1 ماۋسىم – حالىقارالىق بالالاردى قورعاۋ كۇنى ەلوردانىڭ الماتى اۋدانىنىڭ ارداگەرلەر كەڭەسىنىڭ مۇشەلەرى «بارىس» دەپ اتالاتىن تۇرعىن ءۇي كەشەنى تۇرعىندارىنىڭ ارنايى شاقىرۋىمەن ايناكول كوشەسىندەگى ۇيگە ات باسىن تىرەدى.
316 پاتەرلى ءزاۋلىم ءۇيدىڭ كىرە بەرىسىندە قوس تۇعىرعا مەملەكەتىمىزدىڭ كوك بايراعى مەن بارىس بەينەسى سالىنعان اق تۋ ورناتىلىپتى. بۇل داعى ەلىمىزدىڭ قاسيەتتى ءرامىزىن قاستەرلەۋدىڭ بەلگىسى دەپ تۇيىندەدىك. ءۇيدىڭ اۋلاسى مۇنتازداي تازا, جاپىراق شاشقان شىرشا, قاراعاي, اق قايىڭ, تەرەك اعاشتارىمەن جاسىل جەلەڭگە بولەنىپ, قۇمىراعا وتىرعىزىلعان القىزىل گۇلدەر اينالاعا كادىمگىدەي كورىك بەرىپ تۇر. مەرەكە وتەتىن سپورت الاڭىنان مۋزىكا اۋەنى توگىلىپ تۇر. سپورت الاڭى دا اۋقىمى كەڭ, مۇندا جالعا بەرىپ, قارجى تولەپ, كاسىپقوي فۋتبولشىلار دايىندىق جاتتىعۋلارىن وتكىزەدى ەكەن.
ءبىزدى قارسى العان, وسى ءىس-شارانى وتكىزۋگە مۇرىندىق بولعان مۇلىك يەلەرىنىڭ بىرلەستىگىنىڭ (ميب) توراعاسى جاناباي ءباشارۇلى:
– ءبىز كوكتەمنىڭ العاشقى كۇندەرى ەتەك العان سۋىقتان جانە ءساۋىر ايىندا بولعان سۋ تاسقىنىنىڭ سالدارىنان وتكىزە الماعان ناۋرىز, قازاقستان حالقىنىڭ بىرلىگى مەرەكەسىن, بۇگىنىگى حالىقارالىق بالالاردى قورعاۋ كۇنىمەن ۇشتاستىرىپ وتىرمىز, – دەپ الدىن الا ەسكەرتتى.
مەرەكەنى تاماشالاۋعا تۇرعىن ءۇي كەشەنىنىڭ بارلىق تۇرعىنى جينالىپتى. كىشكەنتاي نەمەرەلەرىن جەتەكتەگەن اتا-اجەلەر, مەرەكەلىك كونتسەرتكە قاتىسۋشى بالعىن بالاپانداردى جەتەكتەگەن اتا-انالار وسى ءىس-شارانى ۇيىمداستىرۋشىعا ارنايى جولىعىپ, راقمەتىن جاۋدىرىپ جاتتى.
مەرەكە ەلىمىزدىڭ ءانۇرانىن ايتۋدان باستالدى. بۇكىل الاڭدا جينالعان جۇرت وڭ قولىن جۇرەككە تاقاپ, مەملەكەتىمىزدىڭ قاستەرلى ءرامىزىن اسا ءبىر اسقاق سەزىممەن ورىنداپ شىقتى. ودان سوڭ مەرەكەنى تاماشالاۋعا كەلگەن اقساقالدار ءسوز الىپ, ەلىمىزدىڭ بولاشاعى ءبۇلدىرشىن بالاپاندارعا ارنالعان اق تىلەكتەرىن جاۋدىردى.
بۇل ءىس-شاراعا ارنايى كەلگەن الماتى اۋدانى ارداگەرلەر كەڭەسىنىڭ توراعاسى مارات مۇستافين:
– قۇرمەتتى حالايىق! ەلىمىزدىڭ تۇپكىر-تۇپكىرىندە حالىقارالىق بالالاردى قورعاۋ كۇنىنە ارنالعان مەرەكەلىك ءىس-شارالار ءوتىپ جاتىر. مەملەكەت باسشىسى قاسىم-جومارت توقاەۆ ءوزىنىڭ قۇتتىقتاۋىندا «بالالار – ءبىزدىڭ بولاشاعىمىز. سوندىقتان ەلىمىزدەگى ءاربىر جەتكىنشەكتىڭ مەيىرىم مەن قامقورلىققا بولەنىپ, ۇلكەننىڭ قولداۋىن سەزىنۋى, ەرتەڭگى كۇنگە سەنىممەن قاراۋى وتە ماڭىزدى» دەگەن ەدى. بۇگىنگى توي – سونىڭ جارقىن كورىنىسى, – دەپ اباي حاكىمنىڭ «قارا سوزدەر» كىتابىن سىيعا تارتتى.
مەرەكە الدىن-الا دايىندالعان كونتسەرتتىك باعدارلامامەن جالعاستى. كىشكەنتاي بوبەكتەردەن جاساقتالعان بي توپتارى «بالاپان», «ەركە سىلقىم», ەرەسەك جاستاردان قۇرىلعان «حيپ-حوپ» توبى, «گارمونيا سنا», ورتا توپتىڭ ءبيشى قىزدارى «ۆەسەلىە پوني», ەكىنشى حورەوگرافيالىق ورتا توپتىڭ بيشىلەرى «ميككي-ماۋس» بيىمەن كورەرمەننىڭ ريزاشىلىعىنا بولەندى. اسىرەسە ارنايى شاقىرعان «ۆايناح» بي ءانسامبلى جۇرتتىڭ كوڭىلىنەن شىقتى. سونىمەن قاتار كارەتيست بالالار ءوز ونەرلەرىن ورتاعا سالدى. كوپشىلىك ورتاسىنان ءانشى اجەلەر مەن اتالار دا شىعىپ, مەرەكەنىڭ ءسانىن كەلتىردى.
ماناپ ادىرەشەۆ,
استانا قالاسى الماتى اۋداندىق ارداگەرلەر كەڭەسىنىڭ مۇشەسى,
مەديا توپ توراعاسى
