ماڭعىستاۋدىڭ جەراستى مەشىتتەرىن يۋنەسكو مۇرالارى تىزىمىنە قوسۋ ءۇشىن نوميناتسيالىق قۇجاتتاردى ازىرلەۋ باستادى. بۇل تۋرالى مادەنيەت جانە اقپارات مينيسترلىگىنەن ءمالىم ەتتى, دەپ حابارلايدى astana-akshamy.kz
«مەملەكەت باسشىسى قاسىم-جومارت توقاەۆتىڭ ۇلتتىق قۇرىلتايدىڭ «ادال ادام -ادال ەڭبەك – ادال تابىس» اتتى ءۇشىنشى وتىرىسىندا بەرگەن تاپسىرماسىنا ساي مادەنيەت كوميتەتى 2024 جىلى ماڭعىستاۋدىڭ جەراستى مەشىتتەرى بويىنشا نوميناتسيالىق قۇجاتتاردى ازىرلەۋدى باستادى. جالپى, ماڭعىستاۋدىڭ جەراستى مەشىتتەرى نوميناتسياسى اياسىندا بەكەت اتا, شولپان اتا, شاقپاق اتا, قارامان اتا جانە سۇلتان ەپە ەسكەرتكىشتەرى بويىنشا قۇجاتتامالار دايىنداۋ كوزدەلگەن», – دەلىنگەن مينيسترلىكتىڭ اگەنتتىك ساۋالىنا بەرگەن جاۋابىندا.
ۆەدومستۆو مالىمەتىنشە, نوميناتسيالىق قۇجاتتاردى دايىنداۋ يۋنەسكو تالاپتارىنا ساي اۋقىمدى جۇمىستاردى جۇرگىزۋدى قاجەت ەتەدى.
«ونىڭ ىشىندە نوميناتسيالاتىن وبەكتىلەر بويىنشا ولاردىڭ بۋفەرلىك ايماقتارىنىڭ جوباسىن ازىرلەۋ, يۋنەسكو بەلگىلەگەن نوميناتسيالاۋدىڭ 10 كريتەريلەرىمەن بايلانىستىرىپ, يۋنەسكو تىزىمىنە ۇسىنىلاتىن وبەكتەردىڭ جوعارعى امبەباپ قۇندىلىقتارىن اجىراتۋ, باسقارۋ جوسپارلارىن ازىرلەۋ, الدىن-الا مونيتورينگتىك جۇمىستاردى جۇرگىزۋدى قاجەت ەتەدى. كەلەشەكتە قازاقستاننىڭ ورتاعاسىرلىق مەشىتتەرى مەن كەسەنەلەرى ساۋلەتتىك ونەر ۇلگىلەرىن (ولاردىڭ رەتى انىقتالاتىن بولادى), سونداي-اق, قازىرگى زاماننىڭ ساۋلەتتىك ونەر تۋىندىلارىن (ماسەلەن, قازاقستان قوناق ءۇيى, مەدەۋ مۇز ايدىنى) حالىقارالىق كەڭىستىككە ۇسىنۋ جوسپارى بار», – دەدى مينيسترلىكتەن.
فوتو:mangystau.inmap.kz/
