استانادا ۆەدومستۆوارالىق ساراپشىلار توبى وقۋشىلاردىڭ ساپالى تاماقتانۋىن باقىلاۋدى جۇزەگە اسىرۋ ءۇشىن بىرقاتار مەكتەپتە بولدى. ساراپشىلار ءبىلىم بەرۋ ۇيىمىنداعى اسحانانىڭ جۇمىسىن باقىلاۋدى جۇزەگە اسىراتىن براكەراجدىق كوميسسيانىڭ جۇمىسىنا باعا بەردى.
ەكتەپتە تاماقتانۋدى جاقسى ۇيىمداستىرۋ – ۋاقىتىنىڭ كوبىن مەكتەپتە وتكىزەتىن وقۋشى ءۇشىن دەنساۋلىعىن جاقسارتۋدىڭ كەپىلى. تولىققاندى تاماقتانۋ كوپتەگەن اۋرۋلاردىڭ الدىن الىپ, بالانىڭ وقۋعا ۇلگەرىمىن, ىنتاسىن دامىتىپ, زامانعا ساي ومىرگە بەيىمدەلۋىنە جاقسى اسەر ەتەدى. ال بالا جاس كەزىندە جەتكىلىكسىز تاماقتانسا, ونىڭ دەنە ءبىتىمى دامۋىن تەجەپ, اۋرۋىنا, زات الماسۋ جۇيەسىنە اسەر ەتىپ, اعزاسى مەن دەنە بىتىمىندە وزگەرىستەرگە اكەلىپ سوعۋى ىقتيمال.
قالالىق ءماسليحات وتىرىسىندا ءماسليحات توراعاسى ەرلان كاناليموۆ «مەكتەپتەگى تاماقتاندىرۋدى ۇيىمداستىرۋداعى مەملەكەتتىك ورگاندار مەن باسقا دا جاۋاپتى تۇلعالاردىڭ جاۋاپكەرشىلىك دەڭگەيى تومەن, وڭ قوزعالىستار جوق. بۇل سالاداعى تۇيتكىلدى ماسەلەلەر جۇيەلى سيپاتقا يە جانە ءوز شەشىمىن تاپپاي كەلەدى. بۇل جاعداي 1-4 سىنىپ وقۋشىلارى مەن الەۋمەتتىك وسال ساناتىنداعى بالالاردى تەگىن تاماقتاندىرۋعا بولىنگەن سوما قوماقتى ەكەنىنە قاراماستان ورىن الىپ تۇر. وقۋشىلاردىڭ جارتىسىنا جۋىعى مەكتەپ اسحانالارىندا تاماق ىشپەيدى. كوبىنەسە تاعام ءدامدى ەمەس نەمەسە تومەن كالوريالى بولعاندىقتان, بالالار ونى ۇناتپايدى» دەپ ىلگەرىدە سىناعان بولاتىن.
استانا مەكتەپتەرىنىڭ اسحانالارىن تەكسەرگەن براكەراج كوميسسياسىنىڭ قۇرامىنا اتا-انالار مەن مەكتەپ اكىمشىلىگى كىرەدى. تاماقتاندىرۋ ساپاسىن باقىلاۋدى كۇشەيتۋ ءۇشىن قالانىڭ ءاربىر مەكتەبىندە ساپانى باقىلاۋ جونىندەگى براكەراجدىق كوميسسيا قۇرىلعان (ونىڭ قۇرامىنا قامقورشىلىق كەڭەس مۇشەلەرى, ديرەكتور, مەديتسينا قىزمەتكەرى, الەۋمەتتىك پەداگوگ جانە اتا-انالار كىرەدى (كەمىندە 10 ادام).
كوميسسيانىڭ مىندەتتەرىنە كەلىپ تۇسەتىن تاماق ونىمدەرىنىڭ ساپاسىنا, ىدىس-اياق دايىنداۋ تەحنولوگياسىنا, توڭازىتقىش-تەحنولوگيالىق جابدىقتىڭ جارامدىلىعىنا, ونىمدەر مەن دايىن تاعامداردى ساقتاۋ مەرزىمدەرى مەن شارتتارىنىڭ ساقتالۋىنا مونيتورينگتى جۇزەگە اسىرۋ كىرەدى.
سونداي-اق ۆەدومستۆوارالىق ساراپتاما توبىن قۇرۋ تۋرالى بەكىتىلگەن بۇيرىق بار, ونىڭ قۇرامىنا قوعامدىق كەڭەستىڭ, قازاق تاماقتانۋ اكادەمياسىنىڭ, تاماقتانۋ پروبلەمالارى ينستيتۋتىنىڭ وكىلدەرى, قالالىق ءماسليحات دەپۋتاتتارى, «ادىلەت» تۇتىنۋشىلاردىڭ قۇقىقتارىن قورعاۋ قوعامى» قوعامدىق بىرلەستىگى جانە اتا-انالار قوعامى كىرەدى.
سونىمەن قاتار, تاماقتانۋ قاعيدالارىنا سايكەس قالانىڭ تاماقتانۋ ساپاسىن باقىلاۋ جونىندەگى ۆەدومستۆوارالىق ساراپتامالىق توپتار ءاربىر ءبىلىم بەرۋ ۇيىمىندا وقۋشىلاردىڭ تاماقتانۋ ساپاسىن مونيتورينگتەۋ جونىندەگى براكەراجدىق كوميسسيانىڭ قىزمەتىنە جۇيەلى مونيتورينگ جۇرگىزەدى.
ولار ىستىق تاماق پەن بۋفەت تاعامدارىنىڭ ساپاسىن باقىلاپ, سونداي-اق ەكى اپتادا ءبىر رەت اس بلوگىنداعى سانيتارلىق-گيگيەنالىق نورمالاردىڭ ساقتالۋىن باقىلاۋعا مىندەتتى.
– تاعام باعاسىن ءبىلىم باسقارماسى بەكىتكەن. ءبىز بالالاردى ءدامدى, پايدالى جانە ۋاقتىلى تاماقتاندىرۋعا مىندەتتىمىز. ءبىزدىڭ ءمازىر بەلگىلەنگەن تالاپتارعا سايكەس كەلەدى, ءار ماۋسىمدا وزگەرەدى. اسحانادا 12 قىزمەتكەر جۇمىس ىستەيدى, – دەدى اسحانا مەڭگەرۋشىسى تاتيانا ۆاسيلچەنكو.
ساراپشىلار ءار وقۋشىعا ارنالعان تاعامنىڭ قۇرامى مەن مولشەرىن, سونداي-اق ءتيىستى قۇجاتتاردىڭ دۇرىستىعىن تەكسەردى. ساراپشىلار تەكسەرۋ بارىسىندا كەمشىلىكتەر انىقتالماعانىن اتاپ ءوتتى.
جىل سايىن استانا قالاسىنىڭ ءبىلىم باسقارماسى وقۋشىلاردىڭ تاماقتانۋ راتسيونى بويىنشا بىرىڭعاي ستاندارتتار نەگىزىندە قازاق تاماقتانۋ اكادەمياسىنىڭ تاماقتانۋ پروبلەمالارى ينستيتۋتىمەن كەلىسىلگەن 4 اپتالىق ءمازىر بەكىتەدى. مەكتەپتەردەگى تاماقتاندىرۋ سول ءمازىر نەگىزىندە جۇزەگە اسىرىلادى.
ورتا ءبىلىم بەرۋ ۇيىمدارى ينتەرنەت-رەسۋرستارىنىڭ «مەكتەپتەگى تاماقتانۋ» ايدارىندا ءبىلىم الۋشىلاردىڭ تاماقتانۋىن ۇيىمداستىرۋ بويىنشا: پەرسپەكتيۆالى, كۇندەلىكتى ءمازىر, تاعامداردىڭ فوتوسۋرەتتەرى, جۇمىس جوسپارى, تاماقتانۋ ساپاسىنىڭ مونيتورينگى جونىندەگى كوميسسيالاردىڭ اكتىلەرى جونىندەگى اقپاراتتار ورنالاستىرىلعان.
شاعىم تۇسكەن كەزدە قۇرامىنا قالانىڭ تاماقتانۋ ساپاسىن باقىلاۋ جونىندەگى ۆەدومستۆوارالىق ساراپتاما توبىنىڭ وكىلدەرى ەنگىزىلگەن ءبىلىم باسقارماسىنىڭ كوميسسياسى قۇرىلادى. كوميسسيا شاعىم فاكتىلەرىنە تەكسەرۋ جۇرگىزەدى.
استانا قالاسى ءبىلىم باسقارماسى باسشىسىنىڭ ورىنباسارى سەرىك ادىلباەۆ مەكتەپتەگى تاماقتانۋ ساپاسى تۋرالى ايتتى.
– جالپى, بۇگىنگى تاڭدا مەكتەپتەگى تاماقتانۋ ساپاسى جاقسى. جاڭا وقۋ جىلىنا دايىندىق جۇمىستارى جۇرگىزىلۋدە. ءمازىر قايتا قارالۋى مۇمكىن. كەلەسى وقۋ جىلىندا ساپالى تاماقتانۋعا دايىندىق جۇمىستارىن وسى جازدا باستايمىز, – دەپ ءتۇسىندىردى باسقارما باسشىسىنىڭ ورىنباسارى.
ۆەدومستۆوارالىق ساراپشىلار توبى ءساۋىر ايىنان باستاپ قالانىڭ 15 مەكتەبىنىڭ اسحانالارىنا مونيتورينگ جۇرگىزدى.
