استانا قالاسىندا دوستىق ۇيىندە قر مام جانە قازاقستان حالقى اسسامبلەياسىنىڭ باستاماسىمەن «مەملەكەتتىك ءتىل – ەتنوسارالىق قاتىناس ءتىلى» تاقىرىبىندا دوڭگەلەك ۇستەل ءوتتى, دەپ حابارلايدى astana-akshamy.kz/
ءىس-شاراعا قحا توراعاسىنىڭ ورىنباسارى –قازاقستان رەسپۋبليكاسىنىڭ پرەزيدەنتى اكىمشىلىگى قحا حاتشىلىعىنىڭ مەڭگەرۋشىسى مارات ءازىلحانوۆ, قازاقستان رەسپۋبليكاسى مادەنيەت جانە اقپارات مينيسترلىگى ەتنوسارالىق قاتىناستاردى دامىتۋ كوميتەتىنىڭ توراعاسى عالىم شويكين, قازاقستان رەسپۋبليكاسى پارلامەنتىنىڭ دەپۋتاتتارى, قوعام قايراتكەرلەرى مەن زيالى قاۋىم وكىلدەرى, فيلولوگيا جانە لينگۆيستيكا سالاسىنداعى ساراپشىلار, ءتىلتانۋشىلار, مەملەكەتتىك ءتىلدى ەركىن مەڭگەرگەن ءتۇرلى ەتنوس وكىلدەرى, سونداي-اق قازاقستان حالقى اسسامبلەياسى مەن «اسسامبلەيا جاستارى» رقب وكىلدىكتەرىنىڭ مۇشەلەرى قاتىستى.
جيىنعا قاتىسۋشىلار مەملەكەت باسشىسىنىڭ قازاقستان حالقى اسسامبلەياسىنىڭ XXXIII سەسسياسىندا بەرگەن مەملەكەتتىك ءتىلدى جان-جاقتى دامىتۋ جونىندەگى تاپسىرماسىن ىسكە اسىرۋ, سونداي-اق مەملەكەتتىك ءتىلدى ناسيحاتتاۋ جانە ونىڭ مارتەبەسىن ارتتىرۋ تۋرالى ءسوز ەتتى.
«ەلدەگى تۇراقتىلىق پەن تاتۋلىق – باعا جەتپەس بايلىعىمىز. ەل بىرلىگىنىڭ نەگىزى ءتىل بىرلىگىنەن باستاۋ الادى. بۇگىن ءبىز مەملەكەتتىك ءتىلدىڭ ەتنوسارالىق قاتىناس تىلىنە اينالۋى ءۇشىن قانداي ناقتى قادامدار جاساۋ كەرەك, ءتىلدى جەتىك مەڭگەرۋدىڭ وزىق تاجىريبەلەرىن كوپشىلىككە قالاي تاراتامىز دەگەن سۇراقتارعا جاۋاپ ىزدەپ, تالقىلاۋ ءۇشىن جينالدىق», – دەدى عالىم شويكين.
ايتا كەتۋ كەرەك, دوڭگەلەك ۇستەل اياسىندا وقىتۋ سەمينارى ۇيىمداستىرىلدى. وندا ەلىمىزدىڭ بارلىق وڭىرىنەن قازاق ءتىلىن ەركىن مەڭگەرگەن ءتۇرلى ەتنوس وكىلدەرى وزدەرىنىڭ ءتىل ۇيرەنۋ تاجىريبەسىن ءبولىسىپ, مەملەكەتتىك ءتىلدىڭ قولدانىلۋ اياسىن كەڭەيتۋ بويىنشا ۇسىنىستارىن ورتاعا سالدى, سونداي-اق مەملەكەتتىك ءتىلدىڭ ەتنوسارالىق قارىم-قاتىناس ءتىلى رەتىندەگى ءرولىن كۇشەيتۋ ادىستەرىن تالقىلادى.
سەميناردا تانىمال مەديا تۇلعالار مەن فيلولوگيا سالاسىنداعى ساراپشىلار تاجىريبەلەرىن ءبولىستى.
