پوكلوننايا تاۋىنداعى جەڭىس مۇراجايىندا كەڭەس وداعىنىڭ باتىرى, حالىق قاھارمانى, قر ءبىرىنشى قورعانىس ءمينيسترى ساعادات نۇرماعامبەتوۆتىڭ 100 جىلدىق مەرەيتويىنا ارنالعان سالتاناتتى ءىس-شارا ءوتتى, astana-akshamy.kz.
قازاقستاننىڭ رەسەيدەگى ەلشىسى داۋرەن اباەۆ, جەڭىس مۇراجايىنىڭ ديرەكتورى الەكساندر شكولنيك, قازاقستاننىڭ رەسەيدەگى ەلشىلىگى جانىنداعى اسكەري اتتاشە اپپاراتىنىڭ قىزمەتكەرلەرى, ماسكەۋ اسكەري وقۋ ورىندارىنىڭ قازاقستاندىق كۋرسانتتارى ماڭگىلىك الاۋ مەن «مۇڭ-قايعى» مۇسىنىنە گۇل شوقتارىن قويدى.
وسىدان كەيىن ساعادات نۇرماعامبەتوۆتىڭ جەكە دەرەكتەرىن «جەڭىس جۇزدەرى» جالپىحالىقتىق تاريحي دەپوزيتاريىنىڭ بازاسىنا سالتاناتتى تۇردە ەنگىزۋ ءراسىمى ءوتتى. بۇل ميلليونداعان ناتسيزممەن كۇرەسۋشىلەردىڭ فوتوسۋرەتتەرى مەن جەكە اڭگىمەلەرىنىڭ ەڭ ۇلكەن ساندىق بانكى. ادام تۋرالى اقپارات تەك ارنايى سۇرانىس بويىنشا ۇسىنىلاتىن قاراپايىم مۇراعاتتان ايىرماشىلىعى, مۇراجايدا كەز-كەلگەن ادام مۋلتيمەديالىق مالىمەتتەر بازاسىنا ينتەراكتيۆتى قول جەتكىزە الادى.
جەڭىس مۇراجايىنىڭ ديرەكتورى الەكساندر شكولنيك قازاقستاندىقتاردى وسى جوباعا قوسىلۋعا شاقىردى. «قازاقستان ازاماتتارى مايداندا سوعىسقان جانە تىلدا ەڭبەك ەتكەن باتىر اتا-بابالارىن ەسكە الىپ, ولاردىڭ ءومىرباياندارى مەن فوتوسۋرەتتەرىن ءبىزدىڭ تاريحي جوبامىزعا ەنگىزەدى دەپ ۇمىتتەنەمىز. سودان كەيىن ولار جەڭىس مۇراجايىنا كەلىپ, ءبىزدىڭ «جەڭىس جۇزدەرى» زالىندا ءوز كەيىپكەرلەرىن كورەدى», – دەدى ول.
ءارى قاراي «بەرلينگە شابۋىل» ديوراماسىندا قوناقتار ساعادات نۇرماعامبەتوۆتىڭ قۇرمەتىنە قويىلعان قولا بيۋست, پورترەت جانە مۇراعاتتىق فوتوسۋرەتتەردەن تۇراتىن ەكسپوزيتسيانى تاماشالادى. اتالعان ەكسپوناتتاردى 2017 جىلى قازاقستان جەڭىس مۇراجايىنا سىيعا تارتتى.
«جەڭىس مۇراجايىندا قازاق حالقىنىڭ ۇلى ۇلىنىڭ مەرەيتويىن اتاپ ءوتۋ ءبىز ءۇشىن ۇلكەن مارتەبە. ونىڭ وتانعا جانقيارلىقپەن قىزمەت ەتۋى وسكەلەڭ ۇرپاققا ۇلگى بولادى. بۇگىنگى ءىس – شاراعا ماسكەۋ اسكەري وقۋ ورىندارىنىڭ جاس كۋرسانتتارى قاتىسقانى وتە ماڭىزدى», – دەپ اتاپ ءوتتى د. اباەۆ.
ولاردىڭ اراسىندا رەسەي فەدەراتسياسى قورعانىس مينيسترلىگىنىڭ اسكەري ۋنيۆەرسيتەتىنىڭ كۋرسانتى جانات مۇحامەت بولدى. ول نۇرماعامبەتوۆ تاۋەلسىز قازاقستاننىڭ قارۋلى كۇشتەرىنىڭ قالىپتاسۋى مەن دامۋىنا باعا جەتپەس ۇلەس قوسقانىن ەسكە سالدى. «ساعادات قوجاحمەتۇلى كورنەكتى اسكەري قايراتكەر عانا ەمەس, قوعام قايراتكەرى دە بولدى. ول وسكەلەڭ ۇرپاقتى پاتريوتيزم رۋحىندا تاربيەلەۋ ءۇشىن كوپ جۇمىس جاسادى. ءبىز ونى ەسىمىزدە ساقتايمىز جانە ماقتان تۇتامىز», – دەدى كۋرسانت.
ونى اعا ارىپتەسى, رەسەي فەدەراتسياسى قارۋلى كۇشتەرىنىڭ جالپى اسكەري اكادەمياسىنىڭ ەكىنشى وقۋ جىلىنىڭ اديۋنكتى, پولكوۆنيك دانيار جۇسىپبەك قولدادى. وفيتسەر نۇرماعامبەتوۆتىڭ ءومىر جولىن اسكەري قىزمەتشى ءۇشىن ۇلگى تۇتارلىق دەپ اتادى.
