پرەزيدەنتى جانىنداعى كەشىرىم جاساۋ ماسەلەلەرى جونىندەگى كوميسسيا مۇشەلەرى مەملەكەت باسشىسىنا كارىم ماسىموۆكە كەشىرىم بەرۋدەن باس تارتۋدى ۇسىندى, دەپ حابارلايدى astana-akshamy.kz
بۇل تۋرالى دەپۋتات مارات ءباشىموۆ Facebook-تەگى پاراقشاسىندا جازدى.
دەپۋتات مارات ءباشىموۆ پرەزيدەنت جانىنداعى ازاماتتارعا كەشىرىم جاساۋ جونىندەگى كوميسسيا وتىرىسى وتكەنىن مالىمدەدى.
«كوميسسيانىڭ سوڭعى وتىرىسىندا كەشىرىم جاساۋ تۋرالى كەيبىر ماتەريالدار الدىن الا قارالدى. مەرزىمدى ەكى جىلعا قىسقارتۋ بويىنشا دا وڭ ۇسىنىستار قاراستىرىلعان. جۋرناليستەردىڭ ك. ماسىموۆكە كەشىرىم بەرۋ ماسەلەلەرىن قاراۋ تۋرالى سۇراقتارىنا جاۋاپ بەرە وتىرىپ, كوميسسيا كەشىرىم بەرۋدەن باس تارتۋدى ۇسىندى», – دەدى ءباشىموۆ. سونىمەن قاتار ءماجىلىس دەپۋتاتى ابزال قۇسپان دا: «پرەزيدەنت جانىنداعى ازاماتتارعا كەشىرىم جاساۋ كوميسسياسى كارىم ماسىموۆكە كەشىرىم بەرۋدەن باس تارتتى», – دەپ جازدى ول Facebook-تەگى پاراقشاسىندا.
بۇل كوميسسيانىڭ ۇسىنىسى بويىنشا نەگىزگى شەشىمدى مەملەكەت باسشىسى قاسىم-جومارت توقاەۆ قابىلدايدى.
ەسكە سالا كەتسەك, بۇعان دەيىن ۇلتتىق قاۋىپسىزدىك كوميتەتىنىڭ بۇرىنعى باسشىسى كارىم ءماسىموۆ بيىل ناۋرىز ايىندا پرەزيدەنتتەن كەشىرىم سۇراعانى بەلگىلى بولعان ەدى.
