قازاقستان ەلشىسى بولات سۇگىرباەۆ مالايزيانىڭ كولىك ءمينيسترى ەنتوني لوكەمەن كەزدەسىپ, ەكى ەل اراسىنداعى لوگيستيكانى دامىتۋ ماسەلەلەرىن تالقىلادى, دەپ حابارلايدى astana-akshamy.kz.
قازاقستاننىڭ مالايزياداعى ەلشىلىگىنىڭ باستاماسىمەن وتكەن كەزدەسۋگە ورتالىق ازيا ەلدەرى, ازەربايجان, پولشانىڭ ەلشىلەرى, قۇرمەتتى كونسۋلدار مەن مالايزيانىڭ ءىرى تەڭىز پورتتارىنىڭ باسشىلارى قاتىستى.
كەزدەسۋ بارىسىندا ب. سۇگىرباەۆ قازاقستان ءوزىنىڭ ترانزيتتىك الەۋەتىن ارتتىرۋعا جانە الەمنىڭ ءارتۇرلى وڭىرلەرىمەن لوگيستيكالىق تىزبەكتەردى دامىتۋعا ەرەكشە ءمان بەرەتىنىن اتاپ ءوتتى. ديپلومات قازاقستان مەن مالايزيا ازاماتتىق اۆياتسيا سالاسىندا بەلسەندى ىنتىماقتاسا باستاعانىن جانە قازاقستاننىڭ تەڭىز لوگيستيكاسىن كەڭەيتۋگە دايىن ەكەنىن ايتتى.
ءىس-شارا اياسىندا قر ەلشىسى مالايزيانىڭ ءىرى تەڭىز پورتتارىنىڭ باسشىلارىمەن دە كەزدەسىپ, ولارمەن تەڭىز لوگيستيكاسى مەن پورتتى باسقارۋ سالاسىنداعى ىنتىماقتاستىق الەۋەتىن تالقىلادى.
ە. لوكە قازاقستان مەن ورتالىق ازيا حالىقارالىق لوگيستيكادا ماڭىزدى ءرول اتقاراتىنىن, سوندىقتان مالايزيا ءبىزدىڭ وڭىرمەن ىنتىماقتاستىقتى نىعايتۋعا ەرەكشە ءمان بەرەتىنىن اتاپ ءوتتى. مينيستر مالايزيانىڭ 2024-2025 جىلدارعا ارنالعان حالىقارالىق پورت ۇيىمىنا (IMO) قايتا سايلانۋىن قولداعانى ءۇشىن قازاقستانعا جەكە العىسىن ءبىلدىردى. ول بۇل ۇيىمنىڭ مالايزيا ءۇشىن ماڭىزدىلىعىن اتاپ ءوتتى جانە مالايزيانىڭ جۇك تاسىمالىنىڭ 90% تەڭىز كولىگىمەن تاسىمالداناتىنىن حابارلادى.
«مالايزيا تەڭىز لوگيستيكاسى مەن پورتتى باسقارۋ سالاسىنداعى تاجىريبەسىمەن بولىسۋگە اشىق جانە ونى باسقا ەلدەردەن ۇيرەنۋگە دايىن», – دەپ قورىتىندىلادى ە. لوك.
تاراپتار كولىك جانە لوگيستيكا سالاسىنداعى ىنتىماقتاستىقتى ودان ءارى تەرەڭدەتۋ تۋرالى ۋاعدالاستى جانە ەلدەر مەن وڭىرلەر اراسىنداعى ىسكەرلىك بايلانىستاردى ساپالى جانداندىرۋ ءۇشىن بىرلەسكەن جوسپارلار بەلگىلەدى.
