارى بار بالالارعا, سونداي-اق جارتىلاي ستاتسيونار جاعدايىندا ناۋقاستارعا وڭالتۋ قىزمەتتەرىن كورسەتەدى.
ىزگى ءىس-شارانى نۇرا اۋدانى «بەلسەندى ۇزاق ءومىر ءسۇرۋ» ورتالىعىنىڭ ءبولىم مەڭگەرۋشىسى مۇرات تەمىربۇلاتوۆ اشىپ, بالالاردى مەرەكەسىمەن قۇتتىقتاپ, ءسوز سويلەدى. ورتالىقتىڭ جانىنان جاڭا قۇرىلعان «ارمانداستار» ءانسامبلى دە ءوز ونەرلەرىن كورسەتىپ بالالالارعا كوتەرىڭكى كوڭىل-كۇي سىيلادى. سونىمەن قاتار دەمەۋشىلەردىڭ قولداۋىمەن الىنعان سىيلىقتارىن بالالارعا تابىس ەتتى.
– قايىرىمدىلىق اكتسياسى ءوز دەڭگەيىندە ءوتتى. اتا-انالارى دا بالالارىمەن بىرگە قۋانىپ, ريزاشىلىقتارىن ايتىپ جاتتى. كۇمىس ەرىكتىلەردىڭ بەلسەندىلەرى ءاربىر ءسابيدىڭ باسىنان سيپاپ بولسا دا, اجەلىك مەيىرىم كورسەتتى. قولدارىنا سىيلىعىن ۇستاتىپ, ءبىر قۋانتتى, – دەيدى نۇرا اۋدانى «بەلسەندى ۇزاق ءومىر ءسۇرۋ» ورتالىعىنىڭ جاپپاي جۇمىستار ۇيىمداستىرۋشىسى ءلاززات وتەعۇلوۆا.
ءىس-شارا سوڭىندا استانا قالاسى اكىمدىگىنىڭ «جانسايا» الەۋمەتتىك قىزمەت كورسەتۋ ورتالىعىنىڭ ديرەكتورى امانباي ەرداۋلەت ريزاشىلىعىن ءبىلدىرىپ, «كۇمىس ەرىكتىلەر» توبىن العىس حاتپەن ماراپاتتادى.
ىڭكار بايعابىل,
ل.گۋميلەۆ اتىنداعى
ەۋرازيا ۇلتتىق ۋنيۆەرسيتەتىنىڭ ستۋدەنتى
