مەملەكەتتىك قىزمەتشى كۇنىنە وراي مەملەكەتتىك قىزمەتتە ەڭبەك سىڭىرگەن ارداگەر قالامگەرلەرمەن كەزدەسۋ ءوتتى, دەپ حابارلايدى astana-akshamy.kz.
بۇگىن مەملەكەتتىك قىزمەت ىستەرى اگەنتتىگىندە 23 ماۋسىم – مەملەكەتتىك قىزمەتشى كۇنىنە وراي «ادىلەتتى قازاقستاندى ادال ازاماتتار قۇرادى» تاقىرىبىندا مەملەكەتتىك قىزمەتتە ەڭبەگى سىڭگەن ارداگەر جازۋشى قالامگەرلەرمەن كەزدەسۋ ءوتتى. كەزدەسۋگە مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي, مەملەكەتتىك قىزمەتشىلەر,
مەملەكەتتىك باسقارۋ اكادەمياسىنىڭ ماگيسترانتتارى مەن دوكتورانتتارى قاتىستى. شارانىڭ نەگىزگى ماقساتى – اعا بۋىن جانە وسكەلەڭ ۇرپاقتىڭ اراسىنداعى ساباقتاستىقتى جانداندىرۋ. ءتالىم-تاربيەلىك ءمانى ەرەكشە وسى شارادا ءسوز العان اگەنتتىك توراعاسى دارحان جازىقباي «قوعامدى ىزگىلىككە تاربيەلەۋدە, ۇرپاقتىڭ سانا-سەزىمىن, وي-ءورىسىن كەڭەيتۋدە ادەبيەتتىڭ اتقاراتىن ءرولى ەرەكشە» دەي كەلە, كەزىندە ادەبيەت پەن مەملەكەتتىك قىزمەتتى قاتار الىپ جۇرگەن, ەلدىك مۇراتتاردى ناسيحاتتاپ, تاۋەلسىزدىكتىڭ تۇعىرىن نىعايتۋعا ۇلەس قوسقان اعا ۇرپاقتىڭ قالامگەرلىك جانە قايراتكەرلىك بولمىسىنا ارنايى توقتالىپ, قوناقتارعا كەزدەسۋگە ارنايى قاتىسقانى ءۇشىن العىسىن ءبىلدىردى.
اگەنتتىك توراعاسى قالامگەرلەردى مەملەكەت باسشىسى كاسىم-جومارت توقاەۆ جاريالاعان «ادىلەتتى قازاقستان – ادال ازامات» قاعيداتىن ىلگەرىلەتۋگە, مەملەكەتتىك اپپارات وكىلدەرىنىڭ بويىندا ادىلدىك, ادالدىق, مەملەكەتشىلدىك سىندى قاسيەتتەردى ورنىقتىرۋ ىسىنە اتسالىسۋعا شاقىردى. وسى ورايدا «ادال ازامات» قۇندىلىقتارىن بەينەلەيتىن, مەملەكەتتىك قىزمەتشىلەردىڭ جاعىمدى بەينەسىن قالىپتاستىرۋعا ىقپال ەتەتىن جاڭا تۋىندىلار جازۋعا ۇسىنىس ءبىلدىردى. ونداي شىعارمالاردىڭ تارتىمدى بولۋى ءۇشىن, مەملەكەتتىك قىزمەتتىڭ قىر-سىرىن جەتىك بىلەتىن جازۋشىلار قالام تارتىپ جاتسا تۋىندىنىڭ مازمۇنى شىنايى دا اسەرلى شىعاتىنىن اتاپ ءوتتى.
ءۋاليحان قاليجانۇلى, جابال ەرعاليۇلى, جولتاي ءالماشۇلى, روزا مۇقانوۆا, ازات اكىم سىندى جازۋشى قالامگەرلەر ءوز تاجىريبەلەرىمەن ءبولىسىپ, ويلارىن ورتاعا سالدى. مەملەكەتتىك قىزمەتشىلەر مەن مەملەكەتتىك باسقارۋ اكادەمياسىنىڭ تىڭداۋشىلارىنىڭ قويعان ساۋالدارىنا جاۋاپ بەرىپ, پىكىر الماستى. شارا سوڭىندا «ادىلەتتى قازاقستان – ادال ازامات مەملەكەتتىك قىزمەتشىلەردىڭ كاسىبي جانە تۇلعالىق بولمىسى» اتتى كىتاپتىڭ تۇساۋى كەسىلدى. كىتاپتىڭ مازمۇنىندا ۇلتتىق مۇددە, مەملەكەتتىك سانا, ادىلدىك, اشىقتىق, انتقا ادالدىق سىندى قاعيداتتار كورسەتىلىپ, ولاردى وزەكتى ۇستانىم رەتىندە ۇسىنۋ ارقىلى مەملەكەتتىك اپپاراتتىڭ دامۋىنا جاڭاشا سەرپىن بەرۋ كوزدەلگەن. تۋىندى اۆتورى دارحان جازىقباي ۇسىنىلىپ وتىرعان ەڭبەكتە جاڭا فورماتسياداعى مەملەكەتتىك قىزمەتشىلەرگە ءتان باستى ۇستانىمدار مەن قاعيداتتار جايلى جازىلعانىن, ولار مەملەكەتتىك قىزمەتشىلەردىڭ سانالى جاڭعىرۋىنا, ولاردىڭ بويىندا جاڭا مادەنيەت پەن جاڭاشا قۇندىلىقتار قالىپتاستىرۋعا باعىتتالعانىن اتاپ ءوتتى.
