تۇركىستاندا 2006 جىلعى تۇرعىن مەملەكەتتىك رامىزدەردى قورلاعانى ءۇشىن جاۋاپقا تارتىلدى, دەپ حابارلايدى astana-akshamy.kz
بيىل 14 ساۋىرىندە جىگىت تۇركىستان قالاسىنىڭ ورتالىق كوشەسىمەن كولىك جۇرگىزىپ كەلە جاتىپ, تەلەفونىنا ءىلىنىپ تۇرعان مەملەكەتتىك تۋدى كامەراسىنا ءتۇسىرىپ العان.
كەلەسى كۇنى ول روليكتى TikTok-تا جاريالاعان.
اتاپ ايتقاندا, ول قازاقستان رەسپۋبليكاسىنىڭ تۋىن «شۇبەرەك» دەپ اتاعان.
ۆيدەو ۇناتپاعاندار كوپ بولعان. پىكىر بىلدىرۋشىلەر دە مەملەكەتتىك رامىزگە دەگەن مۇنداي كوزقاراسقا نارازىلىق بىلدىرگەن.
كوپ ۇزاماي اۆتور جازباسىن ءوشىرىپ تاستاعان, بىراق كەيبىر قولدانۋشىلار پوليتسيا مەن پروكۋراتۋراعا ارىز تۇسىرگەن.
وسىدان سوڭ بۇل فاكت بويىنشا تەرگەۋ باستالىپ, جىگىتتىڭ جەكە باسى انىقتالىپ, ۇستالدى. ونىڭ ۇستىنەن قىلمىستىق كودەكستىڭ 372-بابى بويىنشا قىلمىستىق ءىس قوزعالدى.
روليكتىڭ مازمۇنىن تالداعان پسيحولوگيالىق-فيلولوگيالىق ساراپتامادان اۆتوردىڭ سوزىنەن قازاقستاننىڭ مەملەكەتتىك ءرامىزىن قورلاعانى انىقتالدى.
سوتتا جاس جىگىت ءوز كىناسىن تولىق مويىنداپ, وكىنىپ, كەشىرىم سۇرادى. تەرگەۋدەن جينالعان ماتەريالدار نەگىزىندە ونىڭ كىناسى دالەلدەندى.
سوت ۇكىمىمەن ول ءبىر جىل باس بوستاندىعىن شەكتەۋ جازاسىنا جانە ءجۇز ساعاتقا ءماجبۇرلى جۇمىسقا تارتىلدى. ۇكىم ءالى زاڭدى كۇشىنە ەنگەن جوق.
