23 ماۋسىم – مەملەكەتتىك قىزمەتشىلەر كۇنى. بيىل ەلىمىزدە كاسىبي مەرەكە ون ءبىرىنشى رەت اتالىپ وتەدى. ايتۋلى كۇننىڭ تاريحى بىرىككەن ۇلتتار ۇيىمىنان باستاۋ الادى. 2002 جىلدىڭ 20 جەلتوقسانىندا بىرىككەن ۇلتتار ۇيىمىنىڭ باس اسسامبلەياسى 23 ماۋسىمدى بىرىككەن ۇلتتار ۇيىمىنىڭ مەملەكەتتىك قىزمەتشىسى كۇنى دەپ جاريالاۋ قارارىن قابىلداپ, وعان مۇشە ءار مەملەكەتتى دە وسىعان بايلانىستى ءبىر كۇندى بەلگىلەۋگە شاقىردى. ەڭبەگى تەرەڭ بىلىكتىلىكتى, ۇلكەن جاۋاپكەرشىلىك پەن توزىمدىلىكتى تالاپ ەتەتىن مامان يەلەرىن مەرەكە قارساڭىندا سوزگە تارتىپ, اتقارىپ جاتقان جۇمىستارى مەن مەملەكەتتىك قىزمەت جايلى وي-پىكىرىن سۇراپ بىلدىك.
چوتوياكوۆ مەيرام بازارۇلى, قر قارجى مينيسترلىگىنىڭ مەملەكەتتىك كىرىستەر كوميتەتىنىڭ استانا قالاسى بويىنشا مەملەكەتتىك كىرىستەر دەپارتامەنتىنىڭ كەدەندىك باقىلاۋ باسقارماسىنىڭ كەدەندىك باقىلاۋ ءبولىمىنىڭ باسشىسى: – مەملەكەتتىك قىزمەتكە جۇمىسقا ورنالاسۋ بۇل بالا كۇنگى ارمانىم ەدى. سول ارمانىم ماقساتقا اينالىپ, العاش استانا قالاسى بويىنشا كەدەندىك باقىلاۋ دەپارتامەنتىنىڭ كادر جۇمىسى ءبولىمىنىڭ اعا مامانى بولىپ مەملەكەتتىك قىزمەتكە كەلدىم.
بۇگىندە مانساپتىق مودەلدىڭ نەگىزگى پوستۋلاتى بولىپ تابىلاتىن مەريتوكراتيا قاعيداتى بويىنشا باسشى لاۋازىمىنا تاعايىندالدىم.
جالپى قوعام ءۇشىن, حالىق ءۇشىن ساپالى قىزمەت كورسەتۋ – ءاربىر مەملەكەتتىك قىزمەتشىنىڭ مىندەتى.
كەز كەلگەن مەملەكەتتىڭ جەتىستىگى مەن گۇلدەنۋى مەملەكەتتىك قىزمەتشىلەردىڭ ءتيىمدى جانە كاسىبي جۇمىس جاساپ, قىزمەت ەتۋىمەن نەگىزدەلەدى.
حالىق سەنىمى مەملەكەتتىك قىزمەتشىنىڭ مەملەكەتتىك قىزمەتتى قانشالىقتى ساپالى كورسەتكەندىگىنە قاراپ نىعايادى.
ادام جەكە تۇلعا رەتىندە ءوزىن-ءوزى ۇنەمى جەتىلدىرىپ, العا ۇمتىلۋى قاجەت. بۇل رەتتە, قاي سالادا ەڭبەك ەتسەك تە, كەيىن سوڭىمىزدان ۇلگى بولارلىقتاي ءىس قالدىرعانىمىز ءجون.
كۇن وتكەن سايىن مەملەكەتتىك قىزمەتشىلەرگە قويىلار تالاپ تا, جۇكتەلەتىن جاۋاپكەرشىلىكتىڭ اۋقىمى دا كەڭەيىپ كەلەدى. مەملەكەتتىك قىزمەتتەگى ءاربىر ادام ءوز جۇمىسىنىڭ بارلىق ماڭىزدىلىعىن سەزىنە ءبىلىپ, ەلىمىزدىڭ دامۋ تاريحىندا ءوز ءىزىمىزدى قالدىرۋىمىز قاجەت.
اليموۆا جاينا اليقىزى, قر مەملەكەتتىك قىزمەت ىستەرى اگەنتتىگىنىڭ استانا قالاسى بويىنشا دەپارتامەنتىنىڭ اكىمشىلىك جۇمىس جونىندەگى باس مامانى: – ماماندىق تاڭداۋ – ءاربىر ادامنىڭ ومىرىندەگى ماڭىزدى شەشىمدەردىڭ ءبىرى ەكەنى ءسوزسىز. وتكەن جىلدان باستاۋ العان مەملەكەتتىك قىزمەتكە ىرىكتەۋدىڭ جاڭا پيلوتتىق جوباسى ارقىلى باعىمدى سىناپ, بۇگىنگى تاڭدا مەملەكەتتىك قىزمەتكەر اتانىپ وتىرمىن. بۇل ءوز كەزەگىندە ادامي فاكتوردى جويا وتىرىپ, اشىقتىق, ادىلدىك قاعيداتتارىنا نەگىزدەلگەن مەملەكەتتىك قىزمەتكە كىرۋدىڭ اشىق كورىنىسى دەپ ويلايمىن.
بۇل جۇمىس ماعان تاجىريبە جيناۋعا, جاۋاپكەرشىلىكتى ارتتىرۋ, شەشىم قابىلداۋدى ۇيرەنۋ, ۇقىپتىلىق, مۇقياتتىلىق سەكىلدى جانە جەكە قاسيەتتەردى دامىتۋدى ۇيرەتتى. جاس قىزمەتكەر بولا وتىرىپ, ەلىمنىڭ الپاۋىت مەملەكەتتەرمەن يىق تەڭەستىرە الۋىنا قىزمەت ەتىپ جۇرگەنىمە, ءوزىمنىڭ تامشىداي بولسىن سەپتىگىمنىڭ ءتيىپ جۇرگەنىنە قۋانامىن. مەنىڭ ويىمشا, مەملەكەتتىك قىزمەتكەر – ەلدىڭ مۇددەسى ءۇشىن ءوز كۇشىن, ۋاقىتىن اياماي ەڭبەك ەتەتىن تۇلعا. ەلگە قىزمەت ەتۋ, مەملەكەتتىك قىزمەتتى اتقارۋ بۇل – ۇلكەن جاۋاپكەرشىلىك. ءوز ەلىمنىڭ گۇلدەنۋ جولىندا قىزمەت ەتۋ – مەن ءۇشىن ۇلكەن ماقتانىش جانە ابىروي. جۇكتەلگەن مىندەتتەردى ادال اتقارۋ ارقىلى ەلىمىزدىڭ كوركەيۋىنە تامشىداي ۇلەس قوسىپ جۇرگەنىمدى ماقتان ەتىپ ايتا الامىن. سونىمەن قاتار, وزىمنەن كەيىنگى جاستاردىڭ دا, جەكە باس مۇددەسىن عانا ەمەس, ەلىمىزدىڭ بولاشاعىن بىرگە قالىپتاستىرۋ ءۇشىن مەملەكەتتىك قىزمەتتى تاڭداۋلارىنا ءوز كەڭەسىمدى بەرەمىن. سەبەبى جارقىن بولاشاق قالىپتاستىرۋ – جاستاردىڭ قولىندا دەپ سەنىم بىلدىرەمىن. مەملەكەتتىك قىزمەت بۇل – مەنىڭ تاڭداۋىم, بۇل – مەنىڭ جولىم!
جاناتبەك تورەحان, استانا قالاسىنىڭ ينۆەستيتسيالاردى تارتۋ جانە سىرتقى ەكونوميكالىق قىزمەت ءبولىمىنىڭ باس مامانى: – جاستار – قوعامنىڭ قوزعاۋشى كۇشى عانا ەمەس, ەلدىڭ تىرەگى, مەملەكەتتىڭ بەلسەندى بولىگى. تاۋەلسىزدىگىمىزدى نىعايتىپ, ەلىمىزدى دامىتۋ – قازىرگى جاستاردىڭ باستى مىندەتى. بۇگىنگى تاڭدا تاۋەلسىز ەلدىڭ جالىندى جاستارىنا مەملەكەت تاراپىنان جىل سايىن بارىنشا قولداۋ كورسەتىپ, ءتۇرلى باعدارلامالار جۇزەگە اسۋدا.
مەملەكەتتىك قىزمەتكە قولايلى جاعدايلار جاساۋعا باعىتتالعان بىرقاتار زاڭنامالىق باستامالار تۋرالى, ونىڭ ىشىندە مەملەكەتتىك قىزمەتكە ىرىكتەۋدىڭ جاڭا جۇيەسى ارقىلى ورنالاسۋ مۇمكىندىگى تۋرالى ەستىپ, قازىرگى تاڭدا مەملەكەتتىك قىزمەتتىڭ ءبىر سالاسىن تىزگىندەپ وتىرمىن. مەملەكەتتىك قىزمەت بۇل – مەملەكەت پەن حالىق اراسىنداعى قاتىناستى بايلانىستىرۋشى كوپىر جانە وتانسۇيگىشتىكتىڭ بەينەسى بولىپ تابىلادى. مەملەكەتتىك قىزمەتكەر تەك جۇمىس ورنىندا عانا ەمەس, سونىمەن قاتار, قوعام اراسىندا دا ءوزىن ۇلگى رەتىندە كورسەتىپ, مەملەكەتتىك قىزمەتتىڭ بەدەلىن وڭ جاعىنان كورسەتۋى قاجەت.
ەلىمىزدىڭ جاستارىنا مەملەكەتتىك ورگاندارداعى كونكۋرستارعا قاتىسۋعا قورىقپاۋعا كەڭەس بەرەمىن. حالىق اراسىنداعى بارلىق جاعدايلاردى ەلەمەي, وزدەرىڭىزگە, ءوز كۇشتەرىڭىزگە سەنىڭىزدەر. وتانىمىزدىڭ بولاشاعى – جاستار بولىپ تابىلادى. ال قازىر ەلىمىزدە جاستارعا وزدەرىن كورسەتۋگە كوپ مۇمكىندىك بەرىلىپ وتىر. سىزدەردىڭ دارىندارىڭىز بەن جوعارى بەلسەندىلىكتەرىڭىز ارقىلى پرەزيدەنتىمىز ق.توقاەۆ ايتقان «جاڭا قازاقستاندى» بىرگە قۇرۋعا شاقىرامىن.
قر مەملەكەتتىك قىزمەت ىستەرى اگەنتتىگىنىڭ استانا قالاسى بويىنشا دەپارتامەنتى
