مايقايىڭدا تابىلماي جاتقان قۇتقارۋشىنىڭ وتباسىنا 5 بولمەلى پاتەردىڭ كىلتى بەرىلدى
پاۆلودار وبلىسىنىڭ اكىمى اسايىن بايحانوۆ مايقايىڭ كەنتىنە ارنايى بارىپ, كەنىشتەگى ويىققا اۆتوبۋسپەن بىرگە ءتۇسىپ كەتكەن قۇتقارۋشى ا.شايمەردەننىڭ وتباسىنا بەس بولمەلى پاتەردىڭ كىلتىن تابىستادى, دەپ حابارلايدى astana-akshamy.kz
ايدوس شايمەردەن – ويىق استىندا جاتقان ەكى ازاماتتىڭ ءبىرى.
ول كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى پاۆلودار فيليالىندا جەدەل الدىن الۋ جۇمىستارى جونىندەگى ۆزۆود كومانديرىنىڭ ورىنباسارى بولىپ قىزمەت اتقارعان. ازاماتتىڭ سوڭىندا جارى نۇرسۇلۋ شايمەردەن مەن 5 بالاسى قالىپ وتىر.
پاۆلودار وبلىسى اكىمىنىڭ ءباسپاسوز قىزمەتى اتالعان وتباسىعا بەس بولمەلى پاتەردىڭ كىلتى تابىس ەتىلگەنىن, پاتەر پاۆلودار قالاسىندا ورنالاسقانىن راستادى.
ەسكە سالا كەتەيىك, 15 مامىردا مايقايىڭ التىن كەنىشىندە قوس قۇتقارۋشىنى ىزدەۋ جۇمىستارى قايتا جانداندى.
ەڭبەك جانە حالىقتى الەۋمەتتىك قورعاۋ مينيسترلىگى ەڭبەك جانە الەۋمەتتىك قورعاۋ كوميتەتىنىڭ توراعاسى تولەگەن وسپانقۇلوۆ مايقايىڭداعى اپات بويىنشا 21 ادام كىنالى دەپ تانىلۋى مۇمكىن ەكەنىن ءمالىم ەتتى.
سۋرەت: baribar.kz
